Acts 9 - De Beebaa Dabu

De dahuli lodo o Saul

¹ Aagai a Saul goi duudagi huu de hagamaatagu ma de daa gi maakau gilaadeu e hagadonusia Tagi Maolunga. Gai ia ne hano gi daho tangada haimeedabu maolunga,

² ga dangidangi ange i hanu leda e hagasauaa ai dono hano gi denga synagogue i Damascus, gi maua ai e ia i de noonooa denga daane ma haahine noo ia e gidee hanu gu dau ange gi de Haiava, gai ia ga gaamai ai gilaadeu gi Jerusalem.

³ Gai dono masavaa huu ne hano ai ga dai baa ange gi Damascus, gai gu hano iho dahi maalama i de langi ga hagamaalama dono mommee iai laa.

⁴ Gai ia gu doo iho gi honga de gelegele, gai ia gu langona dahi leo e hai ange gi de ia, “Saul, Saul, gu aha goe gu vaivai hai ai nei au?”

⁵ Gai a Paul ne ssili ange, “Tagi Maolunga, go koe goai?” Iesu ne hai ange, “Go au donu go Iesu aau e vaivai hai naa.

⁶ Hidi age hannoo gi de aduhale, gai ga tala adu ai gi de goe au mee e hai.”

⁷ Gai denga daane ne hulo laa madali ia gu tuu ga dee mmuu, gilaadeu ne langona de leo e basa laa, aagai tee gidee e gilaadeu dahi dangada.

⁸ Gai a Saul ne hidi age i honga de gelegele ga aala luoono mada, gai ia gu dee gidee dahi mee. Deelaa ai, denga daane madali ia ne dagi ia ga kave gi Damascus.

⁹ Gai ne dolu ono laangi tee gide ai, ia tee gaimee hogi aabe ne unu.

¹⁰ Aagai e dahi daane gu hagadonusia laa e noho i Damascus, dono ingoo go Ananias. Gai Tagi Maolunga ne hai ange gi de ia i de midi hagaago ange, “Ananias!” Gai ia ga hai ange, “Tagi Maolunga, deenei au.”

¹¹ Gai Tagi Maolunga ga hai ange gi de ia, “Hidi age hannoo i de haiava e hagaingoo ange laa go de Haiava Soe, gai koe ga hano gi de hale o Judas ga ssili be i hee taane mai i Tarsus dono ingoo laa go Saul; ia e noho ma e dalodalo.

¹² Gai ia gu gidee i de midi hagaago ange, bolo taane dono ingoo laa go Ananias ne humai ga dugu ange luoono lima gi ono elunga gi gide ai ia.”

¹³ Gai Ananias ga hai ange, “Tagi Maolunga, au gu langona longo o taane naa mai i daho dangada soa, bolo gu kona dana vaivai hai oo dangada dabu i Jerusalem.

¹⁴ Gai ia gu kave hogi ssauaa mai i daho de gau haimeedabu maolunga e noonooa ai dangada alodahi e hagahia doo ingoo.”

¹⁵ Aagai Tagi Maolunga ne hai ange gi de ia, “Hannoo, ia se daane hai hegau niiagu gu hili gi hagaagona ange au gi denga Gentile, ma denga hodooligi aama de gau Israel;

¹⁶ gai au e hagaago ange naa gi de ia de lagolago mee oona e hagaduasala ai i hiidinga dogu ingoo.”

¹⁷ Aagai Ananias ne hano ga ulu i de hale laa ga dugu ange luoono lima gi honga o Saul, ga hai ange, “Dogu daina go Saul, Tagi Maolunga, go Iesu ne hakide adu laa gi de goe i honga de haiava, ia ne hai au gi humai gi gide ai goe ma de hhao gi honu i de Hagasaalunga Dabu.”

¹⁸ De masavaa laa donu huu gai gu too mai hanu mee be ni unahi mamu i lodo luu ganomada o Saul, gai ia gu ahe ange ga gide. Aagai ia ga hidi age gai ia gu babudaisi,

¹⁹ gai ga bosu huu ia i de gaimee gai ia gu mmahi age. Aagai Saul ne noho i hanu laangi i daho dangada gu hagadonusia laa i Damascus.

De agoago o Saul i Damascus

²⁰ Gai ia ne moolau donu de daamada de agoago i dagodo o Iesu i denga synagogue ga tala bolo Iesu go Tama Daane donu a de Maadua.

²¹ Gai gilaadeu alodahi ne langona laa ana muna gu llele mouli ga ssili, “E dee deenei taane nogo vaivai haia laa dangada e hagahia de ingoo o Iesu i Jerusalem? Gai ia tee humai nei hogi gi kinei e noonooa ai dangada, e kave gi dagi o de gau haimeedabu?”

²² Aagai a Saul gu hagadaga ange donu de mmahi, i de tala hagadonu bolo Iesu go de Klisdo, ma de hai ga dee mmuu de gau Ssuu e nnoho laa i Damascus.

²³ Aagai dua hanu huu laangi lagolago, gai de gau Ssuu gu nnoho e daa ia gi magau.

