Acts 20 - De Beebaa Dabu

De hano o Paul gi Macedonia ma Greece

¹ Dua huu de helui de hellumi laa, gai a Paul ne hagahi denga daina ga hagammahi ange olaadeu lodo ma de hagaboo ange gi gilaadeu, gai ia ga hano gi Macedonia.

² Gai ia ne hagadaga i denga mommee i kilaa ga hagammahi ange lodo o dangada, gai ia ne hano ga dae gi Greece.

³ Gai ia ne noho i kilaa i e dolu malama. Gai go hiidinga de gau Ssuu gu hai dahi hagatau e daa ai ia, i de masavaa oona ne dai malanga ai e hano gi Syria, gai ia gu hagammahi e ahe e hano laa Macedonia.

⁴ Gai Sopater taane Berea, tama daane a Pyrrhus, ma Aristarchus ma Secundus luu daane mai i Thessalonica, ma Gaius taane Derbe, ma Timothy, aama Tychicus ma Trophimus, luu daane mai i Asia, ne hulo hogi madali ia.

⁵ Denga daane nei ne hulo i mua gi Troas ga tali ai gimaadeu,

⁶ aagai gimaadeu ne malanga mai i Philippi i dua Taonga o Pelaoaa Dee Hagahua, gai dua e lima laangi gai gimaadeu gu tae gi Troas, gai gimaadeu ne nnoho i kilaa i e hidu laangi.

De hagamouli age o Eutychus i Troas

⁷ Aagai tahi laangi o de uvigi, gai gimaadeu ne hagabuni ga gaimee. Gai Paul ne agoago dangada ga dae ai gi lo te boo, go hiidinga ia ne maanadu bolo gimaadeu e malanga i de laangi i ono dua.

⁸ Gai ne lagolago laama i lo te aabi i lunga omaadeu e hagabuni ai laa.

⁹ Gai e dahi hogi dama daane e noho i honga de haitoga o de madangi, dono ingoo go Eutychus; ia ne seni i hiidinga taulooloa de agoago a Paul. Gai ia gu doo iho i tolu deege o de hale, gai de masavaa huu alaadeu ne saabai age ia, gai gilaadeu gu gidee bolo ia gu magau.

¹⁰ Gai Paul ne iho ga buuludi ange tama daane laa, ga hai ange, “Goodou gi dee manavasaa, i hiidinga ia goi mouli huu.”

¹¹ Gai ia ga ahe age ga dohidohi pelaoaa ma de gaimee. Gai ia ne madaangudu ga dae ai gi de ao ai de mee, gai ia ga hano gee mai i kilaa.

¹² Gai dangada ne kave tama daane laa ga aahe ai, ia gu mouli. Gai gilaadeu gu malangilangi mmao.

De malanga mai i Troas gi Miletus

¹³ Gai gimaadeu ne hulo i mua ga kage i de vaga ga hulo ai gi Assos, e hagauda ai a Paul i kilaa, bei dana hai ne hagatau ai, go hiidinga ia ne hano laa uda ga hano ai gi de mommee laa.

¹⁴ Gai ga hedae huu gimaadeu i Assos, gai gimaadeu ga hagauda ia ga hulo ai gi Mitylene.

¹⁵ De laangi i ono dua gai gimaadeu ne dele mai i kilaa ga hulo gi Kios; gai gimaadeu ne tau i Samos i de laangi i ono dua. De laangi mai ange laa gai gimaadeu ne tau i Miletus.

¹⁶ Gai a Paul ne hagatau bolo ia e dee dau age i Ephesus, ia tee lodo e noho i Asia, i hiidinga ia e hagamoolau e hano gi dae gi Jerusalem, i de laangi o de Pentecost, noo e maua.

Muna hagaodi a Paul ange gi dagi i Ephesus

¹⁷ Gai ia ne aalu denga dagi o de nohoanga dabu o Ephesus gi loomai gi ono daha i Miletus.

¹⁸ Gai ia ne hai ange gi gilaadeu i de masavaa olaadeu ne tae mai ai gi ono daha, “Goodou e iloo ogu dagodo i masavaa alodahi oogu nogo noho ai i oodou magavaa, mai i tahi laangi oogu ne dae ai gi Asia,

¹⁹ gai au ne hai hegau ange gi Tagi Maolunga i de lodo maolalo ma de dangi aama de hagauda denga mee hai ngadaa a de gau Ssuu ne hai mai gi de au.

