Amos 3 - De Beebaa Dabu

De gau tala hagadonu gi hagabaubau ina Israel

¹ De gau Israel, goodou hagalaangona muna a Tagi Maolunga e hai baasi adu ai gi goodou, ma e hai baasi ange ai gi denga huaabodu alodahi aagu ne hagassao mai i de henua go Egypt:

² “Go goodou donu huu i denga huaabodu o henua i lalo alodahi aagu gu iloo; deenei ai, au e hagaduasala naa goodou i hiidinga oodou baubau alodahi.”

³ E aha, e maua e dogolua dangada i de hagabuni e seesee ai, noo gilaau e dee hagaheloongoi?

⁴ E aha, e maua de laiono gi goo i lodo henua, noo tigi ai sana manu ne mau? E aha, e maua e de laiono i de haganngolo i lodo mee muimui, i de masavaa tigi ai ana mee ne mau?

⁵ E aha, e maua gi doo ange dahi manu lele gi lo te sele i honga de gelegele, noo tigi ai se mainu i lo te sele? E aha, e maua gi lele age ssele i honga de gelegele, noo tigi ai se manu ne lave ange aagena?

⁶ E aha, dangada e dee maatagu laa i de masavaa e ili ai de hanga manu i lo te aduhale? E aha, e maua gi dae mai de hai ngadaa gi dahi aduhale, noo e dee dugua ange e Tagi Maolunga?

⁷ Ni muna abodonu, de Ia Aamua go Iahweh e dee hai donu dahi mee daudahi noo ia e tigi hagaago ange dana hagatau gi ono dangada hai hegau go denga pelaabisi.

⁸ De laiono gu haganngolo — gai goai naa e dee madagu? De Ia Aamua go Iahweh gu basa — gai goai naa e maua i tee basa pelaabisi?

⁹ Hagailoo ina ange gi denga mommee buibui makaga o Ashdod, ma ange gi mommee buibui makaga i de henua go Egypt, hai ange, “Goodou hagabuni mai gi honga mounga o Samaria; diiloo ai de hellumi laumalie i kilaa, ma de hagaduasala gu hai i magavaa o ono dangada.”

¹⁰ “Gilaadeu e dee iloo de hai de mee heohi, go Tagi Maolunga e hagadaba. Gilaadeu e hagabudu mee alaadeu e gaiaa ma de vaivai hai ai dangada i lodo olaadeu mommee buibui makaga.”

¹¹ Deenei ai, e hagadaba de Ia Aamua go Iahweh: “Dahi hagadaumee e duuli naa luu baasi de henua ga oha oodou buibui, ma de gaiaa mee i lodo oodou mommee buibui makaga.”

¹² E hagadaba Tagi Maolunga: “De gau Israel e nnoho laa Samaria ma Damascus i honga olaadeu moenga ma olaadeu sea, e hagaola naa bei dagodo o ssiibi, a tangada hagaloosi e dada mai laa ivi o luoono vae, aabe go dahi ono dalinga i lo te ngudu o de laiono.

¹³ Goodou hagalaangona ma de tala mee nei e hai baasi ange gi de aamuli o Jacob, go de Ia Aamua go Iahweh, de Maadua o denga hagabuulinga hebagi e hagadaba.

¹⁴ De laangi aagu au e hagaduasala ai Israel i hiidinga ono haisala, gai au e oha naa denga mommee o ssigidaumaha o Bethel; gai hanga i honga de mommee o ssigidaumaha e duuduu naa ga tili gi honga de gelegele.

¹⁵ Au e oha iho naa denga hale ange gi de masavaa hagamagalili madali denga hale ange gi de masavaa mahanahana; gai denga hale e hagalaagii i ivory e oha naa, gai denga hale danuaa e odi naa hogi i de maoha,” go Tagi Maolunga e hagadaba.