Acts 19 - De Beebaa Dabu

Paul i Ephesus

¹ De masavaa o Apollos e noho ai i Corinth, gai Paul ne hano laa uda ga hano ai ga dae gi Ephesus. Gai ia ne hedae ange gi hanu dangada agoago i kilaa.

² Gai ia ne ssili ange gi gilaadeu, “Goodou ne kave laa de Hagasaalunga Dabu i de masavaa oodou ne hagadonu ai?” Gilaadeu ne hai ange gi de ia, “E deai, gimaadeu tigi langona donu hogi bolo e dahi Hagasaalunga Dabu.”

³ Gai a Paul ga ssili ange, “Gai se babudaisi bee hee oodou ne babudaisi ai?” Gilaadeu ne hai ange, “Go de babudaisi a John.”

⁴ Gai ia ga hai ange, “A John ne babudaisi ange gi de dahuli o de lodo. Gai ia ne hai ange gi dangada gilaadeu gi hagadonusia de ia gu dai humai laa i ono dua, go Tagi Maolunga go Iesu”

⁵ Gai ga langona huu e dangada mee nei, aagai gilaadeu gu babudaisi i de ingoo o Tagi Maolunga go Iesu.

⁶ Gai de masavaa huu a Paul ne dugu ange ai luoono lima gi olaadeu elunga, gai de Hagasaalunga Dabu gu hano gi olaadeu elunga. Gai gilaadeu ga pasa i denga hagadaagangaa muna ma de pasa pelaabisi.

⁷ Gai se dinoangahulu ma dogolua daane laa alodahi.

⁸ Paul ne hano hogi gi de synagogue i e dolu malama, ga agoago ai i de lo taane ma de usuusu ange dangada i dagodo de nohoanga hodooligi o de Maadua.

⁹ Aagai hanu ne hagamakaga olaadeu lodo; gilaadeu tee llodo e hagadonu, gai ne hagabaubau dagodo o de Haiava i madamada o dangada. Gai a Paul ne hano gee i olaadeu daha, ga kave denga dangada agoago madali ia, gai laangi alodahi gilaadeu ne hagabuni ga madaangudu i de mommee hagabuni o Tyrannus.

¹⁰ Gai Paul ne agoago i kilaa i e lua ngadau. Gai de gau Ssuu ma de gau Greek alodahi e nnoho i de ungaamee o Asia gu langona muna a Tagi Maolunga.

Dama daane a Sceva

¹¹ Gai de Maadua ne hai denga sauaa hagalele mouli i daho Paul,

¹² gai dangada ne kave denga hangiseebe ma malo o Paul ga dugu ange gi honga o denga magi, gai gilaadeu gu ieiangi, gai denga hagasaalunga baubau gu ssao ga hulo gee mai i daho dangada.

¹³ Gai hanu dangada Ssuu e haia laa gi hulo gee denga hagasaalunga baubau ne hagatale de hai gi hulo denga hagasaalunga baubau i de ingoo o Tagi Maolunga go Iesu, ga hai ange, “Gimaadeu e hai adu goodou gi ssao mai i de ingoo o Iesu o Paul e agoago ai laa.”

¹⁴ Denga daane ne haia de hegau nei go dama daane dogohidu a Sceva, dahi dangada haimeedabu maolunga o de gau Ssuu.

¹⁵ Aagai de hagasaalunga baubau laa ne hai ange gi gilaadeu, “Au e iloo Iesu, au e iloo hogi a Paul, gai go goodou goai?”

¹⁶ Gai tangada iai laa de hagasaalunga baubau ga lele ange ga daa gilaadeu, gai gilaadeu ga savini ga hulo gee mai i de hale laa, gu deai olaadeu malo ma de lagolagohia.

¹⁷ Gai longo o mee laa gu dele i magavaa o de gau Ssuu ma de gau Greek alodahi e nnoho laa i Ephesus. Gai gilaadeu alodahi gu maatagu mmao, gai dangada gu hagadubu de ingoo o Tagi Maolunga go Iesu.

¹⁸ Gai gu soa hogi dangada gu hagadonusia laa ga loomai ga tala dagodo o alaadeu hegau baubau gu hai.

¹⁹ Gai gu soa dangada hai huuhuaa mee ne gaamai alaadeu beebaa ga dudu i madamada o dangada alodahi. Gai gilaadeu ne kumi ange bolo de hagaoanga o mee laa se limasemada selevaa.

²⁰ Deelaa ai, muna a Tagi Maolunga gu ssula danuaa ma de hagadagadaga age i kilaa.

De hellumi o dangada i Ephesus

²¹ Dua mee nei, gai Paul ne maanadu de hano laa Macedonia ma Achaia e hano ai gi Jerusalem. Ia ne hagadaba hogi, “Dua dogu hano gi kilaa, gai au e hano hogi gi dae gi Rome.”

