Deuteronomy 33 - De Beebaa Dabu

De hagamanuuia o denga aamuli

¹ Deenei de hai a Moses, taane hai hegau o de Maadua, ne hagamanuuia ai de gau Israel, i mua dono magau.

² Ia ne hagadaba: “Tagi Maolunga ne hano iho i Sinai ga hagamaalama gilaadeu mai i Seir, gai ne hagamaalama mai hogi i de mounga go Paran. Ia ne humai madali de gau dabu e dahisemada, gai ia e poo de ahi ula i dono lima madau.

³ Ni muna abodonu, koe e aloha i oo dangada; koe e daohi oo dangada dabu alodahi i doo lima. Gilaadeu alodahi e ino i gaogao luoo vae, ma de hagallongo muna mai i oo daha.

⁴ Moses ne tala mai gi gimaadeu de hainga, gai se boolonga donu ange gi de hagabuulingaa dangada o Jacob.

⁵ Tagi Maolunga gu hodooligi i Jeshurun, i de masavaa o denga dagi o de huaadangada ma denga aamuli o Israel ne hagabuni ai.

⁶ De aamuli o Reuben gi mouli, gi dee maakau, e dee galemu donu de sogoisi ono dangada.”

⁷ Ia ne tala dagodo o Judah, ga hagadaba, “Tagi Maolunga, hagalaangona tangidangi a Judah, gaamai ia gi buni ange madali ono dangada. Luoo lima gi suuia ia gi hebagi ai gai koe balea ange ia e hebagi ange ai gi ono hagadaumee.”

⁸ Ia ne tala dagodo o Levi, ga hagadaba, “Gaavange gi Levi dau Thummim gai dau Urim gi gaavange gi doo dangada dabu. Koe ne hagatale gilaadeu i Massah gai ne hagadaumee ange gi gilaadeu i de vai go Meribah.

⁹ Ia ne hagadaba i dono damana ma dono dinana, ‘Au e dee anga ange donu gi gilaau.’ Ia ne hagangadi mee ono daina gai ne tili ana dama. Go hiidinga gilaadeu ne daudali i au muna, ma de daohi dau hagatoo donu hagaheloongoi.

¹⁰ Gilaadeu e agoago ange naa Jacob i au hagamodu; gai agoagona de gau Israel i au hainga. Gilaadeu gi haia ssigidaumaha o mee maanongi i oo mada i mua, gai gi haia sigidaumaha dudu i honga dau mommee o ssigidaumaha.

¹¹ Tagi Maolunga, hagamanuuia ina olaadeu goloa, gai malangilangi i alaadeu hegau e hai; hagadee kii ina olaadeu hagadaumee ma dangada e kino i gilaadeu, ga dae ai gi delaadeu dee aahe ange e hiihidi age.”

¹² Ia ne tala dagodo o Benjamin, ga hagadaba, “De ia o Tagi Maolunga e aloha ai gi nnoho paba; ia e duuli gilaadeu mai i taiao ga boo ai, gai gilaadeu e kage i honga luoono eu.”

¹³ Ia ne tala dagodo o Joseph, ga hagadaba, “Tagi Maolunga e hagamanuuia delaadeu henua i denga mee danuaa mai i de langi i lunga aama lalo de henua,

¹⁴ ma denga huamanu danuaa e hhua mai i hiidinga o de laa, ma mee danuaa alodahi e hhua i denga malama,

¹⁵ ma mee danuaa alodahi e hhua i honga denga mounga mai madagidagi, ma mee danuaa lagolago o denga duuduu e tuu laa ga hano ai,

¹⁶ ma hua danuaa alodahi e honu ai laa henua i lalo, ma de manuuia o de ia i lo te manu somo e ula laa. Manuuia nei alodahi e daakodo i honga de biho o Joseph, ma honga de biho o tagi i magavaa o ono daina.

¹⁷ Dono mahamaha e bei dagodo o de kaau mmahi, gai luoono hanga e mmahi bei hanga o de kaau aada. Ia e hagalagolagohia denga huaadangada i luoono hanga, ga usu gilaadeu alodahi gi de bido laa o henua i lalo. Aanei dagodo o tahisemada dangada o Ephraim; aanei hogi dagodo o tahisemada dangada o Manasseh.”

¹⁸ Ia ne tala dagodo o Zebulun, ga hagadaba, “De aamuli o Zebulun, malangilangi i doodou hulo gi daha, de aamuli o Issachar, goodou malangilangi i de nnoho i lodo oodou hale malo.

¹⁹ Gilaadeu e hagahi naa dangada gi loomai gi delaadeu mounga, gai gilaadeu ga hai ai denga sigidaumaha heohi. Gilaadeu e kave naa mee danuaa i lausedi, ma mee hagamogomogo e danumia laa i lo te gelegele.”

²⁰ Ia ne tala dagodo o Gad, ga hagadaba, “Duuhia de ia e hagalaumalie ina de henua o Gad! Gad e noho i kilaa bei de laiono, gai ia e hhagi naa dahi lima aabe go de biho.

²¹ Ia ne kave de mommee danuaa hugadoo i de henua moona; tuuhanga o tagi ne gaavange gi de ia. De masavaa ne hagabuni ai dagi o dangada, ia e hai gi bei hagatau heohi a Tagi Maolunga ma ana hagamodu heohi ange gi Israel.”

²² Ia ne tala dagodo o Dan, ga hagadaba, “Dan e bei dagodo o de laiono mmahi, e lele mai laa i Bashan.”

²³ Ia ne tala dagodo o Naphtali, ga hagadaba, “Naphtali e honu i de abodonu o Tagi Maolunga, gai e honu i de manuuia; ia e kave naa de vai i baasi ngaage.”

²⁴ Ia ne tala dagodo o Asher, ga hagadaba, “Asher e manuuia ange naa i denga aamuli ange laa, gai ono daina e hagamogomogo ia. Gai ia e hhui ono vae i lolo olive.

²⁵ Mee e hagamakaga ai oo haitoga e hai i iron ma bronze, oo mahi e duudagi naa donu huu i taulooloa doo mouli!

²⁶ Jeshurun, e deai ange donu e bei dagodo o de Maadua, ia e lele mai laa lo te langi e bale adu goe, ma de humai laa lo te langi i dono mahamaha.

²⁷ De Maadua e mouli laa ga hano ai, go doo buibui, gai luoono lima dee ngado mai laa e daohi age goe. Ia e aau gee naa doo hagadaumee i oo mada i mua, ga hagadaba, ‘Daia gilaadeu gi maakau!’

²⁸ Gai de gau Israel gu dee maatagu, gai hagadiilinga o Jacob gu nnoho paba, i de henua iai denga grain ma uvaini hoou, gai se mommee e hano iho aagena de mee suungia i de langi.

²⁹ De gau Israel, goodou gu manuuia! Goai e bei oodou dagodo, dangada a Tagi Maolunga gu hagaola? Ia e bei doodou mee hungihungi ma doodou bale aama doodou gadilaasa e kii ai. Oodou hagadaumee e maatagu naa i goodou, gai goodou e dagadagahi naa olaadeu mommee daumaha.”