Acts 8 - De Beebaa Dabu

De vaivai hai a Saul de nohoanga dabu

¹ Gai a Saul ne buni ange donu gi de magau o Stephen. Gai go de laangi laa ne daamada ai de vaivai haia o de nohoanga dabu i Jerusalem. Gai dangada alodahi gu mavaevae saele gi denga mommee i Judea ma Samaria, go de gau tala donu huu e doe.

² Gai gilaadeu gu hagadonusia laa ne kave de angaanga o Stephen ga danu ma de tangi i de ia.

³ Gai a Saul ne daamada de oha de nohoanga dabu. Ia ne hagadaga i hale alodahi ga dada mai denga daane ma haahine ga tili ange gi lo te hale pono.

De agoago o de longo danuaa i Samaria

⁴ Gai dangada ne mavaevae saele laa ne hulo ga agoago muna a de Maadua.

⁵ A Philip ne hano gi de aduhale go Samaria ga agoago ange ai dangada i dagodo o Klisdo.

⁶ Gai dangada soa ne kana ange ga hagallongo mee a Philip ne agoago ange ai gilaadeu, i de masavaa alaadeu ne langona ai ma de gidee sauaa aana e hai.

⁷ Gai denga hagasaalunga baubau ne oo ma de ssao ga hulo gee mai i daho dangada soa; ne soa hogi de gau balagelage ma de gau baagia ne ieiangi.

⁸ Deelaa ai, dangada i de aduhale laa gu malangilangi mmao.

⁹ Gai e dahi daane i kilaa, dono ingoo go Simon, ia se daane e haia huuhuaa mee i de aduhale laa mai i mua, ma de hai ga llele mouli o dangada i Samaria. Ia gu tala hogi bolo ia se daane maolunga.

¹⁰ Gai de gau maolalo ma gilaadeu e maolunga alodahi gu kana ange ga hagallongo ana muna, ma de hagataba, “Taane nei go ssauaa donu o de Maadua e hagabinga laa bolo e Maolunga.”

¹¹ Gai gilaadeu ne daudali ange i de ia go hiidinga ia ne kave olaadeu lodo i ana huuhuaa mee i dahi masavaa daulooloa.

¹² Gai de masavaa huu a dangada ne hagadonu ai agoago a Philip, i dana tala de longo danuaa o de nohoanga hodooligi o de Maadua, ma de ingoo o Iesu Klisdo, aagai denga daane ma haahine gu babudaisi.

¹³ Taane go Simon gu hagadonusia hogi; gai ia gu babudaisi, muli mai gai ia gu hano saele madali a Philip. Gai ia ne lele hogi ono mouli i dana gide denga sauaa ma mee hagalele mouli gu hai laa.

¹⁴ Gai de masavaa huu a de gau tala i Jerusalem ne langona ai bolo Samaria gu kave hogi muna a de Maadua, gai gilaadeu ga hai Peter ma John gi hulo gi kilaa.

¹⁵ Gai ga tae huu gilaau gi kilaa, gai gilaau ga dalodalo gi maua hogi e gilaadeu i de kave de Hagasaalunga Dabu,

¹⁶ go hiidinga de Hagasaalunga Dabu tigi hano iho gi honga o dahi i olaadeu magavaa. Aagai gilaadeu ne babudaisi donu huu i de ingoo o Tagi Maolunga go Iesu.

¹⁷ Gai de masavaa huu a Peter ma John ne dugu ange ai olaau lima gi olaadeu elunga, gai gilaadeu gu kave hogi de Hagasaalunga Dabu.

¹⁸ De masavaa a Simon ne gidee ai bolo dangada gu kave de Hagasaalunga ⌊Dabu⌋, i de dugu ange lima o luu daane tala laa gi olaadeu elunga, aagai ia ga gaavange hanu sseene gi gilaau,

¹⁹ ga hai ange, “Gaamai hogi ssauaa naa gi de au, gai be goai naa huu aagu e dugu ange dogu lima gi ono elunga, gai ia e kave hogi de Hagasaalunga Dabu.”

²⁰ Aagai Peter ga hai ange gi de ia, “Koe gi magau madali au sseene naa, go hiidinga koe e maanadu bolo koe e maua i de hagao de mee ngadi gaavange a de Maadua i sseene!

²¹ E deai donu sau diba aabe se duuhanga daudahi mai i mee nei, go hiidinga oo lodo e dee heohi i mada luu mada o de Maadua.

