Acts 4 - De Beebaa Dabu

Peter ma John ma de hagabuulinga hagasaele

¹ De masavaa o Peter ma John e pasa ange ai gi dangada, gai gu tae mai hanu dangada haimeedabu madali tagi o de gau hagaloosi o de temple aama hanu Sadducee gi olaau daha,

² gilaadeu gu llili i delaau agoago ange dangada ma de tala hagadonu dagodo o de mouli age o de gau maakau i lodo o Klisdo.

³ Gai gilaadeu ga poo gilaau ga hhao gi lo te hale pono ga tali ai gi ao de mee, go hiidinga gu dai boo de mee i de masavaa laa.

⁴ Aagai gu soa donu dangada ne langona laa alaau muna gu hagadonusia, agu made se limamano taelodo o dangada alodahi.

⁵ De laangi i ono dua gai olaadeu dagi ma denga daane maatua, aama de gau sisi ne hagabuni mai gi Jerusalem.

⁶ Gai Annas tangada haimeedabu maolunga i kilaa hogi, ma Caiaphas, ma John, ma Alexander, gai e soa hogi mai i de huaabodu o tangada haimeedabu maolunga.

⁷ Gai gilaadeu ga gaamai gilaau gi olaadeu mada i mua ga ssili ange, “Niioai ssauaa be go de ingoo ooluu e hai ai naa hegau naa?”

⁸ Aagai Peter gu honu i de Hagasaalunga Dabu, gai ia ga hai ange gi gilaadeu, “Goodou e denga dagi o dangada ma denga daane maatua,

⁹ noo gimaau ne tuu ange gi ssiilingaa muna nei anailaa nei, i hiidinga de hegau danuaa gu hai ange laa gi taane balagelage, ne ieiangi ai nei taane nei,

¹⁰ gai goodou alodahi i kinei aama dangada o Israel alodahi gi iloo bolo taane nei ne hagaieiangi i de ingoo o Iesu Klisdo taane Nazareth. Deenei taane oodou ne daudau laa i de laagau lui, gai de Maadua ne hagamouli age ia mai i de magau.

¹¹ Ia go de hadu donu oodou, de gau hagatuu hale, ne hagangadi mee laa, gai gu hai ai tuludulu o de logunga.

¹² E deai ange donu se hagamouli i daho dahi dangada ange, gai e deai ange donu se ingoo ne gaavange gi dangada o henua i lalo e maua i de hagamouli gidaadeu.”

¹³ Gai ga gidee huu e gilaadeu de lo taane o Peter ma John, gai gilaadeu gu llele mouli i delaadeu iloo bolo gilaau ni dangada tee skuulu, gai e bei donu huu dagodo o dangada ange laa. Gai gilaadeu ne manadua hogi bolo gilaau ni daane nogo daudali ange i Iesu.

¹⁴ Aagai ga gidee huu e gilaadeu taane ne ieiangi laa gu duu madali gilaau, gai gu deai alaadeu muna e maua i de hai baasi ange ai.

¹⁵ Aagai dua delaadeu hai gilaau gi ssao gi hulo gee mai i daho de hagabuulinga hagasaele, gai gilaadeu ga pasa i olaadeu magavaa,

¹⁶ ga hagataba, “Dee hee taadeu hai e hai ai luu daane nei? Go hiidinga dangada alodahi i Jerusalem gu iloo bolo gilaau gu hai dahi mee hagalele mouli laumalie. Gai gidaadeu gu dee maua i de hagahadu muna de mee nei.

¹⁷ Gai deenei taadeu hai gi dee kii ange de soa dangada e iloo de longo nei. Gidaadeu e tala ange donu huu gilaau gi dee aahe ange gi agoago i de ingoo nei.”

¹⁸ Gai gilaadeu ga hagahi gilaau ga hai ange gilaau gi dee aahe ange gi pasa aabe gi agoago i de ingoo o Iesu.

¹⁹ Aagai Peter ma John ga hai ange gi gilaadeu, “Dee hee de mee e heohi i mada luu mada o de Maadua, go demaau hagallongo adu gi goodou, aabe go demaau hagallongo ange gi de Maadua?

