Acts 2 - De Beebaa Dabu

De hano iho o de Hagasaalunga Dabu

¹ De masavaa huu ne dae mai ai de laangi o de Pentecost, gai gilaadeu alodahi ga hagabuni i dahi mommee.

² Gai de masavaa laa donu huu gai gu humai dahi mee be se madangi mmahi i de langi ga hhao lo te hale olaadeu e nnoho ai laa.

³ Gai gilaadeu ne gidee hanu mee be ni manga niio de ahi ula, gai manga laa ne loiho gi honga o dahi ma dahi.

⁴ Gai gilaadeu alodahi gu hoohonu i de Hagasaalunga Dabu, gai gilaadeu gu pasa i muna o denga henua gee i ssauaa o de Hagasaalunga ⌊Dabu⌋.

⁵ Laangi laa gai gu nnoho i Jerusalem de gau Ssuu mai i denga huaahenua alodahi, go gilaadeu e daohia hainga a Moses.

⁶ Gai ga langona huu e dangada soa mee laa, gai gilaadeu ga hagabuni mai i de llele olaadeu mouli, go hiidinga dahi ma dahi gu langona de gau tala e pasa i muna dono henua.

⁷ Gai gilaadeu alodahi gu dee tonu ange ma de llele mouli ga ssili, “E aha, e dee ni daane Galilee alodahi e pasa nei?

⁸ Gai gu aha gidaadeu gu langona ai nei gilaadeu e pasa i adaadeu muna?

⁹ Go muna a de gau Parthia ma de gau Media, ma de gau Elam, ma de gau Mesopotamia, ma de gau Judea ma Cappadocia, ma de gau Pontus ma Asia,

¹⁰ ma de gau Phrygia ma Pamphylia, ma de gau Egypt, ma dangada o hanu ungaamee o Libya e paa ange laa gi Cyrene; ma muna a dangada ne loomai i Rome

¹¹ (go de gau Ssuu ma denga Gentile alodahi gu dau laa i taumaha a de gau Ssuu); ma muna a de gau Crete, aama de gau Arab — gidaadeu e langona delaadeu tala dagodo o hegau hagalele mouli a de Maadua ne hai i amaadeu muna donu.”

¹² Gai gilaadeu alodahi gu llele mouli ma de ssenga ange, ga hagadau ssili ga hagataba, “Dee hee de hagadoonunga o mee nei?”

¹³ Gai hanu gilaadeu ne doo mee, ga hagataba, “Gilaadeu gu ssenga i de unu uvaini!”

De agoago a Peter i Pentecost

¹⁴ Aagai Peter ga duu age madali tinoangahulu ma dogodahi, ga oo ga hai ange gi gilaadeu, “Goodou de gau Ssuu ma dangada alodahi e nnoho i Jerusalem, nnoho mai hagalaangona agu muna gi tonu ange ai goodou.

¹⁵ De gau nei tigi ssenga donu i de unu, bei doodou hai e maanadu ai naa. Go hiidinga iainei gu daa donu huu ssiva i taiao.

¹⁶ Gai aanei muna a de pelaabisi go Joel gu tala laa, e hai ange:

¹⁷ ‘E hagadaba de Maadua: Denga laangi hagaodi naa huu, gai au e hai naa gi hano iho dogu Hagasaalunga gi honga o dangada alodahi. Gai oodou dama daane ma damaa hine e pasa pelaabisi naa; oodou dama daane e midi naa denga midi hagaago ange, gai oodou daane madumaatua e hai naa denga midi.

¹⁸ Ogu daane ma haahine hai hegau, gai au e gaavange naa gi gilaadeu dogu Hagasaalunga i laangi laa, gai gilaadeu ga pasa pelaabisi ai naa.

¹⁹ Gai au e hai naa denga mee hagalele mouli i lo te langi i lunga, ma de hai denga sauaa i henua i lalo, i dodo, ma de ahi, aama de useahi maadolu.

²⁰ De laa e hagagohu naa, gai de maasina e bei naa denga dodo i mua de dae mai o de laangi maolunga ma de hagamaatagu o Tagi Maolunga.

²¹ Gai be goai e hagahia ange Tagi Maolunga gai ia e hagamouli.’

²² De gau Israel, nnoho mai hagalaangona muna nei: Iesu taane Nazareth gu lava i de hagaago danuaa adu a de Maadua gi goodou i denga hegau sauaa ma mee hagalele mouli, aama hagailonga, i mee a de Maadua ne hagahai hegau i ono daha i oodou magavaa, bei doodou hai gu iloo ai naa.

²³ Taane nei ne daa ga magau bei dagodo de hagatau ma de iloo mee o de Maadua mai i taamada age, gai goodou ne gaavange ia ga daudau i de laagau lui ma de daa ia ga magau i daho de gau baubau.

