Ecclesiastes 5 - De Beebaa Dabu

Madagu i de Maadua

¹ Dagidiiloo au mee e hai i doo masavaa e ulu ai i de hale o de Maadua. E danuaa ange noo koe e hano ga hagallongo, i doo hano ga hai ssigidaumaha a de gau llodo ssenga, go gilaadeu e dee iloo bolo alaadeu mee e hai e dee heohi.

² Aude hagamoolau gi daalaa hanu muna i doo ngudu, aude hagamoolau gi daalaa hanu ngadi muna i oo lodo i mada luu mada o de Maadua. Go hiidinga de Maadua e noho i de langi, gai koe i henua i lalo, deelaa ai, haia gi dee lagolago au muna e tala.

³ De midi e hidi mai i de lagolago hagasaele, gai e bei ai hogi, tangada lodo senga e lagolago ana muna.

⁴ Noo koe gu hagatoo donu ange gi de Maadua i dahi mee, gai koe hagamoolau haia gi bei, go hiidinga ia e dee malangilangi i de gau llodo ssenga; hagasula ina dau hagatoo donu.

⁵ E danuaa ange dau dee hagatoo donu i dahi mee, i dau hai dahi hagatoo donu aagai koe e dee hai gi bei.

⁶ Koe gi dee haisala i au muna e tala. Gai koe gi dee hai baasi ange gi tangada e daalaa muna a de Maadua, “Ne haisala dagu mee ne hagatoo donu ai.” Ni haigamaiana aha dau hai gi lili de Maadua i au muna, ga hidi mai ai dana oha au hegau alodahi gu hai?

⁷ Midi lagolago ma ngadi muna lagolago e deai donu olaadeu haigamaiana. Aagai koe gi madagu i de Maadua.

Goloa lagolago e deai olaadeu haigamaiana

⁸ Koe gi dee lele oo mouli i dau gidee de vaivai haia o de gau hagaau aloha i dahi ungaamee, ma teai se hagamodu heohi ma heohi o dangada; go hiidinga dahi dagi maolunga e dagitilo tagi i ono lalo, gai denga dagi i olaau elunga e dagitilo gilaau.

⁹ Hua e maua i de gelegele e haigamaiana ange gi dangada alodahi; gai e haigamaiana ange hogi gi de hodooligi.

¹⁰ Be goai e lodo i denga sseene e dee maua donu gi malangilangi i ana sseene e mau; gai tangada e lodo i goloa lagolago e dee maua hogi gi malangilangi i mee aana e hanu. De mee nei e deai hogi ono haigamaiana.

¹¹ De masavaa naa huu e lagolago ai mee danuaa, gai gu soa hogi dangada e gaina. Gai ni haigamaiana aha ange ai gi tangada niiana, e dee go dana gidee donu huu i luoono mada?

¹² Tangada hai hegau e seni danuaa, e dee galemu be ne momo aabe ne lagolago ana mee ne gai, aagai goloa lagolago o tangada lava e hai ma e dee maua e ia i de seni.

¹³ Au gu gidee ange dahi mee hagadaemaha baubau i lalo de laa: de lava a tangada e hagabudu laa ga dugu e hagadaemaha donu huu ia,

¹⁴ aabe de lava ne ngadi odi laa i dahi hai ngadaa, gai noo gu dahi ana dama daane, gai gu deai donu ana mee e doe ange gi de ia.

¹⁵ Tangada ne gilisau donu huu ga haanau mai ai i daho dono dinana, gai e bei ai hogi dono hai e magau ai. Ia e dee kave naa donu dahi mee daudahi oona gu hai hegau ange laa aagena.

¹⁶ De mee nei se mee hogi hagadaemaha baubau: De hai o tangada ne humai ai, go dono hai hogi e hano ai, gai ni aha naa a tangada e mau gai ia e ngadi doolohi de madangi?

¹⁷ De masavaa oona e mouli ai gai ia ne gaimee i lo te gohu, ia ne daemaha mmao, ma de duasala aama de lili.

¹⁸ Tilo, au gu gidee bolo de mee danuaa ma de heohi go de gaimee ma de unu o tangada, ma de malangilangi i ana hegau alodahi e hai i lalo de laa, i denga laangi sogoisi a de Maadua gu dugu ange e mouli ai ia; deenei dono duuhanga.

¹⁹ E dahi ange mee: tangada a de Maadua gu gaavange de lava ma goloa lagolago, ma de hai gi maua e ia i de hagadanuaa i mee laa, ia gi gaavee dono duuhanga ma de malangilangi i ana hegau — de mee nei se ngadi gaavange mai i daho de Maadua.

²⁰ Gai ia e dai dee maanadu donu laangi o dono mouli, go hiidinga de Maadua gu hai gi honu dono malangilangi.