Acts 15 - De Beebaa Dabu

De hagabuulinga hagasaele i Jerusalem

¹ Aagai gu loomai hanu daane i Judea gi Antioch ga agoago ange denga daina, ga hai ange, “Noo goodou e dee tuu dagaholiage bei dagodo muna o de hainga a Moses, gai goodou e dee hagamouli donu.”

² Gai gu kona de hagadaumee ange o Paul ma Barnabas gi denga daane laa. Deelaa ai, gilaadeu ne hili a Paul ma Barnabas aama hanu dangada i kilaa gi hulo gi Jerusalem, i daho de gau tala ma denga dagi gi siilia ai dagodo o de mee laa.

³ Gai ga haia huu e de nohoanga dabu gilaadeu gi hulo, gai gilaadeu ga hulo laa Phoenicia ma Samaria, ga tala ai dagodo de daahuli lodo o denga Gentile. Gai denga daina alodahi i kilaa gu malangilangi mmao.

⁴ Gai ga tae huu gilaadeu gi Jerusalem, gai de nohoanga dabu i kilaa, ma de gau tala aama denga dagi ne abodonu ange gi gilaadeu. Gai gilaadeu ga tala ange dagodo mee a de Maadua gu hai i olaadeu daha.

⁵ Aagai hanu Pharisee gu hagadonusia laa ne tuu age, ga hai ange, “Gidaadeu e tala ange gi denga Gentile bolo e heohi delaadeu tuu dagaholiage aama de daohi de hainga a Moses.”

⁶ Gai de gau tala ma denga dagi ne hagabuni e hagasaele ange ai dagodo o de mee laa.

⁷ Gai ga daulooloa huu delaadeu hagasaele, gai Peter ga hidi age ga hai ange gi gilaadeu, “Denga daina, goodou e iloo bolo hanu masavaa gu hulo, gai de Maadua ne hili au gi daalaa ange de longo danuaa gi denga Gentile, gi hagadonusia ai hogi e gilaadeu.

⁸ Gai de Maadua e iloo laa e ia denga lodo alodahi ne tala hagadonu dagodo olaadeu lodo, i dana gaavange de Hagasaalunga Dabu gi gilaadeu, bei dana hai gu gaamai ai laa hogi gi gidaadeu.

⁹ Ia e dee dagodo gee donu dana hai e hai ai gidaadeu ma gilaadeu, aagai ia ne hagagilimalali hogi olaadeu lodo i de kai.

¹⁰ Deenei ai, gu aha goodou gu hagatale ai naa de Maadua iainei, i doodou hagauda ange gi honga o dangada gu hagadonusia denga hainga adaadeu ma odaadeu dubuna madagidagi tee maua i de daudali ai?

¹¹ Gidaadeu e hagadonusia bolo gidaadeu e maua de mouli i de abodonu o Tagi Maolunga go Iesu, gai e bei ai naa hogi olaadeu dagodo.”

¹² Gai dangada alodahi gu dee mmuu i delaadeu nnoho ga hagallongo muna a Barnabas ma Paul i delaau tala ange dagodo o denga hagailonga ma mee hagalele mouli a de Maadua gu dugu ange gilaau gi haia i magavaa o denga Gentile.

¹³ Gai ga lava huu muna a Paul ma Barnabas, gai James ga hai ange gi gilaadeu, “Denga daina, goodou nnoho mai hagalaangona agu muna.

¹⁴ Simeon gu tala dagodo taamada de humai o de Maadua gi daho denga Gentile, gai ia ga hilihili ai hanu i olaadeu magavaa e hai ai ono dangada.

¹⁵ Muna a denga pelaabisi e buni ange donu de mee nei, bei de hai gu sisi laa,

¹⁶ ‘Dua de mee nei gai au e ahe mai naa, ga hagaahe age de hale malo o David gu maoha laa. Au e hagaahe age naa mommee gu maoha laa gai au ga hai ai gi duu age ange,

¹⁷ gai gi saalaa ai e dangada e doe Tagi Maolunga, aama denga Gentile alodahi gu hagaingoo i dogu ingoo, go Tagi Maolunga donu e hagadaba, go de ia e haia mee nei alodahi

¹⁸ go mee gu iloo madagidagi loo.’

¹⁹ Deenei ai, au e hagadaba bolo gidaadeu e dee hai gi hai ngadaa ange gi denga Gentile gu daahuli mai laa gi de Maadua.

