Acts 25 - De Beebaa Dabu

Paul i mada i mua o Festus

¹ Gai Festus gu dae mai gi lo tono ungaamee, gai dua huu e dolu laangi gai ia ne humai i Caesarea gi Jerusalem.

² Gai de gau haimeedabu maolunga ma dagi o de gau Ssuu gu loomai e hagabaubau ange a Paul gi de ia, ma de usuusu ange ia

³ gi balea ange gilaadeu e kave ai a Paul gi Jerusalem, go hiidinga gilaadeu gu nnoho e daa ia gi magau, i dono hano i honga de haiava.

⁴ Gai Festus ga hai ange gi gilaadeu, “A Paul e noho donu huu i lo te hale pono i Caesarea, gai au gu dai ahe naa donu gi Jerusalem.”

⁵ Gai ia ne hai ange, “Hanu oodou dangada maolunga gi loomai madali au e hulo gi kilaa, gai gilaadeu ga hagabaubau ai taane nei i kilaa, noo e hanu mee baubau a taane nei gu hai.”

⁶ Gai dua de noho o Festus i kilaa i e valu aabe e madaangahulu laangi, gai ia ne ahe gi Caesarea. Gai de laangi i ono dua, gai ia ne noho i de mommee hagamodu muna, gai ia ga aalu gi gaamai a Paul gi ono mada i mua.

⁷ Gai de masavaa o Paul ne humai ai, gai de gau Ssuu ne loomai laa i Jerusalem ne tuu i luoono baasi. Gai gilaadeu ga hagabaubau ai ia i hanu mee lagolago, aagai tee maua e gilaadeu i de hai gi too donu alaadeu muna.

⁸ Gai a Paul ne tala ange dono heohi, ga hai ange, “Au tigi haisala ange donu gi de hainga a de gau Ssuu, be go de temple, aabe gu hai baasi ange gi Caesar.”

⁹ Aagai Festus ne lodo e hai gi malangilangi de gau Ssuu, deelaa ai, ia ne ssili ange gi a Paul, “Koe e lodo e hano gi Jerusalem gai au ga hagamodu ai oo muna i kilaa i mee oou gu hagabaubau ina ai nei?”

¹⁰ Aagai a Paul ne hai ange, “Au gu duu donu i de mommee hagamodu muna o Caesar iainei, go de mommee e heohi de hagamodu ai ogu muna. Gai au tigi hai ange donu dahi baubau daudahi gi de gau Ssuu, bei dau hai e iloo ai naa.

¹¹ Gai noo au se dangada e haia de baubau, ma de hai dahi mee e heohi ai dogu daa gi magau, aagai au e dee ssala donu gi ola mai au i de magau. Aagai noo e dee se mee abodonu alaadeu e hagabaubau ai nei au, gai e deai donu se dangada e maua i de gaavange au gi gilaadeu. Au e dangidangi i de hagamodu ogu muna i mada i mua o Caesar.”

¹² Aagai Festus ne madaangudu ange gi dono hagabuulinga hagasaele, gai ia ga hai ange gi a Paul, “Koe gu dangidangi bolo koe e hagamodu oo muna i mada i mua o Caesar; deelaa ai, koe e hano donu gi mada i mua o Caesar.”

Paul i mada i mua o Agrippa ma Bernice

¹³ Dua hanu laangi, gai de hodooligi go Agrippa ma Bernice gu loomai gi Caesarea e hedae ange ai gi Festus.

¹⁴ Gai dua delaau nnoho i kilaa i hanu laangi lagolago, gai Festus ga tala ange dagodo o Paul gi de hodooligi, ga hai ange, “E dahi daane i kinei a Felix ne hhao gi lo te hale pono;

¹⁵ gai de masavaa oogu ne hano ai gi Jerusalem, gai de gau haimeedabu maolunga ma denga dagi o de gau Ssuu ne hagabaubau mai ia gi de au, ma de llodo au gi hagamodu ina ono muna e daa gi magau.

¹⁶ Gai au ne tala ange gi gilaadeu bolo de gau Rome e dee daa gi magau dahi dangada, noo ia tigi maua i de duu i madamada o dangada e hagabaubau ina ia, e tala ai dono heohi i mee alaadeu gu hagabaubau ai ia.

¹⁷ Deelaa ai, de masavaa huu olaadeu ne loomai ai madali au gi kinei, gai au tee tali ange donu dahi masavaa. Aagai de laangi donu huu i ono dua, gai au ne hano ga noho i de mommee hagamodu muna, ga aalu gi gaamai taane laa.

¹⁸ Gai de masavaa o ono hagadaumee ne tuu age ai e hagabaubau ia, gai gilaadeu tee hagabaubau ia i dahi haisala daudahi, bei dagu hai e maanadu ai.

¹⁹ Aagai gilaadeu ne hagabaubau donu huu ia i dagodo o alaadeu hai daumaha, aama dagodo o Iesu, taane ne magau laa, gai a Paul e hagadaba bolo ia gu mouli age.

²⁰ Gai au ne ssili ange gi taane laa be ia e lodo e hano gi Jerusalem e hagamodu ai ono muna, i hiidinga au gu dee iloo be dee hee dagu hai e ssala ai gi iloo danuaa dagodo o mee laa.

²¹ Aagai de masavaa huu a Paul ne dangidangi ai bolo ia e hano e hagamodu ono muna i mada i mua o Caesar, gai au ga hagadaba bolo gi daohia donu huu ia ga dae ai gi dagu mau i de kave ia gi Caesar.”

²² Gai Agrippa ne hai ange gi Festus, “Au e lodo hogi e hagallongo muna a taane naa.” Festus ne hai ange, “Koe e maua i de hagallongo ana muna daiao.”

²³ De laangi i ono dua, gai Agrippa ma Bernice ne loomai i de hagadubu ma de hagaamua ina, ga ulu i de mommee hagabuni madali denga dagi o de hebagi, aama de gau aamua o de aduhale. Aagai Festus ga aalu gi gaamai a Paul gi kilaa.

²⁴ Gai Festus ga hai ange, “De hodooligi go Agrippa ma dangada alodahi gu nnoho madali gimaadeu, goodou kalo ange diiloo taane nei. De gau Ssuu alodahi i Jerusalem ma gilaadeu i Caesarea, ne hagabaubau mai ia gi de au, ma de hevaalogi ga hagataba bolo e dee dugu ia gi mouli.

²⁵ Aagai au tee gidee dahi mee daudahi e heohi ai dono daa gi magau. Gai go hiidinga ia gu hagadaba bolo e hagamodu ono muna i mada i mua o Caesar, gai au gu hagatau e kave ia gi dae gi Rome.

²⁶ Aagai au tigi iloo donu dahi mee daudahi e heohi dagu sisi e hagabaubau ange ai ia gi de hodooligi. Deenei ai, au gu gaamai ia gi oodou mada i mua alodahi, aama mada i mua o de hodooligi go Agrippa, gi hanu ai agu mee e maua i de sisi i dua de hai ssiilingaa muna nei.

²⁷ Go hiidinga e dee heohi de nnoa dahi dangada e kave gi de hodooligi, noo tigi maua i de tala ange be ni aha oona gu hagabaubau ina ai.”