Acts 7 - De Beebaa Dabu

Muna a Stephen

¹ Gai tangada haimeedabu maolunga ne ssili ange gi Stephen, “Ni muna abodonu mee nei?”

² Stephen ne hai ange, “Denga daina, ma damana, goodou hagalaangona agu muna. De Maadua o de mahamaha ne hakide ange gi taadeu dubuna madagidagi go Abraham, i dono masavaa goi noho ai i Mesopotamia, i mua dono hano ga noho i Haran,

³ ga hai ange gi de ia, ‘Hano gee mai i doo henua, ma mai i daho oo dangada ma gi hannoo gi de henua aagu e hagaago adu gi de goe.’

⁴ Gai ia ne hano gee mai i de henua o de gau Chaldea ga hano ga noho i Haran. Gai dua huu de magau o dono damana, gai de Maadua ga hai ia gi hano gee i de henua laa, gi humai gi de henua oodou e nnoho ai nei iainei.

⁵ Gai de Maadua tee bolo ange gi de ia dahi damaa mommee e duu ange dono vae aagena. Aagai ne hagatoo donu ange bolo gilaadeu ma dono hagadiilinga e loomai laa i ono dua e kave naa i de henua nei, e dee galemu donu tigi ai sana dama i de masavaa laa.

⁶ Gai de Maadua ne hai ange gi Abraham, ‘Doo aamuli e hulo naa ga nnoho i dahi henua gee i e 400 ngadau, gai de gau de henua laa e hagahai hegau naa ma de vaivai gilaadeu.

⁷ Gai au e hagaduasala naa de huaahenua ne hagahai hegau ina gilaadeu, aagai dua naa huu mee nei, gai gilaadeu gu ssao ga hulo gee mai i de henua laa ga aahe mai ga daumaha mai gi de au i de mommee nei.’

⁸ De Maadua ne gaavange gi Abraham de hagatoo donu hagaheloongoi o de tuu dagaholiage. Gai Abraham ne hagadili Isaac, gai ne tuu dagaholiage ia i dua de hagavalu laangi; Isaac ne hagadili Jacob, gai Jacob ne hagadili odaadeu dubuna hagadubu e dinoangahulu ma dogolua.

⁹ Aagai odaadeu dubuna hagadubu ne hagao Joseph gi gaavee gi Egypt, i hiidinga delaadeu magiaa. Aagai de Maadua ne noho i ono daha,

¹⁰ ga hagaola ia mai i ono hai ngadaa alodahi, ma de gaavange de abodonu ma de heiangi i mada i mua o de hodooligi o Egypt go Pharaoh, gai de hodooligi ne hai ia go de goobenaa o Egypt alodahi aama de huahua i mee i dono hale alodahi.

¹¹ De masavaa laa gai ne humai de onge gi honga Egypt alodahi aama Canaan, gai gu kona mmao de duasala o dangada, gai odaadeu dubuna madagidagi gu deai donu alaadeu gai e gide.

¹² Gai ga langona huu e Jacob bolo e hanu grain i Egypt, gai ia ga hai odaadeu dubuna madagidagi gi hulo i tahi hanonga.

¹³ Gai de lua hanonga huu olaadeu ne hulo ai, gai Joseph ga tala ange gi ono daina bolo ia go delaadeu daina daane, gai Pharaoh gu hedae ange hogi gi de huaabodu o Joseph.

¹⁴ Aagai Joseph ne hai gilaadeu gi hulo gi hagahia dono damana go Jacob ma ono dangada alodahi; se dinohidu ma dogolima gilaadeu alodahi;

¹⁵ gai Jacob ne hano gi Egypt. Gai ia gu magau, go ia madali odaadeu dubuna madagidagi.

¹⁶ Gai olaadeu angaanga ne hagaahe ga danu i Shechem, go de mommee iai denga daanunga a Abraham ne hagao i hanu selevaa i daho denga dama a Hamor i Shechem.

¹⁷ Gai ga dae mai huu de masavaa e hagasula ai de hagatoo donu a de Maadua ange gi Abraham, gai gilaadeu ga hagadili gu soa mmao i Egypt.

¹⁸ Gai gu sula age dahi hodooligi e dee iloo laa e ia Joseph, ga dagi Egypt.

¹⁹ Gai ia ga vaivai hai odaadeu dubuna, ga hai gilaadeu gi dilia alaadeu gaagaa gi maakau ai gilaadeu.