²⁰ Gai au tee hagammuni donu dahi mee, gai ne agoago adu goodou i mee e haigamaiana adu gi goodou, ma de agoago adu goodou i de mommee iai dangada soa aama oodou hale,

²¹ au ne tala hagadonu ange hogi gi de gau Ssuu ma denga Gentile dagodo o de daahuli ange gi de Maadua, ma de kai ange gi Iesu Klisdo taadeu Dagi Maolunga.

²² Gai iainei de Hagasaalunga ⌊Dabu⌋ e usuusu mai au gi hano gi Jerusalem. Gai au e dee iloo be ni aha e hai mai gi de au i kilaa.

²³ Gai deelaa donu huu, de Hagasaalunga Dabu ne hagaago mai gi de au i denga aduhale alodahi, bolo au e noodia naa ga hagaduasala.

²⁴ Aagai au e dee hagamogomogo donu dogu mouli, aabe e hai gi se mee e dau, gi maua ai e au i de hagalava de hagatau ma dagu duuhanga hegau mai i daho Tagi Maolunga go Iesu, go de tala hagadonu de longo danuaa, go dagodo de abodonu o de Maadua.

²⁵ Aagai iainei au e iloo bolo goodou alodahi gu agoago i ogu daha i dagodo o de nohoanga hodooligi o de Maadua gu dee aahe ange naa donu e gidee au.

²⁶ Deenei ai, au e tala hagadonu adu gi goodou anailaa nei, doodou maakau gu dee dau mai donu gi de au,

²⁷ go hiidinga au tee hagammuni donu dahi mee i goodou, gai ne tala adu gi goodou lodo alodahi o de Maadua.

²⁸ Goodou diiloo iho goodou aama de hagabuulingaa ssiibi alodahi, go gilaadeu a de Hagasaalunga Dabu gu dugu adu goodou gi dagina, gai goodou ga hagaloosi ange ai de nohoanga dabu o de Maadua, aana ne hagao laa i ono dodo donu.

²⁹ Au e iloo bolo dua naa huu dogu hano gee i oodou daha, gai denga wolf alasala e loomai naa gi oodou magavaa, gai gilaadeu e dee hagaola naa donu denga ssiibi.

³⁰ Gai e hanu donu hogi dangada i oodou magavaa e hiihidi age ga hagahaisala de mee heohi ga dagi gee ai hanu daina.

³¹ Deenei ai, goodou dagitilo, ma gi manadua bolo ne dolu ngadau aagu tee helui ai de hagakana ange goodou i de laangi ma de boo aama de dangi.

³² Aagai iainei au e dugu ange goodou gi de Maadua gi diiloo ange, aama dono abodonu, go ia e maua i de hagatuu goodou gi makaga, ma de hai gi maua e goodou de manuuia madali dangada alodahi gu lava i de vvae gee.

³³ Gai au tee nnoo ange donu gi selevaa be go goolo, aabe go malo o dahi dangada.

³⁴ Gai goodou e iloo bolo au ne hai hegau i luoogu lima ga hagadanuaa ai au aama dangada madali au.

³⁵ Au ne hagaago adu gi goodou i mee alodahi bolo e heohi doodou hai hegau ga bale ai hogi gilaadeu e baageaa, ma de hagamaanadu muna a Tagi Maolunga go Iesu ne hagadaba ai laa, ‘E kii ange de laumalie de manuuia i de ngadi gaavange i taadeu kave dahi mee.’ ”

³⁶ Aagai ga lava huu i dana tala ange muna laa gi gilaadeu, gai ia ga duuduli ga dalodalo madali gilaadeu alodahi.

³⁷ Gai gilaadeu alodahi gu tangi mmao ga buuludi ange a Paul ma de oso ia.

³⁸ Gilaadeu gu kona mmao de hinangalosaa i hiidinga dana tala ange gi gilaadeu bolo gilaadeu e dee gidee ange naa donu ia. Gai gilaadeu ne hulo ga kave ia gi de vaga.