²² Gai ia ne hai gi hulo e dogolua daane e balea ange ia, go Timothy ma Erastus, gi Macedonia. Aagai ia ne noho i Asia i dahi damaa masavaa.

²³ De masavaa laa gai ne hellumi dangada i hiidinga o de Haiava.

²⁴ Go hiidinga Demetrius, go dahi labagau o denga selevaa, gai ia e hai denga temple o tiinonga hahine go Artemis, gai denga labagau ne maua ai hanu sseene lagolago.

²⁵ Taane laa ne hagabuni denga labagau bei ono dagodo, ga hai ange, “Denga daane, goodou e iloo bolo taadeu hegau nei e hai gi hagadaga ange taadeu lava.

²⁶ Gai goodou gu gidee ma de iloo bolo taane go Paul gu hagabasa dangada soa i Ephesus, ma mommee alodahi o Asia, gilaadeu gi dee hagadonusia mee nei, ma de hagadaba bolo denga diinonga a dangada e hai e dee ni maadua abodonu.

²⁷ Gai e dee hagamanavasaa ange donu huu gi taadeu hegau, aagai de temple o tiinonga maolunga go Artemis gu hagangadi mee ina hogi. Gai de mahamaha o tiinonga a dangada i Asia aama henua i lalo alodahi e daumaha ange laa aagena, e hagadeai naa hogi.”

²⁸ Gai ga langona huu e gilaadeu muna laa, aagai gilaadeu gu llili mmao, gai gilaadeu ga oo ga hagataba, “Artemis o Ephesus e maolunga mmao!”

²⁹ Gai de aduhale laa alodahi gu hellumi, gai dangada ga poo Gaius ma Aristarchus, luu daane Macedonia madali a Paul, ga tagi gilaadeu ga saavini ai gi de mommee e tilo ai hagadaahao,

³⁰ Gai Paul ne lodo donu e hano gi mada i mua o dangada soa laa, aagai denga daina tee dugu ange;

³¹ gai hanu dagi o Asia ni soa niio Paul, gilaadeu ne aalu mai ga dangidangi ange, ia gi dee ulu gi lo te mommee hagadaahao.

³² Gai dangada soa i lo te mommee laa gu hellumi, hanu ne hevaalogi i dahi mee, gai hanu ne hevaalogi i dahi mee gee, gai e soa gilaadeu tee iloo donu be aahee hiidinga olaadeu ne hagabuni mai ai laa gi kilaa.

³³ Gai de gau Ssuu ne usu Alexander gi mada i mua, gai hanu i magavaa o dangada ne tala ange ana mee e hai. Gai Alexander ga daohi age dono lima ga hai gilaadeu gi dee hagalongaa, gi maua ai e ia i de tala ange dono donu ange gi dangada.

³⁴ Aagai ga iloo huu e dangada bolo ia se daane Ssuu, gai gilaadeu ga hevaalogi i e lua aoaa, ga hagataba, “Artemis o Ephesus e maolunga mmao!”

³⁵ Gai de masavaa a tangada sisi o de aduhale ne hai ai gi dee hagalongaa dangada soa, gai ia ne hai ange gi gilaadeu, “Dangada o Ephesus, e dahi nei dangada i henua i lalo e dee iloo bolo Ephesus go de aduhale iai de temple o Artemis maolunga, ma dono diinonga ne doo iho laa i de langi?

³⁶ Deenei ai, go hiidinga muna nei e dee maua donu i de hagahadu muna, e heohi doodou dee hagalongaa gai gi dee hagamoolau gi haia dahi mee daudahi.

³⁷ Goodou gu gaamai denga daane nei gi kinei, e dagodo be gilaadeu gu gaiaa hanu mee i lodo hale daumaha, aabe gu tala hanu muna e hai baasi ange ai gi taadeu diinonga.

³⁸ Deenei ai, noo Demetrius ma ono soa e hanu alaadeu mee e hagabaubau ai dahi dangada, gai gilaadeu gi hulo gi de mommee hagamodu muna ma daho denga dagi, ga hagabaubau ai gilaadeu i kilaa.

³⁹ Aagai noo e hanu ange mee oodou e llodo e ssili, gai goodou hagamodu ina i de hainga i de masavaa e hagabuni ai dangada.

⁴⁰ Gidaadeu e maua donu gi too ange gi lo te hainga ma de hagabaubau ina, i hiidinga o de hellumi ne hai nei anailaa nei. Gai gidaadeu e dee maua i de hagaheohi de hellumi ne hai nei i kinei, go hiidinga teai donu se hiidinga ne hai ai.”

⁴¹ Gai ga lava huu i de tala a Alexander muna nei, gai ia ga hai gi hulo dangada gu hagabuni laa i kilaa.