Ecclesiastes 12 - De Beebaa Dabu

¹ Koe gi manadua de ia ne haia goe i de masavaa oou e dama daane ai, i mua de tae mai o denga laangi hai ngadaa, ma ngadau aau e hagadaba ai, “Au e dee malangilangi i laangi laa” —

² i mua de hagagohu o de laa ma de maalama ma de maasina, aama denga heduu; i mua de aahe o denga hagausinga i dua de pala de langi;

³ ma de masavaa o de gau hagaloosi o de hale e bolebole ai, gai denga daane mmahi gu gogo gi mua; de masavaa o denga mee e maamaa ina mee e dee maua ai i de maamaa, i hiidinga gilaadeu gu sogoisi, gai gilaadeu e hagaduidui mai i lodo abaaba vaaligiligi gu dee gidee;

⁴ de masavaa o denga abaaba i de baasi ange gi de haiava gu pono; gai gu dai dee langona de maamaa mee; tangada e aala i de koo o denga manu, gai gu dai dee langona taahili o denga damaa hine;

⁵ de masavaa olaadeu gu maatagu ai i de mommee maolunga, gai denga mee hagamaatagu gu honga denga haiava; i de masavaa e aala ai hua o de almond, gai de itebuubuu gu tagi luoono vae, gai gu deai donu se lodo e hanage i ono lodo; go hiidinga tangada e hano gi dono mommee e dee ngado mai, gai de gau hinangalosaa e hulo saele i honga haiava;

⁶ i mua de modu taula selevaa, be go de maoha o de boolo goolo, ma de maoha de mee hhao vai i gaogao ssaalingaa vai, aabe go de maoha o de hagasii i gaogao de vai geli,

⁷ gai de mama o de gelegele e ahe ange naa gi de gelegele, ne daamada mai ai laa, gai de hagasaalunga e ahe gi daho de Maadua ne gaavange laa.

Muna hagamogomogo hagaodi

⁸ Tangada Agoago e hagadaba, “E deai haigamaiana! E deai haigamaiana! Mee alodahi e deai donu haigamaiana!”

⁹ Tangada Agoago e dee se heiangi donu huu, aagai ia e agoago ange hogi dangada i de iloo mee. Ia ne hagasaele ma de ssala gi donu ange ia, ma de hagamaumau ma de hagatau muna heiangi.

¹⁰ Tangada Agoago ne ssala gi gidee denga muna e danuaa ma de heohi, gai ana mee ne sisi ni muna abodonu gai e heohi.

¹¹ Muna a de gau heiangi e bei laagau a tangada hagaloosi e hagabaa ai laa ana manu, alaadeu dalaa muna gu hagabudu ma gu daohi e bei denga neele gu tugi laa ma gu makaga — ni muna nii dahi dangada hagaloosi ssiibi.

¹² Dagu dama, koe gi kana ange gi dagidiiloo denga mee laa tua o mee nei. E deai naa donu se tuu de sisi denga beebaa lagolago, gai de hagamaumau mee e hagataalea donu.

¹³ Gidaadeu gu langona mee alodahi; gai aanei muna hagaodi: koe gi madagu i de Maadua ma de daohi ana hainga; deenei donu de hegau laumalie a tangada e hai.

¹⁴ Go hiidinga de Maadua e hagamodu naa dagodo o hegau alodahi, ma mee alodahi ne hai hagammuni laa, e dee hilihili be danuaa aabe baubau.