Ephesians 4 - De Beebaa Dabu

De buni o de angaanga o Klisdo

¹ Deenei ai, au tangada o Tagi Maolunga e noho laa i lo te hale pono, e dangidangi adu goodou gi mouli bei tagodo e heohi ange laa gi de hagahi oodou gu hagahia ange laa aagena,

² i de llodo maolalo alodahi ma de daudonu, ma de golomagi lodo, ma de hagadau golomagi lodo i de aloha.

³ Gai hagaduu ngae nnoho hagabuni i ssauaa o de Hagasaalunga ⌊Dabu⌋, i de baba e haia laa gi buni goodou.

⁴ E dahi donu huu angaanga, e dahi donu huu Hagasaalunga, bei doodou hai ne hagahia ai naa gi gaavee de tali hagalodolodo e dahi laa donu huu;

⁵ e dahi donu huu Dagi Maolunga, e dahi donu huu gai, gai e dahi donu huu hogi babudaisi;

⁶ e dahi donu huu Maadua ma Tamana odaadeu alodahi, gai go ia i honga odaadeu alodahi ma mee alodahi. Gai go ia e hagahai hegau ina odaadeu mee alodahi ma lodo alodahi.

⁷ Aagai gidaadeu alodahi ne kave odaadeu duuhanga bei dagodo de hagabaaunga o de mee ngadi gaavange a Klisdo.

⁸ Deelaa ai, gu sisi e hai ange, “Dono masavaa ne hanage ai gi de mommee maolunga, gai ia ne kave de gau dee kii soa madali ia, ma de gaavange mee ngadi gaavange gi dangada.”

⁹ (Gai de muna nei “Ia ne hanage,” dee hee de hagadoonunga, e dee tala mai bolo ia ne hano iho gi de mommee maolalo hugadoo o henua i lalo?

¹⁰ De ia ne hano iho laa go de ia donu hogi ne hanage laa, gi de mommee e maolunga ange i denga langi, gai ia ga hagahoohonu ai mee alodahi.)

¹¹ Gai ia ne hai hanu gi ni dangada tala, hanu ni pelaabisi, hanu ni dangada e hagadele ina de longo danuaa, hanu ni dangada agoago taumaha, gai hanu ni dangada agoago,

¹² e hagadabena ange ai ono dangada gi denga duuhanga hegau, e hagaduu age ai de angaanga o Klisdo,

¹³ ga dae ai gi taadeu maua alodahi gi buni i de gai, ma de iloo mee o Tama Daane a de Maadua, gai gu maatua abodonu i de gai, bei dagodo de honu abodonu o Klisdo;

¹⁴ gi dee bei ai gidaadeu dagodo o denga gauligi, e baabaagia saele laa i denga beau, ma de iliilihia saele i denga hagadaagangaa agoago, a dangada e daahangadia dangada i alaadeu hagatau hadu muna.

¹⁵ Aagai gidaadeu gi daalaa de muna abodonu i de aloha, gi hagadagadaga age ai taadeu maatua i lodo o Klisdo, go de Biho.

¹⁶ Go ia e haia gi duu age de angaanga alodahi, i denga sugusuguinga alodahi iai. Gai ga hai hegau naa huu denga diba alodahi, gai de angaanga gu somo danuaa ma de hagadagadaga age i de aloha.

De mouli hoou i lodo o Klisdo

¹⁷ Gai au e hagammahi e tala hagadonu adu mee nei i de ingoo o Tagi Maolunga, goodou gi dee mouli bei dagodo o denga Gentile, gilaadeu e mouli i alaadeu maanadu deai haigamaiana.

¹⁸ Alaadeu maanadu e kona mmao de gohu, gilaadeu gu vvae gee i de mouli o de Maadua, i hiidinga delaadeu llodo ssenga ma de makaga olaadeu lodo;

¹⁹ gu deai donu selaadeu dookaa, gai gu dugu ange olaadeu angaanga e hai ai denga dahulinga dagodo haisala, ma de llodo mmao e hai denga dahulinga hakino gee alodahi.

²⁰ Aagai e dee deenei doodou hai ne agoago ai i dagodo o Klisdo.

²¹ Goodou gu langona ono dagodo ma de agoago i de mee abodonu i lodo o Iesu.

²² Gai goodou hagauia ma gi dilia gee oodou mouli duai, go tangada duai ne hagasengalia laa i denga lodo donu hakino gee;

²³ gai goodou gi sui hagahoou ina i oodou maanadu,

²⁴ ga hakahu goodou i tangada hoou, ne hai laa ga bei de hagadulagi o de Maadua i de heohi abodonu laa aama de dabu.

²⁵ Deenei ai, goodou gi dee hadu muna, gai gi hagadau daalaa de muna abodonu i oodou magavaa, go hiidinga gidaadeu alodahi e dau ange gi de angaanga daudahi.

²⁶ Goodou llili aagai gi dee haisala; goodou gi dee daohia doodou llili ga danu ai de laa,

²⁷ gai gi dee dugua ange dahi damaa mommee gi de ia hagabaubau laa.

²⁸ Tangada gaiaa gi dee gaiaa, aagai ia gi hai hegau, ma de hai mee danuaa i luoono lima, gi maua ai e ia i de bale ange gilaadeu e duasala.

²⁹ Goodou aude daalaa hanu muna baubau i oodou ngudu, aagai goodou daalaa donu huu muna danuaa e hagammahi ina lodo o dangada, ma de heohi ange gi de masavaa, ma de bale ange ai gilaadeu e langona.

³⁰ Gai goodou gi dee hagadaemaha ina de Hagasaalunga Dabu o de Maadua, go de ia oodou ne hagailonga ange ai gi de laangi e hagahonu ai doodou hagaola.

³¹ Goodou dilia de golo age de baubau, ma de bole ma de lili, ma de hagadaumee, ma de hai samu, aama denga hagadaagangaa maanadu baubau alodahi.

³² Gai goodou gi hagadau abodonu ma de hagadau aaloha, ma de hagadau degi ange gi haisala i oodou magavaa, bei de hai a de Maadua ne degi adu ai laa gi goodou i daho Klisdo.