Acts 18 - De Beebaa Dabu

Paul, Timothy ma Silas i Corinth

¹ Dua mee laa gai a Paul ne hano gee i Athens ga hano gi Corinth.

² Gai ia ne hedae ange gi dahi daane Ssuu, dono ingoo go Aquila, se daane mai i Pontus, gai gilaau ma dono bodu go Priscilla se goodo loomai donu huu i Italy, go hiidinga Claudius ne alualu de gau Ssuu alodahi gi hulo gee mai i Rome. Gai Paul ne hano ga hedae ange gi gilaau,

³ gai go hiidinga gilaadeu alodahi ni dangada hai hale malo, gai ia ga noho ga hai hegau madali gilaau.

⁴ Gai denga Sabbath alodahi gai Paul ne madaangudu ange i synagogue ma de usuusu ange de gau Ssuu ma de gau Greek gi daahuli.

⁵ De masavaa o Silas ma Timothy ne tae mai ai i Macedonia, gai a Paul gu dee saohia i de agoago ma de tala hagadonu ange gi de gau Ssuu, bolo Iesu go de Klisdo donu.

⁶ Gai de masavaa huu a dangada i kilaa ne hai baasi ange ai ma de hagabaubau ia, gai ia ga luuluu gelegele i ono malo, ga hai ange gi gilaadeu, “Doodou maakau e dau donu huu gi goodou! Au e dee haisala ai donu. Dua iainei gai au e hano naa e agoago ange denga Gentile.”

⁷ Gai ia ga hano gee mai i kilaa ga hano gi de hale o taane dono ingoo laa go Titius Justus, se daane e daumaha ange gi de Maadua, gai dono hale e baa ange gi synagogue.

⁸ Gai Crispus, tagi o synagogue gu hagadonusia hogi Tagi Maolunga, madali dangada alodahi i dono hale, gai gu soa hogi dangada Corinth ne hagadonusia i delaadeu langona muna a Paul, gai gilaadeu gu babudaisi.

⁹ Gai Tagi Maolunga ne hai ange gi a Paul i de midi hagaago ange i dahi boo, “Aude madagu donu, aagai koe duudagina ina de agoago, aude hagapunidia doo ngudu;

¹⁰ go hiidinga au e noho madali goe, gai e deai naa donu se dangada e maua i de hagammae aabe go de hagaduasala goe; go hiidinga e soa donu ogu dangada i de aduhale nei.”

¹¹ Gai ne dahi ngadau ma de bido o Paul ne noho ai i kilaa, ga agoago ange ai dangada i muna a de Maadua.

¹² Aagai de masavaa huu a Gallio ne dagi ai Achaia, gai de gau Ssuu ne hagabuni ga hai baasi ange gi a Paul, ga kave ia gi de mommee hagamodu muna,

¹³ ga hai ange, “Taane nei ne usuusu ange dangada gi daumaha ange gi de Maadua i de hai e hai baasi ange gi de hainga.”

¹⁴ Aagai de masavaa huu o Paul ne daamada ai de basa, gai Gallio ga hai ange gi de gau Ssuu, “De gau Ssuu, noo goodou ne gaamai taane nei i hiidinga ana hegau dee heohi, aabe go dana oha de hainga, gai au e maua i de golomagi ogu lodo adu gi goodou;

¹⁵ aagai go hiidinga o hanu muna ma hanu ingoo aama oodou hainga donu, deelaa ai, goodou hagamodu ina donu huu ono muna; e dee go au e hagamodu ina mee naa.”

¹⁶ Gai Gallio ga alualu gilaadeu gi hulo gee mai i de mommee hagamodu muna.

¹⁷ Gai de gau Ssuu ga poo Sosthenes, tagi o synagogue ga hagailiili ia i gaogao de mommee hagamodu muna. Aagai Gallio e dee anga ange donu gi alaadeu mee ne hai.

De ahe o Paul gi Antioch

¹⁸ Dua mee laa gai a Paul ne noho i Corinth i dahi masavaa daulooloa. Muli mai gai ia ne dugu hogi denga daina i kilaa, gai ia ga dele ga hano gi Syria madali Priscilla ma Aquila. Gai ia ne dahi dono biho i Cenchrea, go hiidinga ia gu hai dahi hagatoo donu soe.

¹⁹ Gai ga tae huu gilaadeu gi Ephesus, gai a Paul ga dugu Priscilla ma Aquila i kilaa. Gai ia ne hano gi lo te synagogue ga madaangudu ange ai gi de gau Ssuu.

²⁰ Gai de masavaa alaadeu ne dangidangi ange ia gi damaa noho ange i olaadeu daha, gai ia tee lodo.

²¹ Aagai dono masavaa ne malanga ai e hano, gai ia ne hai ange gi gilaadeu, “Au e ahe mai naa donu gi oodou daha, noo go lodo o de Maadua.” Gai ia ga malanga ga hano gee mai i Ephesus.

²² Gai dono masavaa huu ne dau ai i Caesarea, gai ia ga doo age e hagaboo ange gi de nohoanga dabu i kilaa, i mua dono hano gi Antioch.

²³ Dua dono noho i kilaa i hanu laangi, gai ia ne hano hogi laa Galatia ma Phrygia ga hagammahi ange ai lodo o dangada alodahi gu hagadonusia.

Apollos i Ephesus ma Corinth

²⁴ Gai e dahi daane Ssuu dono ingoo go Apollos, ia se daane mai i Alexandria, gai gu humai gi Ephesus. Ia se daane heiangi i de basa i honga o dangada gai ia e iloo de Beebaa Dabu.

²⁵ Gai ia ne agoago i dagodo o de haiava o Tagi Maolunga, gai se daane lodo mmahi, gai ne heohi dana hai ne tala ai ma de agoago ange ai dangada i dagodo o Iesu, gai go de babudaisi donu huu a John aana e iloo.

²⁶ Gai ia tee madagu i de agoago i lo te synagogue. Gai de masavaa huu a Priscilla ma Aquila ne langona ai ana agoago, gai gilaau ga kave ia ga agoago ange, gi kii ange ai dono donu ange gi dagodo o de haiava o de Maadua.

²⁷ De masavaa huu o Apollos ne lodo ai e hano gi Achaia, gai denga daina ga hagammahi ange ia gi hano, ma de sisi ange dahi leda gi denga daina i Achaia, gilaadeu gi abodonu ange gi de ia. De masavaa o Apollos ne dae ai gi kilaa, gai ia ne bale danuaa ange gilaadeu gu hagadonusia i de abodonu e dohu ange laa gi gilaadeu.

²⁸ Gai ia ne hai ga dee mmuu de gau Ssuu i madamada o dangada alodahi, i dana tala hagadonu mai i de Beebaa Dabu bolo Iesu go de Klisdo.