Acts 10 - De Beebaa Dabu

De aalu a Cornelius Peter

¹ Gai e dahi daane e noho i Caesarea, dono ingoo go Cornelius, ia se dagi o de lau mai i de hagabuulinga hebagi e hagabinga ange laa go de Italian Cohort,

² gai gilaadeu ma dangada alodahi i dono hale e maatagu i de Maadua, gai e abodonu ange gi de gau hagaau aloha, ma de dalodalo ange gi de Maadua i masavaa alodahi.

³ Dahi laangi i daha tolu i muli de hualaangi gai ia ne hai dahi midi hagaago ange. Ia ne gidee dahi dangada de langi o de Maadua, ne humai ga hai ange gi de ia, “Cornelius!”

⁴ Gai ia ga haaina ia i dono madagu, ga ssili ange gi de ia, “Tagi Maolunga, se aha e hai?” Tangada de langi laa ne hai ange gi de ia, “Au dalodalo alodahi ma doo abodonu ange gi de gau hagaau aloha gu tae age, ma de hagamaanadu ai goe i mada luu mada o de Maadua.

⁵ Gai haia hanu dangada gi hulo gi Joppa gi gaamai ai Simon, e hagaingoo ange laa hogi go Peter.

⁶ Ia e noho i daho Simon taane hai gili manu, gai dono hale e duu i gaogao tai.”

⁷ Gai de masavaa o tangada de langi ne basa ange laa gi de ia ne hano gee ai, gai Cornelius ne hagahi e dogolua ono dangada hai hegau ma dahi ono daane hebagi e madagu laa i de Maadua, e hai hegau ange laa gi de ia.

⁸ Gai ia ga tala ange gi gilaadeu mee alodahi gu hai, ma de hai gilaadeu gi hulo gi Joppa.

De midi a Peter

⁹ De laangi i ono dua, i daha tuele, i de masavaa o denga daane laa gu paa ange ai gi de aduhale, gai Peter ne hanage gi tua de hale e dalodalo ai.

¹⁰ Aagai ia gu saalohia ma de hiigai, gai de masavaa alaadeu e hagadabena ai denga gai, gai ia gu hai dahi midi hagaago ange.

¹¹ Ia ne gidee de langi gu mahuge, gai dahi mee be se malo laumalie gu hagasege iho gi henua i lalo i denga dege e haa.

¹² Gai e honu i denga hagadaagangaa manu dolodolo ma manu e tolo i honga de gelegele, aama denga manu llele.

¹³ Gai ia gu langona dahi leo mai i de langi e hai ange gi de ia, “Peter, hidi age daia manu naa gaina.”

¹⁴ Aagai Peter ga hai ange, “Tagi Maolunga, e dee maua donu, go hiidinga au tigi gai donu dahi mee dee gilimalali aabe se mee hakino gee daudahi.”

¹⁵ Gai de leo laa ne hai ange hogi gi de ia, “Aude daalaa bolo mee a de Maadua gu lava i de hagagilimalali e dee gilimalali.”

¹⁶ Ne dolu hanonga ne hai ai mee nei, aagai de malo laa gu hagaahe age gi de langi.

¹⁷ Gai de masavaa a Peter e hagasaele ai be dee hee de hagadoonunga o dana midi ne gide laa, gai denga daane a Cornelius ne hai laa gi loomai gu tuu i de haitoga o de buibui, i dua delaadeu ssili be dee hee de hale o Simon.

¹⁸ Gai gilaadeu ne hagahi ga ssili be Simon e hagaingoo ange laa hogi go Peter e noho i kilaa.

¹⁹ Gai de masavaa a Peter e maanadu ai dagodo o de midi laa, aagai de Hagasaalunga ⌊Dabu⌋ ga hai ange gi de ia, “E dogodolu daane gu loomai e ssala goe.

²⁰ Hidi age iho gi lalo, gai koe aude manavasaa i de hano madali gilaadeu, i hiidinga go au donu ne haia gilaadeu gi loomai.”

²¹ Aagai Peter ne iho mai gi daho denga daane laa, ga hai ange, “Deenei au tangada oodou e ssala naa. Se hiidinga aha oodou ne loomai ai naa?”

²² Gai gilaadeu ga hai ange, “Cornelius, dahi dagi o de lau, se daane heohi ma de madagu i de Maadua, ma de tuhi i daho de huaahenua o de gau Ssuu, dahi dangada de langi dabu ne hai ange ia gi alumia mai goe gi hanadu gi dono hale, gai ia ga hagallongo ai au muna e tala ange.”

²³ Gai Peter ne hagahi gilaadeu gi ulu mai gi nnoho i ono daha i de boo laa. Taiao age, gai Peter ne hano madali de gau laa, gai ne hanu ange daina mai i Joppa ne hulo madali Peter.

Peter i de hale o Cornelius

²⁴ De laangi i ono dua, gai gilaadeu gu tae gi Caesarea. Gai Cornelius gu lava i de hagabuni mai dono huaabodu aama ono soa hagamogomogo ma e tali ai gilaadeu.

²⁵ Aagai de masavaa huu o Peter ne dae ai gi de mommee laa, gai Cornelius gu humai ga duuduli ga ino gi lalo i gaogao luoono vae ga daumaha ange gi de ia.

