Acts 22 - De Beebaa Dabu

¹ “Denga daina ma damana, goodou hagalaangona gai au ga tala hagadonu adu ogu dagodo gi goodou iainei.”

² Gai ga langona huu e dangada bolo ia e basa ange gi gilaadeu i muna Aramaic, gai gilaadeu gu kii ange donu tee mmuu. Gai ia ga hai ange:

³ “Au se dangada Ssuu ne haanau i Tarsus o Cilicia. Au ne agoago i daho Gamaliel i de aduhale nei, gai ne agoagona danuaa i dahulinga hai ngadaa o hainga a odaadeu dubuna madagidagi. Au ne lodo mmahi i de hai hegau a de Maadua, bei oodou dagodo anailaa nei.

⁴ Au ne vaivai hai dangada e daudali i de Haiava, ma de daa gilaadeu ga maakau. Au ne noonooa hogi denga daane ma haahine ga tili ange gi lo te hale pono.

⁵ Gai tangada haimeedabu maolunga ma de hagabuulinga hagasaele e maua donu i de hagadonu agu muna, go hiidinga gilaadeu ne gaamai hanu leda au gi gaavee gi olaadeu soa i Damascus. Aagai au ne hano gi kilaa e noonooa ai dangada e nnoho i kilaa e gaamai gi Jerusalem e hagaduasala ai gilaadeu.

De tala a Paul de dahuli ono lodo

⁶ “Gai de masavaa oogu ne hano ai ga baa ange gi Damascus i daha de hualaangi, aagai dahi maalama gu hano iho i de langi ga hagamaalama de mommee oogu iai laa.

⁷ Gai au gu doo gi honga de gelegele, aagai au gu langona dahi leo e hai mai gi de au, ‘Saul, Saul, gu aha gu vaivai hai ai naa goe au?’

⁸ Aagai au ne ssili ange, ‘Tagi Maolunga, go koe goai?’ Ia ne hai mai gi de au, ‘Go au donu go Iesu o Nazareth aau e vaivai hai naa.’

⁹ Denga daane ne hulo laa madali au ne gidee de maalama laa, aagai gilaadeu tee tonu ange gi de leo ne basa mai laa gi de au.

¹⁰ Aagai au ne ssili ange, ‘Tagi Maolunga, se aha aagu e hai?’ Gai Tagi Maolunga ne hai mai gi de au, ‘Hidi age hannoo gi Damascus. Gai go kilaa naa e tala adu ai gi de goe mee alodahi a de Maadua gu hagadabena adu koe gi haia.’

¹¹ Aagai au gu dee gide i hiidinga o de maalama laa. Gai ogu soa ange laa ga dagi au ga kave gi Damascus.

¹² Gai e dahi daane go Ananias dono ingoo, ia se daane e daudali i de hainga, ma de duuhia i daho de gau Ssuu alodahi e nnoho i kilaa,

¹³ ia ne humai ga duu i ogu gaogao ga hai mai gi de au, ‘Saul, dogu daina, koe gi gide.’ Gai au gu gide i de masavaa laa donu huu, gai au ga galo age ga tilo ia.

¹⁴ Gai ia ga hai mai, ‘De Maadua o odaadeu maadua madagidagi gu hili goe e hagaago adu ono lodo gi de goe, ma de hai gi gidee e goe de Ia Heohi laa, ma de hai gi langona e goe dono leo.

¹⁵ Gai koe e hai naa ga se dangada tala hagadonu niiona, gai koe ga tala ange ai gi dangada alodahi mee aau gu gide ma de langona.

¹⁶ Gai se aha aau e tali naa? Hidi age e babudaisi goe, ma de hai gi maatala oo haisala i doo dalodalo ange gi de ia.’

De hagahi o Paul gi agoagona denga Gentile

¹⁷ “Gai de masavaa oogu ne ahe ai gi Jerusalem, gai au gu hai dahi midi hagaago ange, i de masavaa oogu e dalodalo ai i lo te temple,

¹⁸ gai au ne gidee Tagi Maolunga e hai mai gi de au, ‘Hagamoolau hano gee i Jerusalem, go hiidinga dangada i kinei e dee hagadonu naa donu au muna e tala hagadonu ange ai au.’

¹⁹ Gai au ne hai ange, ‘Tagi Maolunga, de gau nei e iloo bolo au ne hhao gi lo te hale pono ma de daa gilaadeu gu hagadonusia au muna mai i denga synagogue.

²⁰ Gai de masavaa a doo dangada tala hagadonu go Stephen ne daia ai ga magau, gai au ne duu hogi i kilaa ma de buni ange gi de hegau laa, gai go au ne diiloo ange malo o dangada ne daia ia ga magau.’

²¹ Aagai ia ne hai mai gi de au, ‘Hannoo, au e hai goe gi hano gi daho denga Gentile i de mommee mmao.’ ”

Paul ma tagi o denga daane hebagi

²² Gai dangada ne hagallongo ana muna ga dae ai gi dana tala de mee nei. Aagai gilaadeu ga hevaalogi ga hagataba, “Daia gi magau taane naa! E dee danuaa donu dono mouli!”

²³ De masavaa o dangada ne hevaalogi ai ma de aau olaadeu malo laa daha, ma de maga gelegele gi lo te moana i lunga,

²⁴ gai tagi o de hebagi ga hagadaba bolo gi gaavee a Paul gi lo te mommee o denga daane hebagi. Ia ne hai ange gilaadeu gi hagailiilihia ia, ma de ssili gi iloo mai i ono daha, de hiidinga o dangada ne hevaalogi ai laa ma e hai baasi ange gi de ia.

²⁵ De masavaa alaadeu ne nnoa ai ia i denga daula, gai Paul ne ssili ange gi tagi o de lau e duu laa i ono gaogao, “Goodou e dee oha naa de hainga i doodou hagailiili dahi dangada Rome, i mua de hagamodu ono muna?”

²⁶ Gai ga langona huu e tagi o de lau ana muna, gai ia ga hano gi daho tagi o de hebagi, ga hai ange, “Ni aha aau gu baba ange naa e hai? Taane nei se daane Rome donu.”

²⁷ Gai tagi o de hebagi ne humai ga hai ange gi Paul, “Daalaa mai de muna abodonu, koe se dangada donu Rome?” Paul ne hai ange, “Uaa!”

²⁸ Gai tagi o de hebagi ne hai ange, “Au ne hagao hanu sseene lagolago gi maua ai e au i de hai gi se dangada Rome.” Paul ne hai ange, “Aagai au se dangada Rome donu mai i dogu haanau.”

²⁹ Gai denga daane ne loomai laa e haia siilingaa muna ne hagamoolau ga hulo gee mai i ono daha. Aagai tagi o de hebagi gu madagu i dua dana iloo bolo a Paul se dangada Rome donu, go hiidinga ia gu lava i de nnoa ia.

Paul i mada i mua o de hagabuulinga hagasaele

³⁰ Gai tagi o denga daane hebagi ne lodo gi iloo e ia hiidinga a de gau Ssuu ne hagabaubau ai laa a Paul. Deelaa ai, de laangi i ono dua, gai ia ga tala a Paul ga hagasao mai, ma de aalu ga hagabuni mai de gau haimeedabu maolunga aama de hagabuulinga hagasaele alodahi. Gai ia ga gaamai a Paul ga hagaduu i olaadeu mada i mua.