Acts 16 - De Beebaa Dabu

Timothy gu madali Paul ma Silas

¹ De masavaa huu o Paul ne dae ai gi Derbe ma Lystra, gai ia gu hedae ange gi dahi dama daane gu hagadonusia laa, dono ingoo go Timothy, dono dinana se hine Ssuu gu hagadonusia, aagai dono damana se daane Greek.

² Gai ia se dama daane e duuhia i daho denga daina i Lystra ma Iconium.

³ Gai a Paul ne lodo e kave Timothy madali ia, deelaa ai, ia ne tuu dagaholiage Timothy i hiidinga o de gau Ssuu e nnoho laa i kilaa; gilaadeu alodahi e iloo bolo tamana o Timothy se daane Greek.

⁴ De masavaa olaadeu ne hagadaga ai i denga aduhale, gai gilaadeu ne tala ange mee gu hagamodu laa i daho de gau tala, ma denga dagi i Jerusalem, gi daudali ai dangada i mee laa.

⁵ Gai denga nohoanga dabu gu lodo mmahi i de gai ma de hagadaga ange de soa dangada e dau ai i laangi alodahi.

De midi o tangada mai i Macedonia

⁶ Gai gilaadeu ne hagadaga hogi i mommee i Phrygia ma Galatia, go hiidinga de Hagasaalunga Dabu tee dugu ange gilaadeu gi agoago ina de longo danuaa i Asia.

⁷ Gai de masavaa huu olaadeu ne tae ai gi gaogao o Mysia, gai gilaadeu ga hagatale de hulo gi Bithynia, gai de Hagasaalunga o Iesu ne daohi gilaadeu gi dee hulo.

⁸ Deelaa ai, gilaadeu ne hulo laa Mysia ga loiho ai gi Troas.

⁹ De boo laa gai Paul ne hai dahi midi hagaago ange; ia ne gidee dahi dangada Macedonia e duu ma e dangidangi ange gi de ia ma e hai ange, “Humai gi Macedonia balea mai ai gimaadeu.”

¹⁰ Dua dana hai de midi laa, gai gimaadeu ne hagamoolau e hai e hulo gi Macedonia, go hiidinga gimaadeu ne hagataba bolo de Maadua gu hagahi mai gimaadeu gi hulo gi agoagona ange de longo danuaa gi dangada i kilaa.

De dahuli lodo o Lydia

¹¹ Deelaa ai, gimaadeu ne dele mai i Troas ga hagassoe gi Samothrace, gai gimaadeu ne hulo ga tae gi Neapolis i de laangi i ono dua,

¹² gai ne dele mai i kilaa ga hulo gi Philippi, se aduhale hagamogomogo i de ungaamee o Macedonia, gai se mommee niio de gau Rome. Gai gimaadeu ne nnoho i de aduhale laa i hanu laangi.

¹³ Gai de laangi huu o Sabbath, gai gimaadeu ga hulo gi tua de aduhale i gaogao dahi vai, gimaadeu ne maanadu bolo e dahi mommee e dalodalo ai i kilaa; gai gimaadeu ne nnoho ga madaangudu ange gi denga haahine gu hagabuni mai laa gi kilaa.

¹⁴ Gai e dahi hahine i kilaa ne langona amaadeu agoago, dono ingoo go Lydia. Ia se hine e hagao ina denga malo purple, gai se hine mai i Thyatira e daumaha ange gi de Maadua. Gai Tagi Maolunga ne hhuge ono lodo gi hagalaangona ai e ia muna a Paul.

¹⁵ Aagai dua huu dono babudaisi madali dangada alodahi i dono hale, gai ia ne dangidangi mai gimaadeu, ga hai mai, “Noo goodou e hagataba bolo au gu hagadonusia abodonu Tagi Maolunga, gai goodou loomai nnoho i dogu hale.” Gai ia ne usuusu mai gimaadeu ga dae ai gi demaadeu uaa ange.

Paul ma Silas i lo te hale pono i Philippi

¹⁶ Dahi laangi gai gimaadeu ne hulo gi de mommee dalodalo, gai gimaadeu ne hedae ange gi dahi damaa hine gu noho ai dahi hagasaalunga baubau, e daalaa laa mee tigi loomai. Gai ne hai ga lagolago sseene a dono dangada aamua i dana tala mee tigi loomai.

¹⁷ Aagai tamaa hine laa ne daudali mai i gimaadeu ma Paul, gai ia ne oo ga hagadaba, “Denga daane nei ni dangada hai hegau niio de Maadua Maolunga Mmao laa. Gilaadeu e tala adu doodou hai e hagamouli ai.”

¹⁸ Gai ne lagolago laangi aana ne hai ai de hegau nei. Aagai a Paul gu daemaha, gai ia ga huli dua ga hai ange gi de hagasaalunga baubau, “Au e hai adu gi de goe i de ingoo o Iesu Klisdo, sao mai i ono daha.” Gai de hagasaalunga baubau gu sao mai i de masavaa laa donu huu.