²⁴ Aagai a Saul gu iloo e ia delaadeu nnoho e daa ia gi magau. Gai de gau Ssuu gu dagitilo denga haitoga o de aduhale, i de laangi ma de boo e daa ai ia gi magau.

²⁵ Aagai ana dangada agoago ga kave ia i de boo ga hagasege iho i lo te gede, i dahi mommee masaavava i de buibui o de aduhale.

Saul i Jerusalem

²⁶ Gai de masavaa huu oona ne hano ai ga dae gi Jerusalem, gai ia ga hagatale de hagabuni ange gi denga dangada agoago i kilaa, aagai gilaadeu alodahi gu maatagu i de ia, i hiidinga gilaadeu e dee hagadonusia bolo ia gu se agoago bei olaadeu dagodo.

²⁷ Aagai Barnabas ga kave ia gi daho de gau tala, ga tala ange gi gilaadeu dagodo de hakide ange o Tagi Maolunga gi a Saul, i honga de haiava ga basa ange gi de ia, aama dagodo de lo taane o Saul i de agoago i de ingoo o Iesu i Damascus.

²⁸ Gai a Saul ga noho i olaadeu daha ma de hano saele madali gilaadeu i Jerusalem, gai ia ne lo taane i de agoago i de ingoo o Tagi Maolunga.

²⁹ Ia ne agoago ma de hagadaumee ange gi de gau Ssuu e pasa Greek laa; deelaa ai, gilaadeu gu nnoho e daa ia gi magau.

³⁰ Gai ga iloo huu e denga daina i kilaa, gai gilaadeu ga kave ia gi Caesarea, ga hai ia gi hano gi Tarsus.

³¹ Aagai denga nohoanga dabu alodahi i Judea ma Galilee aama Samaria gu nnoho paba ma de hagadagadaga age. Gilaadeu gu hai hegau i de madagu i Tagi Maolunga ma de hagaaneane i daho de Hagasaalunga Dabu, gai gilaadeu gu hagadaga ange donu de soa.

Peter i Lydda

³² Gai Peter ne hano ga hagadaga i mommee alodahi, gai ia ne dae hogi gi daho dangada o de Maadua e nnoho laa i Lydda.

³³ Gai ga dae huu ia gi kilaa, aagai ia gu hedae ange gi taane e hagaingoo ange laa go Aeneas, ia se daane balagelage gu magi i e valu ngadau.

³⁴ Gai Peter ga hai ange gi de ia, “Aeneas, Iesu Klisdo e hagaieiangi goe, hidi age heedua doo moenga.” Gai taane laa gu hidi age i de masavaa laa donu huu.

³⁵ Gai dangada alodahi e nnoho laa i Lydda ma Sharon gu gidee dagodo o ana hegau, gai gilaadeu gu daahuli ga daudali ange i Tagi Maolunga.

De hagamouli age o Dorcas

³⁶ Gai e dahi hahine gu hagadonusia e noho i Joppa, dono ingoo go Tabitha, e bei Dorcas i muna Greek. De hine laa ne lagolago ana hegau danuaa ne hai ma de abodonu ange gi de gau hagaau aloha.

³⁷ Ia ne magi ga magau i laangi laa, gai dangada ga hakaugau ia ga hagadagodo i de aabi i lunga.

³⁸ Gai Lydda se mommee e baa ange gi Joppa, gai gilaadeu gu hagadonusia e nnoho laa i kilaa gu langona bolo Peter e noho i Lydda, gai gilaadeu ga hai gi hulo e dogolua daane gi dangidangi ange gi hai ange, “Aude haihaia, hagamoolau humai gi omaadeu daha.”

³⁹ Gai Peter ga hidi age ga hano madali luu daane laa. Gai ga dae huu ia gi kilaa, gai gilaadeu ga kave ia gi de aabi i lunga. Gai denga haahine gu maakau olaadeu bodu ne tuu ma e tangi i ono gaogao, ma de hagaago ange gi de ia denga malo lloa ma malo ange laa, a Dorcas ne hai i de masavaa oona goi mouli ai.

⁴⁰ Aagai Peter ga hai gilaadeu alodahi gi ssao gi duaahaho, gai ia ga duuduli ga dalodalo, gai ia ga huli ange gi de angaanga, ga hai ange, “Tabitha, hidi age.” Aagai de hine laa gu aala luoono mada, gai de masavaa huu aana ne gidee ai Peter gai ia ga noho age gi lunga.

⁴¹ Gai Peter ga poo dono lima ga hagahidi age ia gi duu gi lunga. Gai ia ga hagahi dangada o de Maadua, ma denga haahine gu maakau olaadeu bodu, ga gaavange de hine laa gi gilaadeu, ia gu mouli.

⁴² Gai longo o mee nei gu dele i Joppa alodahi, gai gu soa hogi dangada ne hagadonusia Tagi Maolunga i kilaa.

⁴³ Gai Peter ne noho i Joppa i daho Simon taane hai gili manu i hanu laangi lagolago.