Amos 8 - De Beebaa Dabu

De gede iai huamanu lleu

¹ Gai deenei de mee a de Ia Aamua go Iahweh ne hagaago mai gi de au: tilo, au ne gidee dahi gede iai hanu huamanu lleu.

² Gai ia ne ssili mai, “Amos, se aha aau e gidee laa?” Gai au ne hai ange, “Se gede iai huamanu lleu.” Gai Tagi Maolunga ne hai mai gi de au, “De hagaodi o ogu dangada go de gau Israel gu dae mai donu. Au gu dee hagaola donu gilaadeu.

³ Denga daahili i lo te temple e hai naa gi se dangi see i de laangi laa, go de Ia Aamua go Iahweh e hagadaba. Gai e soa naa donu de gau maakau e daakodo saele. Gai gu dee hagalongaa!”

⁴ Noho mai hagalaangona, goodou e vaivai haia dangada e duasala, ma de daia gi maakau de gau hagaau aloha i de henua,

⁵ ma de hagataba, “Go aahee naa e lava ai taonga o de duu de maasina i dai, gai gimaadeu ga hulo e hagao gi daha amaadeu grain? Gai go aahee naa e ui ai Sabbath, gai gimaadeu ga hulo e hagao gi daha amaadeu wheat? Gimaadeu e hai naa gi kii mai ange de hagabaaunga o de ephah gai ga ue age de hagaoanga, ma de hagasenga dangada i demaadeu hai e hagahidi mee.

⁶ Gimaadeu e hagao naa de gau hagaau aloha i selevaa gai e hagao gilaadeu e duasala i e lua mee vae, aama de hagao hogi gi daha gili o denga grain.”

⁷ Tagi Maolunga a Jacob e tala tuhi laa gu hagatoo donu: “Ni muna abodonu, au e dee ngalo naa donu alaadeu hegau ne hai.

⁸ E aha, e dee ngalungalue naa de henua i hiidinga hegau nei, gai dangada alodahi i honga de henua e tangi naa? De henua alodahi e de hagahonu age naa bei de Nile, gai e hagahonu age naa ga lava ga ahe bei dagodo o de Nile i Egypt.”

⁹ Gai e hagadaba de Ia Aamua go Iahweh, “De laangi laa gai au e hai naa gi danu de laa i lo te madohi lua o de laangi, gai de henua e hagagohu i de masavaa goi ao ai de mee.

¹⁰ Au e sui naa oodou laangi daonga gi ni laangi niiodou e tangi ai, gai oodou daahili alodahi e sui gi ni daahili hagahinangalosaa. Au e hai naa goodou gi kahu i malo daladala, ma de dahi gi malali oodou biho. Au e hai naa goodou gi tangi bei tangada e dangi laa i hiidinga de magau o dana dama dagidahi, gai de hagaodi o de laangi laa gi bei dahi laangi mmala.

¹¹ Tilo, e tae mai naa laangi, go de Ia Aamua go Iahweh e hagadaba, aagu e hai ai gi humai de onge gi honga de henua, gai e dee go de onge i teai gai, aabe go teai vai, aagai go de onge i muna a Tagi Maolunga.

¹² Gai dangada e hagadaga saele naa i magavaa luu dai nnui laa, ma de hulo gi ngaiho ma dua; gilaadeu e saavini saele naa ga ssala muna a Tagi Maolunga, gai gilaadeu e dee gidee.

¹³ De laangi laa gai denga damaa hine mahamaha ma dama daane e ssili naa olaadeu mada i delaadeu hieunu.

¹⁴ Gilaadeu e hagatoo donu i tiinonga hagadookaa o Samaria, be go de hagataba, ‘Dan, au e hagatoo donu i de mouli o doo diinonga,’ aabe go de hagataba, ‘Au e hagatoo donu i de mouli o tiinonga o Beersheba;’ gilaadeu e maakau naa donu, gai e dee aahe ange e hiihidi age.”