Acts 24 - De Beebaa Dabu

Paul i mada i mua o Felix

¹ Dua e lima laangi, gai tangada haimeedabu maolunga go Ananias ma hanu dagi, aama dahi daane e donu ange gi de hainga, dono ingoo go Tertullus, gu loomai i Caesarea. Gai gilaadeu ne tala ange gi de goobenaa alaadeu mee e hagabaubau ai a Paul.

² Gai de masavaa huu ne hagahi ai a Paul gi humai, gai Tertullus ga daamada de hagabaubau ange ia gi Felix, ga hai ange, “De goobenaa maolunga go Felix, gimaadeu gu nnoho paba i dahi masavaa daulooloa, i doo masavaa ne dagi ai nei, gai dau hagatau gu hagadanuaa honga de huaahenua nei.

³ Gimaadeu gu malangilangi i mee alodahi ma mommee alodahi, ma de hagaahe adu de abodonu gi de goe.

⁴ Aagai au e dee lodo e hakoso goe i dahi masavaa daulooloa, gai au e dangidangi adu koe gi dee haihaia hagalaangona amaadeu muna.

⁵ Gimaadeu ne iloo bolo taane nei se daane e hagahai ngadaa ina dangada, gai se daane e haia gi hellumi de gau Ssuu i henua i lalo alodahi. Ia se dagi hogi niio dangada e hagabinga laa bolo go de hagabuulinga hai daumaha o de gau Nazareth.

⁶ Ia ne hagatale donu hogi de hai gi dee dabu de temple, deelaa ai, gimaadeu ne poo ia. [Gimaadeu ne hagatale de hagamodu ono muna i amaadeu hainga.

⁷ Aagai tagi o denga daane hebagi go Lysias ne humai ga hai gi de mahi ia, ga kave gee mai i omaadeu daha,

⁸ ga hai mai gi gimaadeu e hagabaubau ina ia, gi loomai gi oo daha.] Mee nei alodahi e odi naa donu i dau iloo, i dau masavaa e ssili gi iloo de muna abodonu, i mee alodahi amaadeu e hagabaubau ai ia.”

⁹ Gai de gau Ssuu alodahi ne buni ange hogi gi ana muna, ga hagataba bolo muna alodahi a taane laa ne tala ni muna abodonu.

Paul e tala dono heohi i mada i mua o Felix

¹⁰ De masavaa a de goobenaa ne dugu ange ai a Paul gi daalaa ana muna, gai a Paul ga basa ange ga hai ange, “Go hiidinga au e iloo bolo gu lagolago ngadau aau ne dagi ai de huaahenua nei, deenei ai, au e malangilangi donu i de tala adu dagodo o dogu heohi.

¹¹ Gai koe e maua donu i de hai gi too donu, bolo tigi kii ange i de madaangahulu ma lua laangi, i dua dogu hano ga daumaha i Jerusalem.

¹² Gai de gau nei tee gidee bolo au ne hagadaumee ange gi dahi dangada i de temple, be ne hai ga hellumi dangada soa i lodo synagogue, aabe go hanu mommee i lo te aduhale.

¹³ Aagai ogu hagadaumee e dee maua hogi i de hai gi too donu mee alaadeu e hagabaubau adu ai nei au gi de goe.

¹⁴ Aagai au e tala adu gi de goe, bolo au e daudali i de Haiava, alaadeu e hagaingoo ange laa bolo se hagabuulinga daumaha gee, au e daumaha ange gi de Maadua o omaadeu dubuna madagidagi. Gai au e hagadonusia mee alodahi gu sisi i de hainga aama daho denga pelaabisi,

¹⁵ gai au e tali hagalodolodo ange gi de Maadua bei olaadeu dagodo, bolo e dahi donu mouli age olaadeu e heohi aama gilaadeu e dee heohi.

¹⁶ Deenei ai, au e hagaduu ngae e hai gi heohi tagi i ogu lodo ange gi de Maadua aama ange gi dangada.

¹⁷ Dua hanu ngadau, gai au ne ahe mai gi Jerusalem e gaamai hanu mee ngadi gaavange aama ssigidaumaha gi dogu huaahenua.

¹⁸ Gai de masavaa aagu e hai ai mee nei, aagai ogu hagadaumee ne gidee au i dua de lava dogu hagagilimalali i de temple, gai e deai hogi dangada soa i ogu daha aabe se hellumi e hai. Aagai e hanu hogi dangada Ssuu mai i Asia i kilaa,

¹⁹ go gilaadeu donu e heohi de tuu i oo mada i mua gi hagabaubau ina ai au, noo e hanu alaadeu mee e hagabaubau adu ai au.

²⁰ Aabe koe e dugu ange denga daane nei gi daalaa adu, be se haisala aha alaadeu ne gide i ogu daha i de masavaa oogu ne duu ai i mada i mua o de hagabuulinga hagasaele,

²¹ aagai de mee donu huu oogu ne hagabaubau ai, go dogu duu ga hagaleo laumalie i olaadeu magavaa ga hai ange, ‘Go hiidinga o de mouli age oodou gu hagamodu ai nei ogu muna.’ ”

²² Aagai Felix se daane e iloo danuaa e ia dagodo o de Haiava, ga hagalava de hagabuni laa, ga hai ange, “Au e hagamodu naa oo dagodo i de masavaa o tagi o de hebagi go Lysias e dae mai ai.”

²³ Gai Felix ne hai tagi o de lau gi gaavee a Paul gi hagaloosia ange, gai gi dugua ia gi ilaage, ma de dugu ange ono soa gi balea ange ia i mee oona e duasala ai.

Paul i mada i mua o Felix ma Drusilla

²⁴ Dua hanu laangi gai Felix ma dono bodu go Drusilla, ia se hine Ssuu, gu tae mai gi kilaa. Gai Felix ga aalu ga gaamai a Paul gi daalaa dagodo o de gai ange gi Klisdo Iesu.

²⁵ Gai de masavaa a Paul e basa ange ai i dagodo o de heohi, ma de golomagi lodo, aama de hagaduasala gu dai dae mai laa, gai Felix gu madagu, ga hai ange, “Gu lava au muna e tala, hannoo, gai au ga ssala adu ange ai goe noo gu dahi ange ogu masavaa.”

²⁶ Gai Felix ne tali hagalodolodo bolo a Paul e hagao ange naa ia hanu sseene hagasenga. Deelaa ai, tee modu donu dana aalu a Paul gi humai e madaangudu gilaau.

²⁷ Aagai dua huu e lua ngadau, gai Porcius Festus gu kave tuulanga o Felix. Gai go hiidinga Felix ne lodo e hai gi malangilangi de gau Ssuu, deelaa ai, ia ne dugu donu huu a Paul i lo te hale pono.