Acts 14 - De Beebaa Dabu

Paul ma Barnabas i Iconium

¹ De masavaa o Paul ma Barnabas e nnoho ai i Iconium, gai gilaau ne hulo gi lo te synagogue ga agoago hagammahi ai, gai de gau Ssuu ma de gau Greek soa gu hagadonusia hogi.

² Aagai de gau Ssuu e dee hagadonusia laa ga hagabasa denga Gentile ga hai gilaadeu gi hai baasi ange gi dangada gu hagadonusia laa.

³ Gai Paul ma Barnabas ne daulooloa delaau nnoho i kilaa, ma de lo taane i de agoago muna a Tagi Maolunga, gai ia ne hagadonu agoago o dono abodonu, i dana hai gi maua e gilaau i de hai denga hagailonga ma mee hagalele mouli.

⁴ Aagai dangada o de aduhale laa gu dee heloongoi; hanu ne buni ange gi de gau Ssuu, gai hanu gilaadeu ne buni ange gi de gau tala.

⁵ Gai denga Gentile ma de gau Ssuu madali olaadeu dagi gu nnoho e vaivai hai gilaau, ma de maga gilaau i denga hadu.

⁶ Aagai ga iloo huu e Paul ma Barnabas mee laa, gai gilaau ga saavini ga hulo gi Lystra ma Derbe, ni aduhale niio Lycaonia, aama mommee e paa ange gi kilaa.

⁷ Gai gilaau ne duudagi de agoago de longo danuaa i kilaa.

Paul ma Barnabas i Lystra ma Derbe

⁸ Gai e dahi daane balagelage e noho i Lystra, ia ne balagelage mai i dono haanau, ia tee maua donu i de seesee.

⁹ Taane laa ne hagallongo muna a Paul. Gai a Paul ne haaina ia gu gidee bolo e dahi ono gai e maua ai i de hagaieiangi ia.

¹⁰ Gai ia ga hai ange gi taane laa i de leo laumalie, “Hidi age duu gi lunga!” Gai taane laa ga sobo ga hidi gi lunga ga seesee.

¹¹ Gai de masavaa huu a dangada ne gidee ai mee a Paul ne hai, gai gilaadeu ga hevaalogi ga hagataba i muna Lycaonia, “Hanu diinonga gu hagadulagi ange gi dangada ma gu loiho gi odaadeu magavaa!”

¹² Gilaadeu ne hagaingoo ange Barnabas go Zeus, gai Paul go Hermes, go hiidinga go ia delaau ngudu.

¹³ Gai tangada haimeedabu o Zeus e duu laa dono temple i ma te aduhale, ga gaamai hanu kaau daane ma hanu hau gi denga haitoga, ia ne lodo e hai ange ssigidaumaha gi a Paul ma Barnabas aama de gau soa laa.

¹⁴ Aagai ga langona huu e Barnabas ma Paul mee laa, gai gilaau ga saesae olaau malo ga saavini gi magavaa o dangada, ga hai ange,

¹⁵ “Goodou denga daane, gu aha goodou gu hai ai naa mee naa? Gimaau ni dangada donu huu bei oodou dagodo. Gimaau ne gaamai gi goodou de longo danuaa gi daahuli gee ai goodou i mee e deai olaadeu haigamaiana, gi daahuli ange gi de Maadua e mouli laa, go ia ne haia de langi ma henua i lalo ma tai aama mee alodahi iai.

¹⁶ Madagidagi gai ia ne dugu ange denga atangada alodahi gi haia olaadeu lodo.

¹⁷ Aagai ia ne hai donu gi dahi mee e hagadonu ai ono dagodo: ia ne abodonu adu gi goodou i dana gaavadu gi goodou de langi pala mai i de langi ma denga huamanu i de masavaa e hhua ai; ia ne hai gi boobosu goodou i de gaimee ma de hai gi malangilangi oodou lodo.”

¹⁸ Gai alaau muna ne dai dee maua donu i de hai dangada gi dee ssigidaumaha ange gi gilaau.

¹⁹ Aagai de gau Ssuu ne loomai laa i Antioch ma Iconium ne hagabasa dangada, gai gilaadeu ga maga a Paul i hadu ga dada ia ga tili gi tua de aduhale; gilaadeu ne maanadu bolo ia gu magau.

²⁰ Aagai de masavaa huu o dangada gu hagadonusia laa ne tuu ai ga duuli ia, gai ia ga hidi age ga ahe gi de aduhale. De laangi i ono dua, gai a Paul ma Barnabas ne hulo gi Derbe.

De aahe gi Antioch i Syria

²¹ Gai de masavaa alaau ne agoago ai de longo danuaa i de aduhale laa, gai gu soa dangada ne hagadonusia. Gai gilaau ga aahe ange hogi gi Lystra ma Iconium aama Antioch,

²² ga hagammahi ange ai lodo o denga dangada agoago gilaadeu gi duudagina de daohi de gai, ga hai ange, “Gidaadeu e tuu ange naa donu gi denga hagaduasala lagolago, gi maua ai e gidaadeu i de ulu i de hodooligi o de Maadua.”

²³ Gai gilaau ga hili denga dagi i dahi nohoanga dabu ma dahi nohoanga dabu, i de dalodalo ma de hagahiikai, ga gaavange gilaadeu gi Tagi Maolunga, de ia olaadeu e kai ange laa aagena.

²⁴ Aagai Paul ma Barnabas ne hagadaga i Pisidia ga hulo ai gi Pamphylia.

²⁵ Gai ga lava huu i delaau agoago muna a de Maadua i Perga, gai gilaau ga loiho gi Attalia.

²⁶ Gai gilaau ne maalanga mai i kilaa ga ahe gi Antioch, go de mommee alaadeu ne dugu ange ai gilaau gi de abodonu o de Maadua, ange gi de hegau alaau gu lava laa i de hai.

²⁷ Gai de masavaa olaau ne tae ai gi kilaa, gai gilaau ga hagabuni de nohoanga dabu, gai gilaau ga tala ange mee alodahi a de Maadua gu hai i olaau daha, ma dana hhuge ange de haitoga o de gai gi denga Gentile.

²⁸ Gai ne daulooloa delaau nnoho i daho dangada gu hagadonusia i kilaa.