Amos 6 - De Beebaa Dabu

E vakaa naa de gau duadonu i Zion

¹ E vakaa naa gilaadeu e nnoho duadonu i Zion, ma gilaadeu e nnoho paba i honga de mounga go Samaria, goodou denga daane dau o de huaahenua e maolunga i denga huaahenua, go gilaadeu o de gau Israel e hulo aagena!

² Goodou hulo diiloo i Calneh, gai loadu gi de mommee maolunga go Hamath; ma de loiho gi Gath o de gau Philistia. E aha, gilaadeu e kii ange laa i luu nohoanga hodooligi nei? Olaadeu ungaamee e nnui ange laa i oodou ungaamee?

³ Goodou gu hagangalo de laangi hai ngadaa laa, gai gu hai gi moolau mai de hagaduasala laa.

⁴ E vakaa naa gilaadeu e daakodo i honga denga moenga ivory, ma de nnoho i honga olaadeu seaa danuaa, ga gai ai kano o denga ssiibi gauligi mai i de hagabuulingaa ssiibi, aama kano o dama a denga kaau i lo te buibui manu.

⁵ Koe e tale naa denga harp bei David ma de daahili madali denga mee hagadangidangi.

⁶ Koe e unu denga uvaini i lodo boolo hoohonu, ma de hulu i lolo danuaa, aagai koe e dee daemaha naa donu i de maoha o Joseph.

⁷ Deenei ai, go goodou naa hugadoo e gaavee gi denga henua gee; gai oodou daonga e daakodo ai laa ga gaimee e tuu naa.

De lodo maolunga o Israel

⁸ De Ia Aamua go Iahweh gu hagatoo donu i dono ingoo, go Tagi Maolunga, de Maadua o denga hagabuulinga hebagi e hagadaba: “Au e kino i de hagamaolunga o Jacob, ma ono mommee buibui makaga; gai au e dugu ange naa de aduhale ma mee alodahi iai gi olaadeu hagadaumee.”

⁹ Noo e dinoangahulu daane e doe i dahi hale, gai gilaadeu alodahi e odi naa i de maakau.

¹⁰ Gai de masavaa naa huu o tangada e gaavee laa de angaanga o tangada magau e duungia, e humai ai e aaua mai denga ivi i lo te hale, gai ia e ssili ange naa gi dahi dangada i lo te hale laa, “E hanu ange naa dangada madali goe?” Gai ia gi hai ange, “Deai;” gai tangada laa gi hai ange hogi, “Aude hagalongaa! Gidaau e dee dagu de ingoo o Tagi Maolunga.”

¹¹ Gai tilo, Tagi Maolunga gu tala hagasoe, gai ia e oha donu de hale laumalie laa gi too dagidahi, gai de hale damaa mee e ssii dagaligiligi.

¹² E aha, denga hoosa e saavini laa i honga hadu? E aha, tangada e hagabalabala laa kilaa i denga kaau daane? Aagai goodou gu hai de hagamodu heohi gi se mee hagammau gai e hai denga hegau heohi gi ni mee mmala —

¹³ goodou e malangilangi laa i de hagadee kii ina o Lo Debar, ma de hagataba, “E aha, e dee go omaadeu mahi amaadeu ne hagadee kii ai Karnaim?”

¹⁴ “De gau Israel, tilo, au e hai naa gi humai dahi huaahenua gi hebagi adu gi goodou, go Tagi Maolunga, de Maadua o denga hagabuulinga hebagi e hagadaba; gai gilaadeu e hagaduasala naa goodou mai i Lebo Hamath ga hano ai gi de geelonga o Arabah.”