Ecclesiastes 10 - De Beebaa Dabu

¹ Denga lango maakau e hai ga pilo de vai hagamanongi, gai de lodo senga damaa mee e daemaha ange ono dagodo i de heiangi ma de hagadubu.

² Lodo o tangada heiangi e dagi ia gi de madau, aagai lodo o tangada lodo senga e dagi ia gi de masui.

³ Gai ga seesee naa donu tangada lodo senga i honga de haiava, gai ia e senga, gai ia e hagaago ange gi dangada alodahi bolo ia se dangada senga.

⁴ Noo dahi dagi gu lili i de goe, gai koe aude dilia doo duulanga, go hiidinga de daudonu e bale de hagaheohi de haisala laumalie.

⁵ Au gu gidee dahi mee baubau i lalo de laa, go de baubau e daamada mai laa i daho dahi dagi:

⁶ denga duulanga maolunga gu gaavange gi de gau llodo ssenga, gai denga duulanga maolalo gu gaavange gi de gau lava.

⁷ Au gu gidee de gau hai hegau i honga hoosa, gai denga dagi o de henua e seesee, bei de gau hai hegau.

⁸ Be goai e gelia dahi geelinga e doo ange naa gi ono lodo, gai be goai e oohaa dahi buibui e gaadia naa i dahi labodo hagammau.

⁹ Be goai e hoda ina denga hadu e lagolagohia naa i denga hadu; gai be goai e hangahanga ina denga duudangaa laagau e hagammae ina naa i mee nei.

¹⁰ Noo de hagadaguu e madagabubu, gai de mada tigi hakaa, gai e hai gi mmahi tangada e hai hegau ai; aagai go de labagau o tangada e haia ga ssula hegau.

¹¹ Noo dahi labodo hagammau e kadi tangada i mua de hai gi dala, gai e deai donu haigamaiana ange gi tangada e haia gi dala.

¹² Muna a tangada heiangi e hai gi malangilangi dangada i de ia, aagai muna a tangada lodo senga e hhoa donu huu dono lae.

¹³ Ana muna i taamada ni muna lodo senga; gai de hagaodi o ana muna e baubau gai e bei muna a tangada senga.

¹⁴ Tangada lodo senga e lagolago ana muna e tala. E deai dangada e iloo be ni aha e hai i muli mai; gai goai e maua i de tala be ni aha e hai i dua dono magau?

¹⁵ Hegau a tangada lodo senga e hagadalea donu huu ia, ia e dee iloo de haiava e hano ai gi de aduhale.

¹⁶ E vakaa naa de henua noo dono hodooligi se gauligi, gai ono dagi e hai daonga mai i taiao.

¹⁷ E manuuia de henua noo dono hodooligi se dangada aamua abodonu, gai ono dagi e daonga i de masavaa heohi — e hagammahi ai olaadeu angaanga, e dee go de unu gi ssenga!

¹⁸ Noo tangada e vaiduu, gai laagau o de hale gu pobo, gai noo tangada e ngadi noho, gai de hale gu vava.

¹⁹ Denga gai ne hai gi kada dangada, gai denga uvaini e hai ga malangilangi tangada, aagai denga sseene e hai ga maua mee alodahi.

²⁰ Koe gi dee hagamalaia ina de hodooligi i oo lodo, aabe gi hagamalaia ina tangada lava i lo te aabi oou e seni ai; go hiidinga dahi manu lele o lo te moana e maua i de kave au muna, gai dahi manu lele e maua i de hagadele au muna e tala.