Acts 1 - De Beebaa Dabu

De hagatoo donu o de Hagasaalunga Dabu

¹ Theophilus, dagu Beebaa i taamada ne sisi dagodo mee alodahi a Iesu ne hai ma de agoago ai mai i taamada o ana hegau,

² ga dae ai gi dono laangi ne gaavage ai gi de langi, ma dua dana tala ange gi de gau tala, go dangada aana ne hili, alaadeu mee e hai i ssauaa o de Hagasaalunga Dabu.

³ Ia ne hagaago ange gi gilaadeu i hanonga lagolago bolo ia gu mouli age abodonu, i dua dono hagaduasala, ma de hakide ange gi gilaadeu i e madahaa laangi, ga agoago ange gilaadeu i dagodo o de nohoanga hodooligi o de Maadua.

⁴ Dono masavaa nogo noho ai i olaadeu daha, gai ia ne hai ange gi gilaadeu, “Goodou e dee hulo gee mai i Jerusalem, gai goodou nnoho daalia de hagatoo donu a Tamana, go mee oodou gu langona mai i ogu daha.

⁵ Go hiidinga a John ne babudaisi i vai; gai e dee mmule naa donu gai goodou gu babudaisi i de Hagasaalunga Dabu.”

De gaavage o Iesu gi de langi

⁶ Gai de masavaa huu olaadeu ne hagabuni ai, gai gilaadeu ga ssili ange gi de ia, “Tagi Maolunga, koe ga hagaahe ange naa de nohoanga hodooligi gi de gau Israel iainei?”

⁷ Ia ne hai ange gi gilaadeu, “E dee se mee niiodou de hai gi iloo de masavaa aama de laangi a Tamana gu hagamodu i dono sauaa.

⁸ Aagai goodou e kave naa ssauaa i dua de hano iho o de Hagasaalunga Dabu gi oodou elunga; gai goodou e hai naa ga ni dangada e daalaa hagadonu ogu dagodo i Jerusalem, ma Judea alodahi, aama Samaria, ga dae ai loo gi de bido laa o henua i lalo.”

⁹ Dua huu dana tala ange muna laa gi gilaadeu, gai ia gu gaavage gi de langi, i de masavaa alaadeu e daumada ai ia, gai de giliiga ne haoli ia gu dee gidee.

¹⁰ Gai de masavaa alaadeu e tuu ai ma e kalo age gi lo te langi i de hano o Iesu, gai e dogolua dangada de langi e kahu i malo tea, gu tuu i olaadeu gaogao,

¹¹ ga hai ange, “Denga daane Galilee, gu aha gu tuu ai naa goodou e kalo age gi lo te langi? Iesu oodou e gidee naa gu gaavage mai i oodou daha gi de langi, e ahe mai naa bei doodou hai gu gidee ai naa ia e hano gi de langi.”

Taane ne suuia Judas

¹² Aagai de gau tala ne ahe gi Jerusalem mai i de Mounga o denga Olive, agu made se baasi maele ga dae gi de aduhale.

¹³ Gai ga tae huu gilaadeu gi Jerusalem, gai gilaadeu ga loage gi de aabi i lunga, go de mommee olaadeu nei e nnoho ai: go Peter, ma John, ma James, ma Andrew, ma Philip, ma Thomas, ma Bartholomew, ma Matthew, ma James tama daane a Alphaeus, ma Simon Zealot, aama Judas tama daane a James.

¹⁴ Gilaadeu nei alodahi ne hagabuni i de lodo daudahi ga dalodalo, madali hanu haahine ma Mary tinana o Iesu, aama denga daina daane o Iesu.

¹⁵ Laangi laa gai Peter ne duu age i magavaa o dangada gu hagadonusia laa (taelodo o dangada i kilaa se 120) ga hai ange,

¹⁶ “Denga daina, muna a de Beebaa Dabu gu hai donu ma gu bei, aanei muna a de Hagasaalunga Dabu gu tala i daho David madagidagi, i dagodo o Judas, taane ne dagina mai dangada ne boogia Iesu.

¹⁷ Ia se daane madali gimaadeu, gai ne kave tuuhanga hegau nei madali gimaadeu.”

¹⁸ (Gai taane nei ne hagao dahi alahenua i de hagaoanga o ana hegau baubau; ia ne doo iho hogi ga mahanga lua dono dinae ga too mai ono dae alodahi.

¹⁹ Gai dangada alodahi e nnoho i Jerusalem gu iloo dagodo o de mee nei, deenei ai, gilaadeu ne hagaingoo ange de alahenua laa go Akeldama i alaadeu muna, e bei de Alahenua o Dodo.)

²⁰ “Gai gu sisi i de beebaa o denga Psalm, e hai ange, ‘Dono mommee noho gi ngadi dagodo, gai gi deai dangada e nnoho ai;’ gai ‘Dono duulanga gi gaavange gi dahi dangada gee.’

²¹ Deenei ai, dahi daane mai denga daane nogo hano saele laa madali gidaadeu i masavaa o Tagi Maolunga go Iesu goi noho ai i odaadeu daha,

²² mai i de masavaa a John ne babudaisi ai ga dae ai gi de laangi o Iesu ne gaavee gee ai i odaadeu daha ga gaavage gi lunga — dahi gilaadeu nei e hai gi se dangada e daalaa hagadonu dagodo o dono mouli age madali gidaadeu.”

²³ Gai gilaadeu ga hili Joseph e hagaingoo ange laa hogi go Barsabbas (e hagaingoo ange laa hogi go Justus), aama Matthias.

²⁴ Aagai gilaadeu ne dalodalo, ga hai ange, “Tagi Maolunga, koe e iloo lodo o dangada alodahi. Hagaagona mai, be goai aau gu hili i magavaa o luu daane nei,

²⁵ gai ia ga kave ai tuulanga hegau a de gau tala, go tuulanga a Judas ne dugu laa, gai ga hano gi dono mommee donu.”

²⁶ Gai gilaadeu ne dada e hili ai dahi luu daane nei, gai go de ingoo o Matthias alaadeu ne dada; gai ia gu dau madali de gau tala e dinoangahulu ma dogodahi.