Ecclesiastes 3 - De Beebaa Dabu

E dahi donu masavaa o mee alodahi

¹ E dahi masavaa ange gi mee alodahi, gai e dahi donu masavaa ange gi mee alodahi i henua i lalo:

² e dahi masavaa e haanau ai, gai e dahi hogi masavaa e maakau ai; e dahi masavaa e doo ai manu, gai e dahi hogi masavaa e unuunusi age ai;

³ e dahi masavaa e daa ai gi maakau, gai e dahi hogi masavaa e hagaieiangi ai; e dahi masavaa e oha ai, gai e dahi hogi masavaa e hagaduu age ai;

⁴ e dahi masavaa e tangi ai, gai e dahi hogi masavaa e kada ai; e dahi masavaa e hinangalosaa ai, gai e dahi hogi masavaa e aanu ai;

⁵ e dahi masavaa e hagasii saele ai denga hadu, gai e dahi hogi masavaa e hagabudu ai denga hadu; e dahi masavaa e hagadau buuludi ai, gai e dahi hogi masavaa e tuu ai de hagadau buuludi;

⁶ e dahi masavaa e ssala ai gi gidee, gai e dahi hogi masavaa e tuu ai de ssala, e dahi masavaa e doange ai, gai e dahi hogi masavaa e tili ai;

⁷ e dahi masavaa e saesae ai, gai e dahi hogi masavaa e dui ange ai; e dahi masavaa e dee mmuu ai, gai e dahi hogi masavaa e pasa ai;

⁸ e dahi masavaa e hagadau aaloha ai, gai e dahi hogi masavaa e hagadau kino ai; e dahi masavaa e hebagi ai, gai e dahi hogi masavaa e nnoho paba ai.

⁹ Gai se aha naa a tangada e mau i ana hegau kona e hai?

¹⁰ Au gu gidee de hegau daemaha a de Maadua gu hagauda ange gi honga o dangada.

¹¹ Ia gu hai mee alodahi gi mahamaha i dono masavaa. Ia gu hai gi iloo e dangada de masavaa e dee ngado mai, aagai gilaadeu tigi maua i de tonu ange gi mee a de Maadua gu hai mai i taamada ga dae ai gi de hagaodi.

¹² Au e iloo bolo e deai ange donu se mee e danuaa ange gi dangada, gai go malangilangi ma de hai tanuaa i de masavaa olaadeu e mouli ai.

¹³ Dangada alodahi gi gaimee ma de unu aama de malangilangi i alaadeu hegau ne hagaduu ngae ga hai; de mee nei se mee ngadi gaamai i daho de Maadua.

¹⁴ Au e iloo bolo mee alodahi a de Maadua ne hai e daakodo naa donu ga hano ai; e deai donu mee e maua i de hagapuni ange aabe go de kave gee ai. Gai de Maadua ne hai gi dagodo bee nei, gi maatagu ai dangada i de ia.

¹⁵ Mee e hanu iainei gu hanu huu i mua, gai mee e loomai, gu lava donu i de hai i mua; gai de Maadua e ahe ange ma e hai mee gu hai i masavaa gu hulo.

De hagamodu dee heohi o de mouli nei

¹⁶ E dahi ange agu mee ne gidee i lalo de laa: de mommee iai de hagamodu heohi, gai iai hogi de baubau; de mommee iai de mee heohi, gai de baubau i kilaa hogi.

¹⁷ Au ne hagadaba i ogu lodo, “De Maadua e hagamodu naa muna o tangada heohi ma tangada baubau, go hiidinga e dahi masavaa ange gi mee alodahi, ma hegau alodahi.”

¹⁸ Au ne hagadaba bolo de Maadua e hagatale dagodo lodo o dangada, gi gidee ai e gilaadeu bolo gilaadeu e bei dagodo o denga manu dolodolo.

¹⁹ Gai de hagaodi o tangada ma de hagaodi o denga manu dolodolo e dagodo daudahi donu huu; gilaadeu alodahi e maakau naa. Gai se dagodo daudahi delaadeu hai e manamanava ai; tangada e dee kii ange i denga manu. Mee nei alodahi e deai donu olaadeu haigamaiana.

²⁰ Alodahi e hulo gi de mommee daudahi; alodahi ne daamada mai i de gelegele, gai e aahe ange naa hogi gi de gelegele.

²¹ Goai e iloo be de hagasaalunga o tangada e hanage gi lunga, gai de hagasaalunga o de manu e hano iho gi lo te gelegele?

²² Gai au gu gidee bolo de mee donu huu e danuaa ange gi tangada go dono malangilangi i de hai ana hegau, go hiidinga deenei dono duuhanga. Gai goai e maua i de hagaahe mai ia gi diiloo mee e hai i dua dono magau?