Ecclesiastes 1 - De Beebaa Dabu

Mee alodahi e deai donu haigamaiana

¹ Muna a Tangada Agoago, go tama daane a David, de hodooligi o Jerusalem.

² E hagadaba Tangada Agoago, “E deai haigamaiana! E deai haigamaiana! Mee alodahi e deai donu haigamaiana.”

³ Ni aha a tangada e mau i hegau alodahi aana e hagaduu ngae ma e hai i lalo de laa?

⁴ Dahi atangada e humai, gai dahi atangada gu hano, aagai henua i lalo e dagodo ga hano ai.

⁵ De laa e sobo age ga lava ga danu, gai e hagamoolau ga ahe gi dono mommee ne sobo age ai.

⁶ De madangi e ssau ga hano gi ngaage, ga lava ga dahuli ga hano gi ngaiho; gai de madangi e dahulihuli saele, ga lava ga ahe ange i dono haiava mau.

⁷ Denga saalingaa vai alodahi e ssali ga hulo gi tai, aagai tai e dee maua donu gi honu. De mommee o denga saalingaa vai e loomai laa, gai go kilaa hogi olaadeu e aahe ga hulo aagena.

⁸ Mee alodahi e kona donu de hagadaalea, e hai ngadaa i de tala ono dagodo. Luu ganomada e dee maua gi lava alaau mee e tilo, luu dalinga e dee maua hogi gi lava alaau mee e hagallongo.

⁹ Mee alodahi e duudagi naa donu huu bei de hai ne daamada ai, mee gu lava i de hai e aahe ange naa ga hai; e deai donu mee hoou i lalo de laa.

¹⁰ E aha, e dahi laa mee a tangada e maua i de tala ga hagataba, “Galo ange diiloo! De mee nei se mee hoou”? De mee laa gu dagodo mai huu madagidagi; gai gu dagodo huu i mua taadeu masavaa.

¹¹ Gai dangada e dee manadua donu mee gu hai madagidagi, gai dangada e loomai i muli mai e dee manadua naa hogi e dangada e loomai i olaadeu dua.

De heiangi e deai ono haigamaiana

¹² Au, Tangada Agoago, nogo noho i Jerusalem ma e hodooligi ai i Israel.

¹³ Au ne hagaduu ngae e ssala, gi donu ange au gi mee alodahi gu hai i lalo de langi. Gai se hegau hai ngadaa a de Maadua gu gaavange gi dangada gi haia.

¹⁴ Au gu gidee mee alodahi gu hai i lalo de laa; tilo, mee alodahi e deai donu olaadeu haigamaiana, gai e bei de ngadi doolohi a tangada de madangi.

¹⁵ De mee gu bigo laa e dee maua i de hagasoe, gai e dee maua i de dau mee e deai.

¹⁶ Au ne hagadaba i ogu lodo, “Tilo, au gu heiangi ange i gilaadeu ne dagi i Jerusalem i ogu mua; gai gu laumalie dogu heiangi ma dogu iloo mee.”

¹⁷ Gai au ne hai gi donu ange au gi dagodo o de heiangi ma de senga aama de lodo senga; aagai au gu iloo hogi, bolo de mee nei e bei de ngadi doolohi a dahi de madangi.

¹⁸ Gai de heiangi laumalie e hai hogi ga kona de manavasaa lodo o tangada; gai de iloo mee laumalie e hai ga kii ange de daemaha ono lodo.