Acts 17 - De Beebaa Dabu

Paul ma Silas i Thessalonica

¹ Aagai gilaau ne hagadaga i Amphipolis ma Apollonia ga hulo ai gu tae gi Thessalonica, se mommee iai dahi synagogue o de gau Ssuu.

² Gai a Paul e hano gi lo te synagogue bei ana hegau i de laa tubua, gai ia ne madaangudu ange gi gilaadeu i muna a de Beebaa Dabu i e dolu Sabbath,

³ ga hagadonu ange ma de hai gi iloo e gilaadeu bolo ne heohi donu de hagaduasala o Klisdo ma dono mouli age, ga hai ange, “Taane go Iesu aagu e tala adu nei ono dagodo gi goodou, go de Klisdo donu.”

⁴ Gai hanu gilaadeu ne hagadonusia ana muna ga hagabuni ange gi a Paul ma Silas; gai ne soa hogi dangada Greek gu daumaha ange laa gi de Maadua, ma hanu haahine maolunga ne hagadonusia.

⁵ Aagai de gau Ssuu gu magiaa, gai gilaadeu ga gaamai hanu dangada baubau i de mommee e hagabuni ai dangada, ga hai dangada gi haia gi hellumi de aduhale. Gai gilaadeu ga saavini gi de hale o Jason e saalaa ai a Paul ma Silas, e hagassao mai ai gilaau gi daho de gau soa laa.

⁶ Gai ga dee gidee huu e gilaadeu a Paul ma Silas, gai gilaadeu ga dada mai Jason ma hanu dangada gu hagadonusia laa, ga kave gi mada i mua o dagi o de aduhale laa. Gai gilaadeu ga hevaalogi ga hagataba, “Go denga daane nei ne haia ga hellumi henua i lalo, gai gilaadeu gu loomai hogi gi kinei,

⁷ gai Jason ne abodonu ange gi gilaau i dono hale. Gai gilaadeu alodahi e hai baasi ange gi hainga a Caesar gu hagailoo, ma de hagataba bolo e dahi ange hodooligi, dono ingoo go Iesu.”

⁸ Aagai dangada ma denga dagi o de aduhale gu dee paba olaadeu lodo i delaadeu langona muna laa.

⁹ Gai dua huu delaadeu hai Jason ma ono soa gi hagao ina dahi daelodo sseene, gai gilaadeu ga dugu gilaadeu gi hulo.

Paul ma Silas i Berea

¹⁰ Gai denga daina ne hagamoolau ga hai gi hulo a Paul ma Silas i de boo gi Berea. Gai ga tae huu gilaau gi kilaa, gai gilaau ga hulo hogi gi de synagogue o de gau Ssuu.

¹¹ Gai de gau Ssuu i de mommee laa e kii ange de maalama olaadeu lodo i de gau Ssuu i Thessalonica, gilaadeu ne malangilangi donu i de hagallongo muna laa. Gai gilaadeu ne dau de Beebaa Dabu i laangi alodahi ga tilo ai be muna a Paul ni muna abodonu be deai.

¹² Deelaa ai, gu soa gilaadeu ne hagadonusia. E hanu hogi haahine maolunga ma dangada Greek soa ne hagadonusia.

¹³ Aagai de masavaa huu a de gau Ssuu i Thessalonica ne langona ai bolo a Paul gu agoago hogi muna a de Maadua i Berea, gai gilaadeu ga hulo hogi gi kilaa ga hai ai gi dee buni, ma de hellumi dangada soa i kilaa.

¹⁴ Aagai denga daina ne hagamoolau ga hai a Paul gi hano gi tagudai; gai Silas ma Timothy ne nnoho i Berea.

¹⁵ Gai dangada ne hulo laa madali Paul ne kave ia ga dae gi Athens, gai gilaadeu ga aahe gi Berea ga kave muna a Paul ange gi Silas ma Timothy, gilaau gi loomai gi ono daha i de masavaa moolau.

Paul i Athens

¹⁶ Gai de masavaa o Paul e noho ai ma e tali gilaau i Athens, gai ia gu daemaha ono lodo i dana gidee bolo de aduhale laa e honu i denga diinonga.

¹⁷ Deelaa ai, ia ne hagadaumee ange gi de gau Ssuu i lo te synagogue ma denga Gentile gu daumaha ange laa gi de Maadua, aama dangada i de mommee e hagabuni ai dangada i de laa tubua.