²⁰ Go hiidinga gimaau e dee maua donu i tee tala mee amaau gu lava i de gide aama de langona.”

²¹ Aagai dua huu delaadeu hagamaatagu gilaau gai gilaadeu ga dugu gilaau gi hulo, gilaadeu tee maua i de hagaduasala gilaau i hiidinga gilaadeu ne maatagu i dangada; go hiidinga dangada alodahi gu tuhi de Maadua i hiidinga de hegau gu hai laa.

²² Go hiidinga taane ne ieiangi laa i ssauaa laa gu madahaa duumaa ono ngadau.

Talodalo i de lo taane olaadeu gu hagadonusia

²³ Gai ga ssao huu Peter ma John ga hulo, aagai gilaau ga hulo gi daho olaau soa ange laa ga tala ange muna alodahi a de gau haimeedabu maolunga ma denga dagi gu tala ange gi gilaau.

²⁴ Aagai ga langona huu e olaau soa muna laa, gai gilaadeu ga dalodalo ange gi de Maadua i de lodo daudahi, ga hai ange: “Tagi Maolunga, go koe ne haia de langi ma henua i lalo, ma tai aama mee alodahi iai,

²⁵ koe gu tala i daho demaadeu damana madagidagi, go doo dangada hai hegau go David i ssauaa o de Hagasaalunga Dabu, ‘Gu aha gu kona ai nei de llili o denga Gentile, gai dangada gu hagasaele de hai dahi hegau dee haigamaiana?

²⁶ Denga hodooligi o henua i lalo gu hagadabena, gai denga dagi gu hagabuni i dahi mommee e hai baasi ange gi Tagi Maolunga ma dana Klisdo.’

²⁷ Ni muna abodonu, Herod ma Pontius Pilate, ma denga Gentile aama de gau Israel ne hagabuni i de aduhale nei, e hai baasi ange gi doo dangada hai hegau dabu go Iesu, go de ia aau gu hagadabu laa i de lolo.

²⁸ Gai gilaadeu ga hagassula ai au mee alodahi gu hagamodu e hai i doo sauaa ma dau hagatau.

²⁹ Tagi Maolunga, koe gi hagalaangona alaadeu muna hagamaatagu, gai hai gi lodo mmahi luoo dangada hai hegau i de tala au muna.

³⁰ Gai haalo ina doo lima ga hagaieiangi ai magi ma de hai denga hagailonga ma mee hagalele mouli i de ingoo o doo dangada hai hegau dabu go Iesu.”

³¹ Gai ga lava huu delaadeu dalodalo, gai gu ngalungalue de mommee olaadeu e hagabuni ai laa. Gai gilaadeu gu odi i de hoohonu i de Hagasaalunga Dabu, gai gilaadeu ga tala muna a de Maadua i de lo taane.

De duha hagahedae o mee alodahi

³² Gai dangada alodahi gu hagadonusia laa gu buni ma gu se lodo daudahi; gu deai donu se dangada e hagadaba bolo niiana mee e hanu i ono daha, aagai gilaadeu gu hai mee ai alodahi.

³³ Gai de gau tala ne duudagi de tala hagadonu dagodo de mouli age o Tagi Maolunga go Iesu i ssauaa laumalie. Gai de abodonu laumalie o de Maadua gu dagodo i olaadeu daha alodahi.

³⁴ Gai gu deai donu dangada i olaadeu magavaa e duasala, go hiidinga gu soa gilaadeu e hanu laa olaadeu alahenua aabe ni hale, ne hagao gi daha mee nei ga gaamai sseene ne maua ai

³⁵ ga gaavange gi de gau tala, gai mee nei alodahi gu duha ange gi dangada alodahi e duasala.

³⁶ Gai Joseph, taane e hagaingoo ange laa go Barnabas (e bei go “taane e hagammahi ina ange lodo o dangada”) gai se dangada de aamuli o Levi mai i Cyprus,

³⁷ e dahi ono alahenua, gai ia ne hagao gi daha ga gaamai de hagaoanga ga gaavange gi de gau tala.