Acts 6 - De Beebaa Dabu

De hili o gau bale e dogohidu

¹ Gai de masavaa huu ne kii ange ai de soa dangada gu hagadonusia, gai denga daina e pasa Greek laa ne nnanu i denga daina e pasa Hebrew laa, i hiidinga gilaadeu e dee tilo danuaa ange alaadeu haahine gu maakau olaadeu bodu i de masavaa e duha ai gai i laangi alodahi.

² Gai tinoangahulu ma dogolua ga hagahi dangada alodahi gu hagadonusia, ga hai ange, “E dee heohi demaadeu dugu muna a de Maadua, gai gimaadeu ga duha denga gai.

³ Deenei ai, denga daina, goodou hilihilia e dogohidu daane i oodou magavaa e hai hegau i de muna abodonu, gai e hoohonu i de Hagasaalunga ⌊Dabu⌋ ma de heiangi, gai gidaadeu ga dugu ange gilaadeu gi haia de hegau nei.

⁴ Gai gimaadeu ga hagaduu ngae e dalodalo ma de agoago muna a de Maadua.”

⁵ Aagai dangada alodahi gu malangilangi i muna nei. Gai gilaadeu ga hili Stephen, ia se daane e honu i de gai ma de Hagasaalunga Dabu, madali a Philip, ma Procorus, ma Nicanor, ma Timon, ma Parmenas, ma Nicolaus taane Antioch gu daumaha laa bei de gau Ssuu.

⁶ Gai gilaadeu ne gaamai denga daane laa gi daho de gau tala, gai gilaadeu ga dalodalo ma de dugu ange olaadeu lima gi olaadeu elunga.

⁷ Gai muna a de Maadua gu hagadagadaga age, gai gu kii ange de soa dangada gu hagadonusia i Jerusalem, gai gu soa hogi dangada haimeedabu gu gaavee de gai.

De boogia o Stephen

⁸ Gai Stephen gu honu i de abodonu ma ssauaa o de Maadua, gai ia ga hai denga mee hagalele mouli ma hagailonga i magavaa o dangada.

⁹ Gai hanu dangada o synagogue e hagaingoo ange laa go synagogue o de gau ilaage, ma de gau Cyrene, ma de gau Alexandria, ma dangada mai i Cilicia aama Asia, ne hagadaumee ange gi Stephen.

¹⁰ Aagai gilaadeu tee maua i de hai baasi ange gi de heiangi aama de Hagasaalunga oona e basa ai laa.

¹¹ Gai gilaadeu ga hagabasa hanu dangada hadu muna gi hagataba, “Gimaadeu gu langona ia e tala mee e hai baasi ange gi Moses aama de Maadua.”

¹² Gai gilaadeu ga hagabasa dangada, ma denga dagi aama de gau sisi, gai gilaadeu ga poo Stephen ga kave gi mada i mua o de hagabuulinga hagasaele.

¹³ Gai gilaadeu ga hai hanu dangada tala hagadonu hadu muna gi hagabaubau ina ia gi hagataba, “Taane nei e dee modu donu de basa ma e hai baasi ange gi de temple dabu nei aama hainga a Moses;

¹⁴ gimaadeu gu langona ia e hagadaba bolo Iesu taane Nazareth e oha naa de mommee nei, ma de sui denga dahulinga a Moses gu gaamai gi gidaadeu.”

¹⁵ Gai de masavaa huu a dangada alodahi i de hagabuulinga hagasaele laa ne haaina ai ia, aagai gilaadeu gu gidee bolo luoono mada gu bei luu mada o tangada de langi.