Colossians 4 - De Beebaa Dabu

¹ Denga gau aamua, goodou haia gi heohi ma de soe de hai oodou e hai hegau ange ai gi oodou dangada hai hegau, go hiidinga goodou e iloo bolo e dahi donu hogi oodou Ia Aamua i de langi.

Hanu muna hagakana ange

² Goodou hagaduu ngae i talodalo, ma de dagitilo ga hagaahe ange de abodonu.

³ Goodou dalodalo hogi i gimaadeu, gai de Maadua ga dugu mai ai de masavaa danuaa e tala ai dagodo o Klisdo e dee iloo laa, deenei de hiidinga oogu gu noho ai nei i lo te hale pono.

⁴ Gai goodou dalodalo gi maua e au i de tala gi tonu danuaa ange dangada gi mee nei i de masavaa aagu e tala ai.

⁵ Goodou gi heiangi i doodou hai e ngalungaalue ange ai gi de gau tua de mee; gai gi dee moumou ina oodou masavaa gai gi hai hegau ai.

⁶ Goodou gi abodonu i oodou muna e tala i masavaa alodahi, bei dagodo o gai gu soolo ma gu mami danuaa, gai gi iloo ai e goodou de hai oodou e pasa ange gi dangada alodahi.

Hagaboo hagaodi

⁷ Tychicus e tala adu naa gi goodou ogu dagodo alodahi. Ia se daina hagamogomogo, gai se dangada hai hegau hogi e hai hegau i de muna abodonu madali au i lodo o Tagi Maolunga.

⁸ Au ne hai ia gi hanadu gi oodou daha gi iloo ai e goodou omaadeu dagodo, gai ia ga hagammahi adu ai oodou lodo.

⁹ Au ne hai hogi Onesimus gi hanadu madali ia, ia se daina hagamogomogo e hai hegau i de mee abodonu, gai se daane donu mai i oodou daha. Gai gilaau ga tala adu ai dagodo o mee alodahi gu hai i kinei.

¹⁰ Aristarchus se daane e noho i lo te hale pono madali au e gaavadu dana hagaboo gi goodou, ma Mark tangada o Barnabas. (Goodou gu lava i de iloo dagu hai gu tala adu ai ono dagodo; gai noo ia gu dae adu gi oodou daha, goodou abodonu ange gi de ia.)

¹¹ Taane go Iesu e hagaingoo ange laa hogi go Justus, e gaavadu hogi dana hagaboo gi goodou. Aanei donu huu de gau Ssuu e hai hegau ange gi de nohoanga hodooligi o de Maadua madali au gai gilaadeu gu hagaaneane donu ogu lodo.

¹² Epaphras se dangada mai i oodou daha, gai se dangada hai hegau niio Klisdo Iesu, e gaavadu hogi dana hagaboo. Ia e kona de hagammahi ma e dalodalo i goodou, gi maua e goodou i de tuu gi makaga, ma de maatua abodonu i lodo hagatau a de Maadua.

¹³ Gai au e tala hagadonu adu ono dagodo bolo ia e hagaduu ngae mmao ma e hai hegau e bale adu ai goodou aama gilaadeu i Laodicea aama Hierapolis.

¹⁴ Luke, tangada hai magi hagamogomogo e gaavadu hogi dana hagaboo gi goodou, aama Demas.

¹⁵ Dagu hagaboo ange gi denga daina i Laodicea, ma Nympha aama de nohoanga dabu e daumaha laa i dono hale.

¹⁶ Gai ga lava naa huu i doodou dau de leda nei, gai goodou gaavee hogi e dau dangada i de nohoanga dabu i Laodicea. Gai goodou gaamai hogi de leda aagu gu sisi ange gi de nohoanga dabu o Laodicea ga dau i oodou daha.

¹⁷ Gai goodou hai ange gi Archippus, “Koe gi diiloo hagalava ina tuuhanga hegau a Tagi Maolunga gu gaavadu koe gi haia.”

¹⁸ Go au donu go Paul ne siia de hagaboo nei i dogu lima donu. Goodou manadua mai au i dogu noho i lo te hale pono. De abodonu ⌊o de Maadua⌋ gi dagodo i oodou daha.