Acts 3 - De Beebaa Dabu

De hagaieiangi o taane balagelage

¹ Dahi laangi gai Peter ma John ne hulo gi de temple i de daa tolu i muli de hualaangi, go de masavaa e dalodalo ai.

² Gai e dahi daane ne balagelage mai i dono haanau gu sabaia mai ma gu hagadagodo i gaogao de haitoga o de temple i laangi alodahi. Deenei de haitoga e hagaingoo ange laa bolo go de Haitoga Mahamaha. Gai ia e noho ma e dangidangi i mee ngadi gaavange mai i daho dangada e ulu laa i de temple.

³ Gai ga gidee huu e ia Peter ma John gu loomai e ulu i de temple, gai ia ga dangidangi ange gi gilaau i hanu mee ngadi gaavange.

⁴ Gai Peter ma John ga haaina ia, gai Peter ga hai ange gi de ia, “Galo mai mage diiloo gimaau!”

⁵ Gai taane laa ga galo ange ga haaina gilaau, ia ne maanadu i ono lodo bolo ia e kave naa hanu mee mai i olaau daha.

⁶ Aagai Peter ga hai ange gi de ia, “Au e deai donu agu selevaa be ni goolo, gai au e gaavadu gi de goe de mee e dahi i ogu daha: i de ingoo o Iesu Klisdo o Nazareth, hidi age seesee!”

⁷ Gai Peter ga poo dono lima madau ga hagaduu age ia gi lunga, gai de masavaa laa donu huu gai gu hanu mahi i lodo luoono alohi vae ma lodo luoono gubu vae.

⁸ Gai taane laa ga hidi age ga duu gi lunga, gai ia ga seesee ga ulu madali gilaau i de temple. Gai ia ne seesee ga lellele gi lunga ga tuhi de Maadua.

⁹ Gai dangada alodahi ne gidee ia e seesee ma de tuhi de Maadua,

¹⁰ gai gilaadeu ne madea bolo ia go taane nogo noho laa ma e dangidangi i mee ngadi gaavange i de haitoga o de temple e hagaingoo ange laa go de Haitoga Mahamaha. Gai gilaadeu gu llele mouli ma de maatagu i mee gu hai ange laa gi de ia.

De agoago o Peter i de temple

¹¹ Gai de masavaa o taane nogo balagelage laa ne daohi ai Peter ma John, gai dangada alodahi ga saavini mai gi olaadeu daha i de mommee e hagabinga ange laa go de Velanda o Solomon, gilaadeu gu kona de llele mouli.

¹² Gai ga gidee huu e Peter mee nei, gai ia ga hai ange gi dangada, “Denga daane o Israel, gu aha gu llele ai naa oodou mouli i mee nei? Gai gu aha gu haaina ai naa goodou gimaau, e dagodo be go gimaau ne haia ga seesee taane nei i omaau sauaa ma omaau danuaa donu huu?

¹³ De Maadua o Abraham, ma Isaac aama Jacob, de Maadua o odaadeu dubuna madagidagi, gu hagamahamaha dono dangada hai hegau go Iesu, go de ia oodou ne gaavange ga daa gi magau ma de hagangadi mee i mada i mua o Pilate, e dee galemu donu dana hagatale de hagaola ia.

¹⁴ Aagai goodou ne hagangadi mee de Ia Dabu ma de Ia Heohi laa, gai ne dangidangi ange gi hagasao ina mai gi goodou dahi daane daa dangada.

¹⁵ Goodou ne daa ga magau Tagi o de mouli, gai de Maadua ne hagamouli age ia mai i de magau. Gai gimaadeu ni dangada e daalaa hagadonu dagodo o mee nei.

¹⁶ Gai go de gai ange gi de ingoo o Iesu, o taane oodou e gidee nei ma de iloo ne ieiangi ai. Gai go de ingoo o Iesu ma de gai ange gi de ia ne haia ga ieiangi taane nei, bei doodou hai ne gidee ai nei.

¹⁷ Denga daina, au e iloo bolo goodou ma oodou dagi ne hai de mee nei i hiidinga doodou dee tonu.

¹⁸ Aagai de Maadua ne hagassula mee aana gu tala madagidagi i daho denga pelaabisi alodahi, bolo dana Klisdo e hagaduasala naa.

¹⁹ Deenei ai, goodou daahuli oodou lodo gi sooloa ai oodou haisala, gai gi humai ai de masavaa o de ilaage i daho Tagi Maolunga,

²⁰ gai ia ga hai ai gi humai Iesu, go de Klisdo gu hili adu laa gi goodou.

²¹ Gai ia e noho donu i de langi ga dae ai gi de laangi e hagahoou ai mee alodahi, go mee a de Maadua gu tala i daho ono pelaabisi dabu madagidagi.

²² Moses ne hagadaba, ‘Tagi Maolunga, doodou Maadua, e hagasula age naa dahi pelaabisi mai i magavaa o oodou dangada bei ogu dagodo. Gai goodou hagalaangona mee alodahi aana e tala adu gi goodou.

²³ Gai dangada alodahi e dee hagallongo ange gi muna a de pelaabisi e daa naa gi maakau ga aau gee mai i daho dangada.’

²⁴ Gai denga pelaabisi alodahi mai i Samuel, ma gilaadeu ne loomai i ono dua, ne tala dagodo o denga laangi nei.

²⁵ Goodou go dama a denga pelaabisi, aagai niiodou de hagatoo donu hagaheloongoi a de Maadua ne hai madali oodou maadua madagidagi, bei dana hai gu tala ange ai laa gi Abraham, ‘Henua i lalo alodahi e manuuia naa i hiidinga o doo aamuli.’

²⁶ De masavaa a de Maadua ne hagamouli age ai dono dangada hai hegau, gai ia ne hai ia gi humai gi goodou i mua e hagamanuuia ai goodou, gai ia ga hai ai gi hulo gee goodou alodahi i oodou hegau baubau.”