Ephesians 5 - De Beebaa Dabu

Mouli bei dagodo dama a de maalama

¹ Deenei ai, goodou gi ago ange i de Maadua, bei dagodo o ana dama hagamogomogo.

² Goodou hai hegau i de aloha, bei de aloha o Klisdo i gidaadeu, ia ne gaavange dono mouli i odaadeu hiidinga, e hai ai ssigidaumaha nnamu kala ange gi de Maadua.

³ Aagai gi deai donu se dangada hai be se manu i oodou magavaa, be se dangada dahulinga hakino gee daudahi, aabe go de nnoo hagamau mee; go hiidinga mee nei e dee heohi ange donu gi dangada o de Maadua.

⁴ Gai gi deai hogi vaivai muna, be ni muna llodo ssenga, be go de hakadanga i mee baubau. Mee nei e dee heohi donu i doodou hai; aagai goodou gi llodo i de hagaahe ange de abodonu.

⁵ Gai goodou gi iloo de mee nei: e deai dono se dangada hai be se manu, be se dangada dahulinga hakino gee, be se dangada nnoo hagamau mee (e bei se dangada e daumaha ange gi denga diinonga), e maua i de ulu i de nohoanga hodooligi o Klisdo ma de Maadua.

⁶ Goodou gi dee dugua ange dahi dangada gi hagasengalia goodou i hanu ngadi muna; go hiidinga aanei mee e haia ga humai de bole o de Maadua gi gilaadeu e dee hagallongo ange gi ana muna.

⁷ Deenei ai, goodou gi dee hagabuni ange gi gilaadeu.

⁸ Go hiidinga i mua goodou e gohu, gai iainei goodou gu maalama i lodo o Tagi Maolunga; deenei ai, goodou mouli bei dagodo o dama a de maalama,

⁹ (go hiidinga hua o de maalama go mee danuaa alodahi ma de heohi aama de mee abodonu),

¹⁰ gai haia gi iloo e goodou be aahee mee e hagamalangilangi ina Tagi Maolunga.

¹¹ Goodou aude haia hegau o lo te gohu e deai laa haigamaiana, aagai goodou gaamai mee nei gi de maalama.

¹² Go hiidinga ni mee hagadookaa donu hogi de tala alaadeu hegau e hai hagammuni,

¹³ aagai de masavaa naa huu e dugu mai ai dahi mee gi de maalama, gai gu gidee danuaa,

¹⁴ go hiidinga mee alodahi gu hagaago mai i de maalama gu gidee. Deenei ai, gu tala e hai ange, “Tangada goi seni, alahage, gai mouli age mai i de magau, gai Klisdo ga hagamaalama goe.”

¹⁵ Goodou dagidiiloo doodou hai e mouli ai; goodou gi dee bei dagodo o de gau llodo ssenga, aagai gi bei gilaadeu e heiangi.

¹⁶ Goodou gi dee moumou ina oodou masavaa, go hiidinga gu baubau denga laangi nei.

¹⁷ Deenei ai, goodou gi dee llodo ssenga, aagai gi tonu ange gi lodo o Tagi Maolunga.

¹⁸ Goodou gi dee unu gi ssenga i uvaini, go hiidinga e oha oodou mouli; aagai gi hoohonu i de Hagasaalunga ⌊Dabu⌋.

¹⁹ Gai goodou hagadau pasa i denga Psalm, ma denga daahili daumaha, aama daahili i de baasi gi de hagasaalunga. Goodou daahili ga tuhi Tagi Maolunga i oodou lodo alodahi,

²⁰ ga hagaahe ange de abodonu gi de Maadua Tamana i masavaa ma mee alodahi, i de ingoo o taadeu Dagi Maolunga go Iesu Klisdo.

Denga haahine ma daane dau bodu

²¹ Goodou hagadau hagadubu i oodou magavaa i doodou maatagu i Klisdo.

²² Denga haahine dau bodu, goodou hagadubu ina oodou bodu bei doodou hagadubu Tagi Maolunga.

²³ I hiidinga go taane de biho o de hine bei dagodo o Klisdo, go ia de biho o de nohoanga dabu. De nohoanga dabu go dono angaanga, gai go ia dono Ia Hagaola.

²⁴ De nohoanga dabu e hagadubu Klisdo; gai e bei ai hogi, denga haahine gi hagadubu ina olaadeu bodu i mee alodahi.

²⁵ Denga daane dau bodu, goodou aaloha i oodou bodu, gi bei de aloha o Klisdo i de nohoanga dabu ma de gaavange dono mouli i ono hiidinga,

²⁶ gai ia ga hai ai gi dabu de nohoanga dabu i dana hakaugau ia i vai o muna a de Maadua,

²⁷ gai ia ga kave ai gi niiona de nohoanga dabu gu hagamahamaha laa, gu deai mee baubau iai, be ni mee vinivini iai, aabe ni mee bei mee nei iai; gai gu dabu aama teai mee baubau iai.

²⁸ Gai e bei ai hogi, denga daane dau bodu gi aaloha i olaadeu bodu, bei delaadeu aaloha i olaadeu angaanga donu. Taane e aloha i dono bodu, e aloha donu huu i de ia.

²⁹ Go hiidinga e deai donu se dangada e kino i dono angaanga donu, aagai ia e kana ange ga haangai ange ma de hagamogomogo dono angaanga, bei de hai a Klisdo e hai ai laa de nohoanga dabu,

³⁰ go hiidinga gidaadeu ni diba donu niio dono angaanga.

³¹ “Deenei ai, taane e dugu dono damana ma dono dinana, gai ia ga hagapigi ange gi dono bodu, gai gilaau gu se angaanga e dahi.”

³² De mee e dee iloo laa e hai ngadaa mmao i de tonu ange aagena, aagai au e hagadaba bolo de mee nei e tala dagodo o Klisdo ma de nohoanga dabu.

³³ Deenei ai, dahi ma dahi gi aloha i dono bodu bei dono aloha donu i de ia, gai de hine gi hagadubu ina dono bodu.