Acts 28 - De Beebaa Dabu

De tau i Malta

¹ De masavaa omaadeu ne loage ai gi de henua, gai gimaadeu gu iloo bolo de ingoo o de modu laa go Malta.

² Gai dangada o de henua laa ne kona donu de abodonu mai gi gimaadeu. Gilaadeu ne haula dahi ahi e hagamahanahana ai gimaadeu, go hiidinga gu daamada de pala de langi ma de hagamagalili.

³ Paul ne hano ga hagabudu hanu lahhie e velo ange gi lo te ahi, gai dahi labodo hagammau ne sao mai, i hiidinga de vvela o de ahi laa, ga kadi dono lima ga pigi ai.

⁴ Gai ga gidee huu e dangada o de henua laa de labodo e daudau laa i dono lima, gai gilaadeu ga hagataba, “Taane nei se daane daa dangada donu. Ia ne ola mai i de moana, gai de hagamodu heohi e dee dugu ange donu ia gi mouli.”

⁵ Gai a Paul ga luuluu de labodo laa gu doo ange gi lo te ahi. Gai ia tee beaha donu.

⁶ Gai dangada ne tali gi hua dono lima aabe go de moolau dono magau; aagai gilaadeu ne tali ange i dahi masavaa looloa, gai teai donu mee ne hai ange gi de ia. Gai gilaadeu ga sui alaadeu maanadu ga hagataba bolo ia go dahi diinonga.

⁷ Gai de mommee omaadeu iai laa e baa ange gi de alahenua o tagi o de modu laa, dono ingoo go Publius. Ia ne abodonu mai ma de tilo danuaa mai gimaadeu i e dolu laangi.

⁸ De masavaa laa gai tamana o Publius e vvela dono angaanga ma de hanohano. Gai a Paul ne hano gi ono daha, gai dua dono dalodalo, ga dugu luoono lima gi ono elunga, gai ia gu ieiangi.

⁹ Dua de hai mee nei, gai dangada alodahi e mmagi i de modu laa gu loomai hogi gi daho Paul, gai gilaadeu gu ieiangi hogi olaadeu magi.

¹⁰ Gai dangada o de modu laa ne ngadi gaamai hanu mee lagolago gi gimaadeu. Gai de masavaa omaadeu ne maalanga ai e hulo gee i kilaa, gai gilaadeu ga hhao demaadeu vaga i mee alodahi omaadeu e hagadanuaa ai.

De maalanga i Malta e hulo gi Rome

¹¹ Dua e dolu malama, gai gimaadeu ne kage i dahi vaga e daula laa i de modu laa i de masavaa hagamagalili; de vaga nei se moni niio de gau Alexandria. Madaa moni e hagadagodo ange gi biho o luu diinonga go Castor ma Pollux, gilaau se maasanga.

¹² Gai gimaadeu ne hulo ga tau i Syracuse ga nnoho ai i e dolu laangi.

¹³ Gai gimaadeu ne dele mai i kilaa ga hulo ga sula i Rhegium. Gai de laangi i ono dua ne ssau mai de madangi i ngaage, gai de laangi mai ange laa gai gimaadeu ne sula i Puteoli.

¹⁴ Gai gimaadeu ne hedae ange gi hanu daina i kilaa, gai gilaadeu ga dangidangi mai gimaadeu gi nnoho i olaadeu daha i e hidu laangi. Gai gimaadeu ga hulo ai loo ga tae gi Rome.

¹⁵ Gai ga langona huu e denga daina bolo gimaadeu gu dai tae adu, gai gilaadeu ga loomai ga hedae mai gi gimaadeu i de Mommee Hagao Mee o Appius, ma denga Hale Gaainga e Dolu. Gai ga gidee huu e Paul gilaadeu, gai ia ga hagaahe ange de abodonu gi de Maadua, gai gu maamaane ono lodo.

De dae o Paul gi Rome

¹⁶ Gai de masavaa huu omaadeu ne tae ai gi Rome, gai gu dugu ange a Paul gi noho donu huu i de ia, madali taane hebagi e hagaloosia ange laa ia.