²⁰ Aagai gidaadeu ga sisi e hai ange gilaadeu gi dee gaina mee gu hakino gee i hiidinga o denga diinonga, gilaadeu gi dee dagodo haisala, gai gi dee gaina kano o manu ne milo olaadeu ua, aama dodo.

²¹ Go hiidinga de hainga a Moses gu daulooloa de agoago i denga aduhale alodahi, ma de dau mai i lodo synagogue i denga Sabbath alodahi.”

De leda ange gi denga Gentile gu hagadonusia

²² Aagai de gau tala ma denga dagi ma de nohoanga dabu alodahi ne maanadu bolo e danuaa de hilihili hanu i olaadeu magavaa gi hulo gi Antioch madali a Paul ma Barnabas. Gai gilaadeu ne hili Judas, e hagaingoo ange laa hogi go Barsabbas, ma Silas, gilaau ni dagi i daho denga daina,

²³ ma de sisi dahi leda ga hai ange: “Gimaadeu de gau tala ma denga dagi aama denga daina i kinei e gaavadu demaadeu hagaboo gi goodou denga daina i kinaa, go denga Gentile e nnoho laa i Antioch ma Syria aama Cilicia.

²⁴ Gimaadeu ne langona bolo hanu i omaadeu magavaa ne loadu ga hai ga dee paba goodou, ma de hai gi manavasaa oodou lodo i alaadeu muna, gai e dee go gimaadeu donu ne hagasauaa ina gilaadeu gi loadu.

²⁵ Gai gimaadeu ne maanadu bolo e danuaa demaadeu hilihili hanu daane gi loadu gi oodou daha madali luoodaadeu daane e aaloha ai go Barnabas ma Paul,

²⁶ gilaau ni daane ne dai maakau i hiidinga de ingoo o taadeu Dagi Maolunga go Iesu Klisdo.

²⁷ Deenei ai, gimaadeu gu hai gi loadu Judas ma Silas gi daalaa adu ai gi goodou muna mau.

²⁸ Gai ne heohi mai i daho de Hagasaalunga Dabu ma mai i omaadeu daha, bolo e deai ange donu mee amaadeu e hagadaemaha ai goodou madali mee nei:

²⁹ goodou gi dee gaina gai gu sigidaumaha ange gi denga diinonga, ma dodo, ma manu gu milo laa olaadeu ua, aama tee dagodo haisala. Noo goodou e daohi goodou i mee nei, gai gu danuaa. Danuaa loo goodou!”

³⁰ Gai denga daane laa ne hulo ga tae gi Antioch, ga hagabuni de nohoanga dabu alodahi, ga gaavange de leda laa gi gilaadeu.

³¹ Gai de masavaa huu alaadeu ne dau ai de leda laa, gai gilaadeu gu malangilangi i muna ne hagammahi ange ai laa olaadeu lodo.

³² Gai luu daane pelaabisi go Judas ma Silas, ne daulooloa hogi delaau pasa ange ga hagammahi ange lodo o denga daina.

³³ Gai dua delaadeu nnoho i kilaa i hanu laangi, gai denga daina ga hai gilaadeu gi hulo i de baba, gi daho dangada ne haia laa gilaadeu gi loomai. [

³⁴ Aagai Silas ne lodo e damaa noho ange i Antioch.]

³⁵ Gai a Paul ma Barnabas ne nnoho i Antioch ga agoago ai, ma de tala ai muna a Tagi Maolunga, gai e soa ange dangada madali gilaau.

De mavaevae o Paul ma Barnabas

³⁶ Dua hanu laangi, gai a Paul ne hai ange gi Barnabas, “Gidaau ga aahe e hulo gi daho denga daina i denga aduhale hugadoo odaau gu agoago ai laa muna a de Maadua, e tilo ai hogi be aahee olaadeu dagodo.”

³⁷ Gai Barnabas ne lodo hogi e kave a John Mark madali gilaau,

³⁸ aagai a Paul ne maanadu bolo e dee danuaa delaau kave ia, go hiidinga ia ne tili gilaau i Pamphylia, tee noho madali gilaau ga dae ai gi de lava alaau hegau.

³⁹ Gai gu kona delaau dee heloongoi, deelaa ai, gilaau gu mavaevae. Barnabas ga kave a Mark madali ia ga hulo gi Cyprus,

⁴⁰ aagai a Paul ne hili Silas ga kave madali ia. Gai ia ne dalodalo ga dugu ange denga daina gi de abodonu o Tagi Maolunga.

⁴¹ Gai a Paul ne hagadaga i Syria ma Cilicia ga hagammahi ange ai denga nohoanga dabu i kilaa.