²² Deenei ai, koe gi dahuli oo lodo ma gi hano gee mai i oo baubau, ga dalodalo ange gi Tagi Maolunga, kana adu ia e degi adu gi maanadu dee heohi i oo lodo naa.

²³ Au e iloo bolo oo lodo e honu i de magiaa, ma de noodia i de baubau.”

²⁴ Gai Simon ga hai ange gi Peter, “Dalodalo ange gi Tagi Maolunga i ogu hiidinga gi dee tuu mai ai gi de au mee aau gu tala naa.”

²⁵ Gai ga lava huu i delaau agoago ma de tala muna a Tagi Maolunga i kilaa, gai Peter ma John ga aahe gi Jerusalem, ga agoago de longo danuaa i denga aduhale lagolago o Samaria ga hulo ai.

Philip ma de eunuch mai i Ethiopia

²⁶ Gai tangada de langi o Tagi Maolunga ne basa ange hogi gi a Philip, ga hai ange, “Hidi age hannoo gi de baasi i ngaage, gi de haiava i lodo henua e humai laa i Jerusalem ma e hano gi Gaza.”

²⁷ Gai a Philip ga hano gu gidee e ia dahi daane Ethiopia, ia se eunuch, gai se daane hai hegau maolunga niio de hine hodooligi o Ethiopia go Candace, go ia e diiloo ange sseene a de hine laa. Gai ia ne hano gi Jerusalem ga daumaha ai,

²⁸ gai gu ahe mai hogi; gai ia e noho i honga dono hada ma e dau ai de beebaa a de pelaabisi go Isaiah.

²⁹ Gai de Hagasaalunga ⌊Dabu⌋ ne hai ange gi a Philip, “Hannoo gi baa ange goe gi de hada laa.”

³⁰ Gai a Philip ga savini ga hano gi baa ange ia gi de hada laa, gai ia gu langona taane laa e dau de beebaa a de pelaabisi go Isaiah. Gai a Philip ga ssili ange gi de ia, “Koe e donu ange naa gi au mee e dau naa?”

³¹ Taane laa ga hai ange gi de ia, “Dee hee dagu hai e donu ange ai, gai e deai donu se dangada e hagadonu ina mai mee nei gi de au?” Gai taane laa ga hai ange gi a Philip, ia gi gage age gi ono daha.

³² Gai de mommee a taane laa nogo dau i de Beebaa Dabu deenei: “Ia e bei dagodo o ssiibi e dagi laa e kave e daa gi magau, ma ssiibi e dee dangi laa i de masavaa e duuduu ai ono huluhulu, gai ia e dee hhanga donu dono ngudu.

³³ Ia ne hagangadi mee ina, gai tee hagamodu ono muna i de heohi. Gai goai e maua i de tala dagodo o dono aamuli? Go hiidinga dono mouli gu kave gee mai i henua i lalo.”

³⁴ Gai de eunuch laa ne ssili ange gi a Philip, “Daalaa mai be goai o de pelaabisi e basa ai nei. Ia e basa nei donu huu i de ia, aabe go dahi dangada gee?”

³⁵ Gai a Philip ga daamada i de mommee aana ne dau laa, ga agoago ange ia i de longo danuaa o Iesu.

³⁶ Gai ga hulo huu gilaau ga tae gi gaogao dahi vai, gai de eunuch ga hai ange, “Tilo, deenei dahi vai! Gai se aha e buibuia dogu babudaisi?” [

³⁷ Philip ne hai ange gi de ia, “Noo koe e hagadonusia i oo lodo alodahi, gai koe e maua donu.” Gai de eunuch ga hai ange, “Au e hagadonusia bolo Iesu Klisdo go Tama Daane a de Maadua.”]

³⁸ Gai de eunuch ga haganoho de hada, gai a Philip ma de eunuch ga iho ga hulo gi lo te vai, gai a Philip ga babudaisi ia.

³⁹ De masavaa olaau ne ea age ai i lo te vai, gai de Hagasaalunga o Tagi Maolunga ga kave gee a Philip, gai de eunuch laa gu dee gidee e ia a Philip. Gai ia ga hagasoe ga hano i dono haiava gu malangilangi mmao.

⁴⁰ Aagai a Philip gu dae gi Azotus, gai ia ga hagadaga i denga aduhale alodahi ga agoago ai de longo danuaa, ga dae ai loo gi Caesarea.