¹⁸ Gai hanu dangada i de hagabuulinga e hagaingoo ange laa go de Epicurean ma Stoic ne hagadaumee ange gi de ia. Hanu ne ssili, “Ni muna aha hogi a taane vava de ngudu e tala nei?” Hanu ne hagataba, “Ia e agoago i dagodo o hanu diinonga gee.” Gilaadeu ne tala muna nei i hiidinga de agoago a Paul dagodo o Iesu ma de mouli age.

¹⁹ Gai gilaadeu ga poo ia ga kave gi de mommee hagabuni o de hagabuulinga hagasaele, go de Areopagus, ga hai ange, “Gimaadeu e llodo gi iloo e gimaadeu dagodo o denga mee hoou oou e agoago ai naa.

²⁰ Go hiidinga gimaadeu gu langona hanu mee hoou i oo daha, gai gimaadeu e llodo gi iloo e gimaadeu hagadoonunga o mee naa.”

²¹ (Gai de gau Athens ma de gau henua gee e nnoho laa i kilaa e deai donu alaadeu hegau e hai, aagai gilaadeu e hagabuni donu huu ma e madaangudu i longo ma de hagallongo mee hoou alaadeu gu langona.)

²² Aagai Paul ne duu age i mada i mua o de hagabuulinga hagasaele o de Areopagus ga hai ange, “Dangada o Athens! Au gu gidee bolo goodou ni dangada donu e llodo i denga hagadaagangaa hai daumaha.

²³ I hiidinga de masavaa oogu ne hagadaga ai ga tilo oodou mee e daumaha ange aagena, gai au ne gidee dahi mommee o ssigidaumaha e sisi ange aagena muna nei: ‘Ange gi de Maadua e dee iloo laa’. Gai goodou e dee iloo donu dagodo o de mee oodou e daumaha ange naa aagena — gai au e tala adu gi iloo ai e goodou.

²⁴ De Maadua ne haia laa henua i lalo ma mee alodahi iai, go Tagi Maolunga o de langi ma henua i lalo, aagai ia e dee noho i lodo temple e hagatuu i lima o dangada.

²⁵ Gai e dee ni dangada e hai hegau ange gi de ia, e dagodo be ia e duasala i dahi mee. Aagai go ia donu e gaavange gi dangada alodahi de mouli, ma de madangi olaadeu e manamanava ai aama mee ange alodahi.

²⁶ Gai ia ne hai denga huaahenua alodahi i daho dahi dangada daudahi, gai gilaadeu ga nnoho ai i honga henua i lalo alodahi. Madagidagi gai ia gu hagamodu denga masavaa ma goinga o olaadeu mommee e nnoho ai,

²⁷ gai gilaadeu ga ssala ai de Maadua, agu made gilaadeu e maua i de ssala ga gidee ia. Aagai ia e dee mmao gee donu mai i dahi gidaadeu.

²⁸ Go hiidinga ‘go ia odaadeu e mouli ai ma de ngalungalue aama de nnoho ai nei’. Bei de hai a hanu oodou dangada e haia denga dau gu tala ai laa, ‘Gidaadeu go dono hagadiilinga.’

²⁹ Deenei ai, go hiidinga gidaadeu go hagadiilinga o de Maadua, gidaadeu gi dee hagataba bolo de Ia Dabu laa e bei dagodo goolo ma selevaa, aabe go hadu — se mee ne hagahua ma de hai i de labagau o tangada.

³⁰ I mua gai de Maadua tee anga ange gi de ssenga o dangada, aagai iainei ia e hai ange gi dangada i mommee alodahi gilaadeu gi daahuli olaadeu lodo.

³¹ Go hiidinga ia gu hagatau dahi laangi e hagamodu ai muna o dangada i henua i lalo i de heohi, i daho tangada aana gu hili. Ia ne hagadonu de mee nei i madamada o dangada i dana hagamouli age ia i de magau.”

³² Gai ga langona huu e gilaadeu dagodo o de mouli age o de gau maakau, gai hanu gilaadeu ga doo ai mee, aagai hanu ne hai ange, “Gimaadeu e llodo koe gi daalaa mai ange mee nei e hagallongo gimaadeu.”

³³ Gai Paul ne hano gee mai ai i olaadeu daha.

³⁴ Aagai hanu gilaadeu ne hagabuni ange gi de ia ma de hagadonusia ana muna, go Dionysius, dahi daane e dau laa i de hagabuulinga hagasaele go de Areopagus, aama de hine go Damaris, gai e hanu ange dangada madali gilaau.