¹⁹ Aagai de masavaa huu a ono dangada aamua ne gidee ai bolo gu deai se mee e hai ai gi lagolago alaadeu sseene, gai gilaadeu ga poo a Paul ma Silas ga dada gi mada i mua o denga dagi i de mommee e hagabuni ai dangada;

²⁰ gai gilaadeu ne kave gilaau gi daho denga dagi maolunga o de aduhale, ga hai ange, “Luu daane nei ni dangada Ssuu, gai gilaau e hakoso taadeu aduhale,

²¹ i delaau agoago mai gidaadeu, de gau Rome, gi daudali i dahulinga e dee heohi taadeu hai hegau ai.”

²² Aagai dangada soa i kilaa ne hai baasi ange gi gilaau, gai dagi o de aduhale laa ga saesae malo o Paul ma Silas ga hagataba bolo gi hagailiilia gilaau.

²³ Dua de kona delaau hagailiilia, gai gilaau gu tili ange gi lo te hale pono. Gai gu tala ange gi taane hagaloosi, ia gi kana ange gi hagaloosia ange gilaau.

²⁴ Gai ga langona huu e ia muna laa, gai taane hagaloosi laa ga tili ange gilaau gi lo te mommee e mua gi lodo i de hale pono, ga hagamakaga ange olaau vae gi laagau hagamakaga.

²⁵ Aagai lo te boo huu gai a Paul ma Silas ga dalodalo, ma de daahili ange gi de Maadua, gai dangada i lo te hale pono ne hagallongo delaau daahili ma de dalodalo.

²⁶ De masavaa laa donu huu gai gu ngalungalue de henua, gai de hale pono laa alodahi gu ngalungalue; ono abaaba alodahi gu maahuge, gai denga daula baalanga e noonooa ai laa dangada gu maatala.

²⁷ Gai de masavaa huu o taane hagaloosi o de hale pono ne alahage ai ga gidee denga abaaba o de hale pono gu maahuge, gai ia ga dada dana gadilaasa e velo ai donu huu ia gi magau, go hiidinga ia ne maanadu bolo dangada i lo te hale pono gu odi i de sasao ma gu hulo.

²⁸ Gai Paul ne basa ange gi de ia i de leo laumalie, ga hai ange, “Aude hagalagohia ina goe! Go hiidinga gimaadeu alodahi e nnoho i kinei!”

²⁹ Gai taane laa ga hagahi gi gaamai dahi laama, gai ia ga ulu gi lodo gu bolebole ma de madagu ga duuduli ga ino gi lalo i mada i mua o Paul ma Silas,

³⁰ gai ia ga hagassao mai gilaau gi duaahaho, ga ssili ange, “Luu daane nei, se aha aagu e hai gi hagamouli ai au?”

³¹ Gai Paul ma Silas ne hai ange, “Koe gi hagadonusia Tagi Maolunga go Iesu, gai koe aama dangada alodahi i doo hale gu hagamouli.”

³² Gai gilaau ne agoago ange muna a Tagi Maolunga gi de ia ma dangada i dono hale.

³³ Gai taane hagaloosi ne kave gilaau i de masavaa laa donu huu ga hhui olaau maanuga; gai gilaadeu ma dangada alodahi i dono hale ne babudaisi i de masavaa laa.

³⁴ Ia ne kave hogi gilaau gi dono hale, ga haangai gilaau. Aagai ia ma dangada alodahi i dono hale gu malangilangi, go hiidinga gilaadeu gu hagadonusia de Maadua.

³⁵ Gai taiao age huu, gai dagi o de aduhale ga hai gi hulo hanu daane gi daho tangada hagaloosi gi hai ange, “Dugua luu daane naa gi hulo.”

³⁶ Gai taane hagaloosi o de hale pono ga tala ange muna laa gi a Paul, ga hai ange, “Dagi o de aduhale gu aalu mai bolo gi dugua gooluu gi hulo, deenei ai, gooluu ssao hulo, gai de baba gi dagodo i ooluu daha.”

³⁷ Gai Paul ga hai ange gi gilaadeu, “Gilaadeu gu hagailiili gimaau i madamada o dangada, gai teai donu se siilingaa muna ne hai, gai gu tili ange gimaau gi lo te hale pono — aagai gimaau ni daane Rome donu. Gai gu aha, gilaadeu ga hai hagammuni naa delaadeu dugu gimaau gi hulo? E deai! Gilaadeu gi loomai donu gi hagassao ina mai gimaau.”

³⁸ Gai denga daane laa ga hulo ga tala ange muna laa gi denga dagi o de aduhale. Gai ga langona huu e gilaadeu bolo a Paul ma Silas ni dangada Rome, gai gilaadeu gu maatagu mmao.

³⁹ Gai gilaadeu ga loomai ga dangidangi ange gi gilaau. Gai gilaadeu ga hagassao mai gilaau i lo te hale pono, ga dangidangi ange gilaau gi hulo gee mai i de aduhale.

⁴⁰ Gai gilaau ga ssao mai i de hale pono ga hulo gi de hale o Lydia, ga hedae ange ai gi denga daina ga hagammahi ange olaadeu lodo. Gai gilaau ga hulo gee mai i kilaa.