²⁴ Aagai de Maadua gu hagamouli age hogi ia ma de hagaola ia mai i ssauaa o de magau, go hiidinga de magau e dee maua donu i de daohi ia.

²⁵ David ne tala dagodo o Tagi Maolunga, ga hagadaba, ‘Au ne gidee Tagi Maolunga i ogu mada i mua i masavaa alodahi. Go hiidinga ia e noho i dogu baasi madau, au e dee maua naa donu gi ngalungalue.

²⁶ Deenei ai, ogu lodo gu malangilangi, gai dogu alelo gu tuhi; gai e dahi agu tali i de mouli nei.

²⁷ Go hiidinga koe e dee tili naa donu au i de mommee o de gau maakau, be e dugu ange de angaanga o dau Ia Dabu gi bobo.

²⁸ Koe gu hagaago mai gi de au de haiava o de mouli, gai koe e hagamalangilangi au i doo noho madali au.’

²⁹ Denga daina, au e lodo e tala adu gi goodou dagodo o tamana hagadubu go David. Ia ne magau ga danu, gai dono mommee ne danu ai goi dagodo donu huu i odaadeu daha ga dae mai ai gi anailaa nei.

³⁰ Gai ia se pelaabisi, deenei ai, ia ne iloo bolo de Maadua gu lava i de hagatoo donu bolo ia e hai naa dahi dangada mai i dono aamuli gi noho i honga dono nohoanga hodooligi.

³¹ David ne gidee i mua gai ia ga tala dagodo o de mouli age o de Klisdo, ga hagadaba, bolo ia tee tili donu huu i de mommee o de gau maakau, aabe ne dugu dono angaanga gi bobo.

³² Deenei Iesu a de Maadua ne hagamouli age laa, gai gimaadeu alodahi e tala hagadonu mee nei.

³³ Deenei ai, ia gu noho i de baasi madau o de Maadua, gai gu kave de Hagasaalunga Dabu gu lava laa i de hagatoo donu i daho Tamana, ma gu hai ia gi hano iho, bei doodou hai gu gidee ai naa ma de langona.

³⁴ David tee hanage gi de langi; aagai ia ne hagadaba, ‘Tagi Maolunga ne hai ange gi dogu Ia Aamua, “Noho i dogu baasi madau

³⁵ ga dae ai gi dagu hai oo hagadaumee go de mommee e dugu ange aagena luoo vae.” ’

³⁶ Deenei ai, de gau Israel alodahi gi tonu ange gi de mee nei: de Maadua gu hai Iesu go Tagi Maolunga ma de Klisdo, deenei donu Iesu oodou ne daudau laa i de laagau lui.”

³⁷ De masavaa a dangada ne langona ai muna nei, gai gu velosia olaadeu lodo, gai gilaadeu ga hai ange gi Peter ma de gau tala ange laa, “Denga daina, ni aha ai amaadeu e hai?”

³⁸ Peter ne hai ange gi gilaadeu, “Goodou alodahi daahuli gee i oodou haisala, ga babudaisi i de ingoo o Iesu Klisdo, gi maatala ai oodou haisala. Gai goodou ga kave ai de mee ngadi gaamai go de Hagasaalunga Dabu.

³⁹ De hagatoo donu nei se mee adu gi goodou ma oodou dama, aama dangada e mmao gee laa; go dangada alodahi a Tagi Maolunga de Maadua e hagahi.”

⁴⁰ Gai ne lagolago ana mee ne tala ange ma de tala hagadonu ange aama de hagammahi ange gilaadeu, ga hai ange, “Goodou hagaola ina goodou mai i de hagaduasala gu dai gaavange gi de atangada baubau nei!”

⁴¹ Gai gu soa dangada ne hagadonusia ana muna ga babudaisi, gai gu dolumano ange dangada ne hagapuni ange gi denga daina.

De nnoho hagabuni o dangada gu hagadonusia

⁴² Gai gilaadeu nei ne hagaduu ngae ga daudali i agoago a de gau tala ma de hagabuni madali gilaadeu ga gaimee ma de dalodalo.

⁴³ Gai dangada alodahi gu llele mouli, i denga mee hagalele mouli ma hagailonga a de gau tala gu hai.

⁴⁴ Gai gilaadeu alodahi gu hagadonusia ne hagabuni i de mommee daudahi ma de hagadau hai mee i alaadeu mee alodahi.

⁴⁵ Gilaadeu ne hagao gi daha olaadeu alahenua ma alaadeu goloa ga duha hagahedae ai dangada alodahi e duasala.

⁴⁶ Laangi alodahi gilaadeu e hagabuni i de temple i de lodo daudahi, ma de hagabuni ga gaimee i olaadeu hale ma de malangilangi aama de hagadau abodonu,

⁴⁷ ma de tuhi de Maadua, gai dangada alodahi gu hagadubu gilaadeu. Gai Tagi Maolunga ga hagapuni ange hogi gi gilaadeu dangada gu hagamouli i laangi alodahi.