Amos 2 - De Beebaa Dabu

¹ E hagadaba Tagi Maolunga: “Tolu hanonga o Moab e haisala ai, ga dae ai loo gi de haa hanonga, gai au e dee tuu naa donu dono hagaduasala. Go hiidinga gilaadeu ne dudu ga ni lehu ivi o de hodooligi o Edom.

² Deenei ai, au e gaamai naa de ahi gi duungia Moab, gai e dudu naa donu gi deai mommee buibui makaga o Kerioth. Dangada i Moab e maakau naa i de masavaa o de hebagi, ma de masavaa o dangada e hevaalogi ai aama de ili ai o de hanga manu.

³ Au e daa naa gi magau dono dagi, ma dagi alodahi o de henua madali ia,” go Tagi Maolunga e hagadaba.

De hagaduasala o Judah

⁴ E hagadaba Tagi Maolunga: “Tolu hanonga o Judah e haisala ai, ga dae ai loo gi de haa hanonga, gai au e dee tuu naa donu dono hagaduasala. Go hiidinga gilaadeu gu tili hainga a Tagi Maolunga, ma tee daohi ana mee gu hagasauaa, aagai gilaadeu ne hagasengalia i denga diinonga hadu muna, go diinonga a olaadeu dubuna ne daumaha ange laa aagena.

⁵ Au e gaamai naa de ahi e dudu ai Judah gai e dudu naa donu gi deai mommee buibui makaga o Jerusalem.”

De hagaduasala o Israel

⁶ E hagadaba Tagi Maolunga: “Tolu hanonga o Israel e haisala ai, ga dae ai loo gi de haa hanonga, gai au e dee tuu naa donu dono hagaduasala; go hiidinga gilaadeu ne hagahesuihagi gilaadeu e heohi i denga selevaa, ma de gaavange de gau hagaau aloha e hagao ai olaadeu mee vae.

⁷ Gilaadeu ne dagadagahi biho o de gau hagaau aloha, gi lo te gelegele, gai tee hagamodu muna o dangada e duasala i de heohi. Dahi daane ma dono damana e dagodo haisala ma dahi hahine daudahi, gai gilaadeu ga hagangadi mee ai dogu ingoo dabu.

⁸ Gilaadeu ne hhola alaadeu malo ne kave e hagadonu ai de hagao muli a dangada, ga daakodo ai i gaogao mommee o ssigidaumaha. Gilaadeu e unu uvaini a dangada ne hagao ai alaadeu muli, i lo te hale o delaadeu maadua.

⁹ Aagai au ne daa ga maakau de gau Amor i olaadeu mada i mua, e dee galemu donu gilaadeu e lloa bei denga cedar, gai e mmahi bei denga oak. Au ne oha hua i honga olaadeu laa ma olaadeu aga i lo te gelegele.

¹⁰ Au ne hagassao mai goodou i de henua go Egypt, ga dagi mai goodou laa lodo henua i e madahaa ngadau, gai au ga gaavadu ai gi goodou de henua o de gau Amor.

¹¹ Au ne hai hogi hanu oodou dama daane gi ni pelaabisi, gai hanu ni Nazirite i magavaa oodou dama daane. De gau Israel, e aha, e dee se muna abodonu deenei? go Tagi Maolunga e hagadaba.

¹² Aagai goodou ne hai denga Nazirite gi unumia uvaini, ma de tala ange gi denga pelaabisi, ga hai ange, ‘Goodou aude pasa pelaabisi.’

¹³ Tilo, au e baalasi naa goe gi baa gi lalo, bei de hada gu daemaha laa i denga noodangaa grain.

¹⁴ Taane gemo e dee maua naa donu gi ola, taane mmahi e dee maua naa donu i de hagammahi ia, taane hebagi dau e dee maua naa hogi i de hagaola dono mouli.

¹⁵ Taane e dilia mee hholu e dee maua naa donu i de duu gi makaga, gai taane hebagi e dee maua naa hogi i de hagamoolau e hano, taane e gage i honga de hoosa e dee maua hogi i de hagaola dono mouli.

¹⁶ Gai taane lo taane i magavaa o denga daane mmahi e savini naa ga hano ma de gilisau i de laangi laa,” go Tagi Maolunga e hagadaba.