Ecclesiastes 11 - De Beebaa Dabu

Hegau a tangada heiangi

¹ Magaa au pelaoaa gi honga tai gai koe e ahe ange naa ga gidee i dua hanu laangi lagolago.

² Duuhaa ange gai gi e dogohidu aabe e dogovalu dangada, go hiidinga koe e dee iloo be se hai ngadaa bee hee e humai gi honga de henua.

³ Noo denga hagausinga gu hagagohu age, gai de langi e pala iho naa donu gi honga de henua. Noo dahi manu somo e baguu gi ngaage aabe go ngaiho, gai e dagodo naa donu huu i tuulanga laa.

⁴ Be goai e dagidiiloo de ssau de madangi e dee doo donu dahi manu daudahi; gai be goai e daalia gi loage denga hagausinga e dee hagihagi.

⁵ Koe e dee iloo de hai o de hagasaalunga ne humai ai aabe go de hai ne hagahale ai denga ivi i lo te dinae o de hine hai dama, gai koe e dee donu ange hogi gi hegau a de Maadua, go de ia ne haia mee alodahi.

⁶ Koe gi doo ina au golee i taiao, gai koe gi dee ngadi noho i de ahiahi, go hiidinga koe e dee iloo be dee hee de mee e somo, go de mee nei aabe go de mee ange laa, aabe go luu mee nei ngaadahi e ssomo.

Manadua de ia ne haia goe

⁷ De maalama e hagamalangilangi, gai tangada e malangilangi i de tilo de maalama o de laa.

⁸ Gai ga lagolago naa donu ngadau o tangada e mouli ai, gai ia e malangilangi i ngadau alodahi. Aagai ia gi manadua bolo laangi o de gohu e lagolago naa donu. Gai mee alodahi e loomai e deai donu haigamaiana.

⁹ Tama daane, koe gi malangilangi i de masavaa oou e dama daane ai, gai oo lodo gi malangilangi i laangi oou e dama daane ai. Gai haia oo mee e lodo ai i mee alodahi aau e gidee, gai koe gi iloo bolo de Maadua e hagamodu naa oo muna i mee nei alodahi.

¹⁰ Deenei ai, haia koe gi dee manavasaa, gai doo angaanga gi deai mee e mmae ai, go hiidinga de masavaa oou e mmahi ai e deai donu ono haigamaiana.