¹⁷ Dua e dolu laangi gai Paul ne aalu dagi o de gau Ssuu gi loomai gi ono daha. De masavaa olaadeu ne tae mai ai, gai ia ga hai ange gi gilaadeu, “Ogu daina, tigi ai donu agu mee ne hai e baasi ange ai gi odaadeu dangada, aabe go dahulinga a odaadeu dubuna madagidagi; aagai gilaadeu ne poo au i Jerusalem ga gaavange gi de gau Rome.

¹⁸ Aagai dua huu de hai ssiilingaa muna, gai de gau Rome ne llodo e dugu au gi hano, i hiidinga gilaadeu tee gidee dahi mee daudahi e heohi ai dogu daa gi magau.

¹⁹ Aagai de gau Ssuu tee llodo, deelaa ai, au ne dangidangi i de hagamodu ogu muna i mada i mua o Caesar. Gai au e dee hagabaubau naa donu dogu huaahenua.

²⁰ Deenei de hiidinga aagu ne aalu adu ai naa goodou e pasa gidaadeu. Gai go de tali hagalodolodo o de gau Ssuu ne hidi mai ai nei dogu noodia i denga daula baalanga.”

²¹ Gai denga daane laa ne hai ange gi de ia, “Gimaadeu tigi gidee donu dahi leda mai i Judea, e tala mai ai oo dagodo. Gai tigi ai hogi odaadeu daina ne loomai i kilaa e tala mai hanu longo moou, aabe ne hagabaubau ina goe.

²² Aagai gimaadeu e llodo e hagallongo au hagasaele. Go hiidinga gimaadeu gu iloo bolo gu soa dangada i mommee alodahi e hagabaubau ina de hagabuulinga naa.”

²³ Gai gilaadeu ne hagailonga dahi laangi e loomai ai gi daho Paul. Gai ne soa donu ne loomai gi dono hale e noho ai laa. Gai Paul ga agoago ange gi gilaadeu, mai i taiao ga dae ai gi de ahiahi, ga tala hagadonu ange gi gilaadeu dagodo o de nohoanga hodooligi o de Maadua, ma de hagatale de usuusu ange gilaadeu i de hainga a Moses aama muna a denga pelaabisi, i dagodo o Iesu.

²⁴ Hanu gilaadeu ne hagadonusia ana mee ne tala ange gi gilaadeu, aagai hanu tee hagadonusia.

²⁵ Deelaa ai, gilaadeu gu dee buni, gai gu mavaevae ga hulo gee mai i kilaa, i dua de tala a Paul muna hagaodi nei: “E heohi donu muna a de Hagasaalunga Dabu gu tala ange laa gi odaadeu dubuna madagidagi i daho de pelaabisi go Isaiah:

²⁶ ‘Hannoo hai ange gi de huaadangada nei, Goodou e langona, gai e dee maua gi tonu ange; goodou e gidee, aagai e dee madea.

²⁷ Go hiidinga de huaadangada naa e makaga olaadeu lodo, olaadeu dalinga gu longoduli, gai gu pono olaadeu ganomada. Kana gidee naa e gilaadeu i olaadeu ganomada ma de langona i olaadeu dalinga, ga tonu ange i olaadeu lodo, ga daahuli olaadeu lodo, gai au ga hagaieiangi gilaadeu.’

²⁸ Deenei ai, au e lodo goodou gi iloo bolo de hagaola a de Maadua gu agoago ange hogi gi denga Gentile, gai gilaadeu e hagallongo naa donu!” [

²⁹ Gai ga lava huu i de tala a Paul muna nei, gai de gau Ssuu ga hulo gee mai i ono daha, ga hagadaumee i olaadeu magavaa.]

³⁰ Gai a Paul ne hagao dahi hale moona i kilaa ga noho ai i e lua ngadau, ma de abodonu ange gi dangada alodahi ne loomai gi ono daha.

³¹ Gai ia ne lodo mmahi i de agoago i dagodo o de nohoanga hodooligi o de Maadua aama dagodo o Tagi Maolunga go Iesu Klisdo — gai teai donu mee ne buibui ina ia.