Acts 11 - De Beebaa Dabu

De tala a Peter ana mee gu hai

¹ Gai de gau tala ma denga daina i Judea ne langona bolo denga Gentile gu kave hogi muna a de Maadua.

² Gai de masavaa huu o Peter ne ahe ai gi Jerusalem, gai gilaadeu gu tuu dagaholiage laa ga hagabaubau ia,

³ ga hai ange, “Gu aha goe gu hano ai laa gi daho dangada e dee tuu dagaholiage ma de gaimee hogi madali gilaadeu?”

⁴ Aagai Peter ne daamada de tala ange gi gilaadeu mee alodahi gu hai mai i taamada, ga hai ange,

⁵ “Dogu masavaa e dalodalo ai i de aduhale go Joppa, gai au ne hai dahi midi hagaago ange. Au ne gidee dahi mee be se malo laumalie ne hagasege iho mai i de langi i ono dege e haa, gai ne hano iho gi dogu mommee iai laa.

⁶ Gai ga hanange huu au ga tilo, gai au gu gidee denga manu dolodolo, ma manu lodo henua, ma manu e tolo i honga de gelegele, aama denga manu llele.

⁷ Gai au ne langona dahi leo e hai mai gi de au, ‘Peter, hidi age, daia manu naa gaina!’

⁸ Aagai au ga hai ange, ‘Tagi Maolunga, e dee maua donu, go hiidinga tigi ai donu se mee e dee gilimalali be se mee hakino gee daudahi ne hhao gi lo togu ngudu.’

⁹ Aagai de leo laa ne basa mai i de lua hanonga, ga hai mai, ‘Aude daalaa bolo mee a de Maadua gu lava i de hagagilimalali e dee gilimalali.’

¹⁰ E dolu hanonga ne hai ai de mee nei, gai gu hagaahe age gi de langi de mee laa.

¹¹ De masavaa laa gai gu tae mai gi de hale oogu e noho ai laa denga daane dogodolu ne loomai i Caesarea.

¹² Gai de Hagasaalunga ⌊Dabu⌋ ga hai mai au gi hano madali gilaadeu, gai au gi dee lua lodo. Gai denga daina e dogoono nei ne hulo madali au gi de hale o taane laa.

¹³ Gai ia ne tala mai gi gimaadeu bolo ia ne gidee dahi dangada de langi, ne humai ga duu i lo tono hale, ga hai ange gi de ia, ‘Haia gi hulo hanu dangada gi Joppa gi hagahia gi humai Simon, e hagaingoo ange laa go Peter.

¹⁴ Gai ia ga tala adu ai gi de goe ma dangada i doo hale alodahi doo hai e hagamouli ai.’

¹⁵ Gai de masavaa huu oogu ne daamada ai de agoago, gai gu hano iho de Hagasaalunga Dabu gi olaadeu elunga bei dono hai ne hano iho ai laa hogi gi odaadeu elunga i taamada.

¹⁶ Gai au gu manadua muna a Tagi Maolunga e hagadaba ai laa, ‘John ne babudaisi i vai, gai goodou e babudaisi naa i de Hagasaalunga Dabu.’

¹⁷ Noo de Maadua gu gaavange hogi gi gilaadeu de mee ngadi gaavange gu gaamai laa gi gidaadeu, i de masavaa adaadeu ne hagadonu ai Tagi Maolunga go Iesu Klisdo, gai go au goai, gai au ga hai baasi ange ai gi de Maadua?”

¹⁸ Gai ga langona huu e gilaadeu muna laa, gai gilaadeu gu dee maua i de hai baasi ange, gai gilaadeu ga tuhi de Maadua ga hagataba, “De Maadua gu hai hogi gi daahuli lodo o denga Gentile gi hagamouli ai gilaadeu.”

De nohoanga dabu i Antioch

¹⁹ Gai dangada ne mavaevae saele laa i hiidinga de vaivai haia o dangada ne daamada laa i Stephen, ne hulo loo ga tae gi Phoenicia, ma Cyprus, aama Antioch. Gai gilaadeu tee agoago ange muna a de Maadua gi hanu dangada gee, go de gau Ssuu donu huu.

²⁰ Gai hanu gilaadeu mai i Cyprus ma Cyrene, ne hulo hogi gi Antioch ga agoago ange ai de gau Greek de longo danuaa o Tagi Maolunga go Iesu.

²¹ Gai ssauaa o Tagi Maolunga ne hano madali gilaadeu, gai gu soa dangada ne hagadonusia ga daahuli mai gi Tagi Maolunga.

²² Gai longo o mee laa gu tae hogi gi de nohoanga dabu i Jerusalem, aagai gilaadeu ga hai gi hano Barnabas gi Antioch.

²³ Dono masavaa ne dae ai gi kilaa, gai ia gu gidee mee a de Maadua gu hai i kilaa i dono abodonu, gai ia gu malangilangi, ga hagammahi ange gilaadeu alodahi gi hai hegau ange gi Tagi Maolunga i de mee abodonu ma de lodo mmahi.

²⁴ Barnabas se daane danuaa, gai e honu i de Hagasaalunga Dabu ma de gai. Aagai gu kii ange de soa dangada ne kai ange gi Tagi Maolunga.

²⁵ Gai Barnabas ne hano gi Tarsus ga ssala ai a Saul,

²⁶ gai ga gidee huu e ia a Saul, gai ia ga kave ia gi Antioch. Gai gilaau ne hagabuni madali de nohoanga dabu i kilaa i dahi ngadau ga agoago ange dangada soa. Gai dangada agoago ne daamada de hagaingoo ange go denga Christian.

²⁷ Laangi laa gai hanu pelaabisi ne loomai i Jerusalem gi Antioch.

²⁸ Gai e dahi daane i olaadeu magavaa, dono ingoo go Agabus, ne hidi age ga basa pelaabisi i ssauaa o de Hagasaalunga ⌊Dabu⌋ bolo dahi onge laumalie gu dai dae mai gi henua i lalo alodahi; gai de mee nei ne hai i de masavaa o Claudius e dagi ai.

²⁹ Gai gilaadeu gu hagadonusia i kilaa, ne hagamodu bolo e daohi age hanu mee e bale ange ai denga daina i Judea, i de mee a dahi ma dahi e mau.

³⁰ Gai gilaadeu ne hai donu de hegau nei, ga gaavange denga sseene laa gi Barnabas ma Saul gi gaavee gi denga dagi i kilaa.