²⁰ Deenei de masavaa o Moses ne haanau ai. Gai ia se gaagaa mahamaha i mada luu mada o de Maadua. Gai ia ne haele age i de hale o dono damana i e dolu malama.

²¹ Gai dono masavaa ne tili gee ai, gai tamaa hine a Pharaoh ga kave ia ga haele e hai ai dana dama donu.

²² Gai Moses ne agoago i de heiangi alodahi o de gau Egypt, gai ana muna ma ana hegau e mmahi mmao.

²³ Gai ga madahaa huu ono ngadau, gai ia gu lodo e hano gi daho ono dangada, go de gau Israel.

²⁴ Gai ia ne gidee dahi gilaadeu gu vaivai haia, gai ia ga bale ange ia ga daa ai taane Egypt e vaivai haia laa ia gu magau.

²⁵ Gai ia ne maanadu bolo ono daina e tonu ange bolo go ia a de Maadua ne gaamai gi hagaola ina gilaadeu, aagai gilaadeu tee tonu ange gi de mee nei.

²⁶ De laangi i dua mee nei, gai ia ne hano hogi gi olaadeu daha, gai ia gu gidee e dogolua daane Israel e hagadaumee, gai ia ne hagatale de hagadanuaa olaau magavaa, ia ne hai ange gi gilaau, ‘Luu daane nei, gooluu ni hai daina, gai gu aha gooluu gu hebagi ai naa?’

²⁷ Gai taane ne haia ange laa de baubau gi dono soa ne hai ange gi Moses, ‘Goai ne hagasula ina goe go demaadeu dagi aabe go tangada e hagamodu ina omaadeu muna?

²⁸ Koe ga daa naa hogi au gi magau, bei dau hai ne daa ai laa dahi daane Egypt anaahi?’

²⁹ Gai Moses gu madagu ga savini ga hano ga noho i de henua o de gau Midian, go kilaa aana ne hagadili ai luaana dama daane.

³⁰ Dua huu e madahaa ngadau, gai tangada de langi gu hakide ange gi de ia, i de vao o de mounga go Sinai, i lo te manu somo e ula.

³¹ Gai de masavaa huu a Moses ne gidee ai de mee nei, aagai ia gu lele mouli, gai ia ga hano gi baa ange ia e tilo, aagai ia gu langona de leo o Tagi Maolunga e hai ange,

³² ‘Go au de Maadua o oo dubuna madagidagi, go de Maadua o Abraham, ma Isaac, aama Jacob.’ Gai Moses gu bolebole ma de madagu, ia gu dee maua i de galo ange e tilo de mee laa.

³³ Gai Tagi Maolunga ga hai ange gi de ia, ‘Aaua oo mee vae, go hiidinga doo mommee e duu ai naa se gelegele dabu.

³⁴ Au gu gidee de duasala o ogu dangada i Egypt, au gu langona delaadeu tangi, gai au gu hano iho e hagaola gilaadeu. Humai, gai au ga hai goe gi ahe gi Egypt!’

³⁵ Deenei taane go Moses olaadeu ne kino ai laa, ga hai ange, ‘Goai ne haia goe go demaadeu dagi be go tangada e hagamodu ina omaadeu muna?’, deenei taane a de Maadua ne hai gi hano gi dagina ma de hagaola gilaadeu, i ssauaa o tangada de langi ne hakide ange laa gi de ia i lo te manu somo e ula laa.

³⁶ Go ia ne hagassao ina mai de gau Israel, i dua dana hai denga mee hagalele mouli ma hagailonga i Egypt, ma gaogao Tai Mmea, aama de vao i e madahaa ngadau.

³⁷ Deenei de Moses ne hai ange laa gi de gau Israel, ‘De Maadua e hagasula age naa dahi pelaabisi moodou bei ogu dagodo.’

³⁸ Deenei de ia ne hano laa madali de hagabuulingaa dangada o Israel i de vao, madali tangada de langi ne basa ange laa gi de ia i de mounga go Sinai, madali odaadeu dubuna madagidagi. Gai go ia ne gaavee muna o de mouli ga gaamai gi gidaadeu.

³⁹ Aagai odaadeu dubuna madagidagi tee llodo e hagallongo ange gi de ia, gilaadeu ne hagangadi mee ia, ma de maanadu i olaadeu lodo de aahe gi Egypt.

⁴⁰ Gilaadeu ne hai ange gi Aaron, ‘Haia hanu diinonga gi dagina gidaadeu; gidaadeu e dee iloo donu be ni aha gu hai ange gi taane go Moses, ne dagina mai laa gidaadeu i de henua go Egypt.’