²⁶ Aagai Peter ga hagahidi age ia, ga hai ange, “Duu age, au se dangada donu huu hogi bei oo dagodo.”

²⁷ Dono masavaa e basa ange gi Cornelius, gai Peter ga ulu gi lo te hale gu gidee hanu dangada soa gu hagabuni i kilaa.

²⁸ Gai ia ga hai ange gi gilaadeu, “Goodou e iloo donu bolo de gau Ssuu e dee hagabuni ange gi denga Gentile, aabe e hulo gi olaadeu daha. Aagai de Maadua gu hagaago mai bolo au gi dee daalaa bolo dahi dangada e dee gilimalali aabe e hakino gee.

²⁹ Deenei ai, au tee lua lodo donu i doodou masavaa ne aalu adu ai au gi humai. Gai au e ssili adu be aahee hiidinga oodou ne aalu adu ai nei au?”

³⁰ Gai Cornelius ga hai ange, “E haa laangi gu hulo, i de masavaa bee nei, gai au e noho ma e dalodalo i dogu hale i daha tolu i muli de hualaangi. Gai tilo, dahi daane ne humai ga duu i ogu mada i mua, gai ia e gahu i malo malamalama,

³¹ gai ia ne hai mai gi de au, ‘Cornelius, de Maadua gu langona au dalodalo ma de manadua doo abodonu ange gi de gau hagaau aloha.

³² Deenei ai, haia gi hulo hanu dangada gi Joppa gi alumia Simon, e hagaingoo ange laa hogi go Peter. Ia e noho i de hale o Simon, taane hai gili manu, gai dono hale e duu i gaogao tai.’

³³ Deelaa ai, au ne hagamoolau ga hai gi loadu hanu dangada gi gaamai goe, aagai koe gu abodonu hogi ma gu humai. Gimaadeu alodahi gu nnoho i kinei i mada luu mada o de Maadua e hagallongo ai mee hugadoo gu lava i de tala adu gi de goe mai i daho de Maadua.”

De agoago o Peter i de hale o Cornelius

³⁴ Aagai Peter ne daamada de basa ga hai ange, “Au e iloo bolo ni muna abodonu de Maadua e dee vae dangada,

³⁵ aagai e abodonu ange gi dangada i denga huaahenua alodahi e maatagu i de ia, ma de hai hegau i de mee heohi.

³⁶ Goodou gu iloo ana muna gu gaavange gi de gau Israel, e agoago ai laa de longo danuaa o de baba mai i daho Iesu Klisdo, go Tagi Maolunga o mee alodahi;

³⁷ goodou gu langona dagodo o mee gu hai i Judea alodahi, gai ne daamada mai i Galilee i dua de agoago o John dagodo o de babudaisi —

³⁸ e bei dagodo de hagadabu a de Maadua Iesu taane Nazareth i de Hagasaalunga Dabu ma ssauaa, aama dagodo o dono hagadaga ga hai denga hegau danuaa, ma de hagaieiangi dangada alodahi gu hagaduasala laa i lalo ssauaa o de ia hagabaubau laa, go hiidinga de Maadua e noho i ono daha.

³⁹ Gai go gimaadeu e daalaa hagadonu dagodo o ana mee alodahi ne hai i de henua o de gau Ssuu aama Jerusalem. Gai gilaadeu ne daa ia ga magau ga daudau i de laagau lui.

⁴⁰ Aagai de Maadua ne hagamouli age ia i dua e dolu laangi, ga hai gi gidee e dangada ia.

⁴¹ Gai e dee go dangada alodahi ne gidee ia, aagai go gimaadeu donu huu, a de Maadua gu lava laa i de hili e hai gi ni dangada e daalaa hagadonu mee nei — go gimaadeu ne gaimee laa ma de unu madali ia, i dua dono mouli age mai i de magau.

⁴² Ia ne hai mai gimaadeu gi agoagona ange dangada, ma de tala hagadonu bolo de Maadua gu hili ia gi hagamodu ina muna o dangada e mouli aama gilaadeu gu maakau.

⁴³ Denga pelaabisi alodahi ne tala bolo dangada alodahi e hagadonusia ia gu maatala olaadeu haisala i dono ingoo.”

De kave a denga Gentile de Hagasaalunga Dabu

⁴⁴ De masavaa a Peter e tala ange ai muna laa gi gilaadeu, gai de Hagasaalunga Dabu gu hano iho gi honga o dangada alodahi ne langona muna laa.

⁴⁵ Aagai de gau Ssuu ne loomai laa madali Peter gu llele mouli i de hano iho hogi o de ngadi gaavange go de Hagasaalunga Dabu gi honga o denga Gentile.

⁴⁶ Gai gilaadeu gu langona dangada i kilaa gu pasa i denga hagadaagangaa muna, gai gilaadeu ga tuhi de Maadua. Gai Peter ga hagadaba,

⁴⁷ “E maua e dahi dangada i de buibui de gau nei gi dee babudaisi i vai, gai de Hagasaalunga Dabu gu hano iho donu gi olaadeu elunga, bei odaadeu dagodo?”

⁴⁸ Gai ia ga hai gilaadeu gi babudaisi i de ingoo o Iesu Klisdo. Gai dangada i kilaa ga dangidangi ange ia gi noho i olaadeu daha i hanu laangi.