⁴¹ Gai gilaadeu ne hai dahi diinonga ga hagadulagi ange gi dahi kaau gauligi i laangi laa, ga sigidaumaha ange gi tiinonga laa ma de malangilangi i de kaau alaadeu gu hagaduu laa.

⁴² Aagai de Maadua ne dugu ange gilaadeu gi daumaha ange gi mee o de langi, bei de hai gu sisi ai laa i lodo beebaa a denga pelaabisi e hai ange: ‘Dangada o Israel, goodou ne gaamai laa donu gi de au denga manu maakau ma sigidaumaha i de vao i e madahaa ngadau?

⁴³ E deai, gai goodou ne hagauda de hale malo o Molek, ma de heduu o tiinonga go Rephan, go diinonga oodou ne hai laa ga daumaha ange aagena. Deenei ai, au e hai naa gi gaavee goodou gi mommee e mmao ange i Babylon.’

⁴⁴ Odaadeu dubuna madagidagi ne kave de hale malo o de hagatoo donu hagaheloongoi i de vao. Gai ne hai bei de hai a de Maadua ne tala ange ai laa gi Moses, gai ia ne hai gi bei de ada aana ne gidee laa.

⁴⁵ Gai odaadeu dubuna madagidagi ne gaamai de hale malo gi de henua nei madali Joshua, i de masavaa alaadeu ne hagadee kii ai denga huaahenua a de Maadua ne hai gi hulo gee mai i olaadeu mada i mua. Deenei ai, gu dagodo ga dae mai ai gi de masavaa o David,

⁴⁶ gai de Maadua ne malangilangi i de ia, i dana dangidangi ange bolo ia ga hagaduu dahi mommee noho moo de Maadua o Jacob.

⁴⁷ Aagai go Solomon ne hagaduulia de hale o de Maadua.

⁴⁸ Gai de Ia Maolunga Mmao laa e dee noho i hale a dangada e hagatuu, bei de hai a de pelaabisi gu tala ai laa,

⁴⁹ ‘De langi go dogu nohoanga, gai henua i lalo go de mommee e dugu ange aagena luoogu vae. Gai se hale bee hee oodou e hagaduu e noho ai au? go Tagi Maolunga e hagadaba, aabe go hee iai dogu mommee e hagamabu ai?

⁵⁰ E dee go au ne haia mee nei alodahi?’

⁵¹ Goodou ni dangada e makaga oodou lodo! Oodou lodo e makaga gai oodou dalinga e longoduli. Gai goodou e hai baasi ange donu gi de Hagasaalunga Dabu i masavaa alodahi; goodou e bei donu oodou dubuna madagidagi!

⁵² Gai goai denga pelaabisi a oodou dubuna madagidagi tee vaivai hai? Gilaadeu ne daa ga maakau dangada ne daalaa dagodo de humai o de Ia Heohi laa, go de ia oodou gu gaavange laa ma de daa ga magau —

⁵³ de hainga ne gaavadu gi goodou i daho de gau de langi, gai goodou tee daudali ai!”

De maga o Stephen i denga hadu

⁵⁴ De masavaa huu alaadeu ne langona ai muna nei, gai gilaadeu gu kona donu de llili, ga kadi ange olaadeu gauvae gi de ia.

⁵⁵ Aagai Stephen gu honu i de Hagasaalunga Dabu, ga galo age gi de langi gu gidee e ia de mahamaha o de Maadua, gai Iesu e duu i de baasi madau o de Maadua;

⁵⁶ gai ia ga hagadaba, “Tilo, au e gidee de langi gu mahuge, gai Tama a Tangada e duu i de baasi madau o de Maadua.”

⁵⁷ Aagai dangada ga hevaalogi ma de pono olaadeu dalinga ga saavini mai ga poo ia.

⁵⁸ Gai gilaadeu ga kave ia gi tua de aduhale ga maga ia gu magau i denga hadu. Gai de gau hagadonu ne dugu olaadeu malo i gaogao luu vae o dahi dama daane, dono ingoo laa go Saul.

⁵⁹ Gai de masavaa alaadeu e maga ai Stephen, gai ia ne dalodalo ga hai ange, “Tagi Maolunga go Iesu, gaavee dogu hagasaalunga.”

⁶⁰ Gai Stephen ga duuduli ga basa i de leo mmahi ga hagadaba, “Tagi Maolunga, koe gi dee dau ina ange sala nei gi gilaadeu.” Gai ga lava huu i dana tala muna nei, gai ia gu magau.