2 Timothy 4 - De Beebaa Dabu

¹ Au e tala adu gi de goe i mada luu mada o de Maadua aama Klisdo Iesu, go de ia e hagamodu ina muna o dangada e mouli ma gilaadeu gu maakau, i de masavaa oona e hagasula mai ai, ga hagaduu age dono nohoanga hodooligi.

² Koe gi agoagona ana muna; koe gi baba ange aagena i de masavaa oou e saohia ai aama de masavaa oou e dee saohia ai; hagaheohi, ma de hagasee, aama de hagammahi ange olaadeu lodo — i de golomagi lodo i doo agoago ai.

³ I hiidinga e dae mai naa de masavaa a dangada e dee llodo ai e hagallongo denga agoago heohi, gai ga daudali ange i gilaadeu e agoagona mee olaadeu e malangilangi i de hagallongo.

⁴ Gilaadeu e tili naa de muna abodonu, gai ga daudali ange i denga ngadi daalanga.

⁵ Aagai koe gi dagitilo i masavaa alodahi, ma de hagaduu ngae i de lodo mmahi i doo hagaduasala ina, ma de hai hegau a tangada e hagadele ina de longo danuaa, ma de hagasula hegau alodahi o dau duuhanga hegau.

⁶ Gai au gu baba ange donu e llingi bei dagodo o ssigidaumaha o mee unu, gai gu dae mai dogu masavaa e hano gee ai i de mouli nei.

⁷ Au gu lava i de hebagi i de hebagi danuaa, au gu hagalava dogu savini e houhou, gai au ne daohi dogu gai.

⁸ Deenei ai, de hau o de heohi gu hagadabena mai donu gi de au, go de hau a Tagi Maolunga, de ia hagamodu muna heohi, e hagao mai ai au i de laangi laa, gai e dee go au donu huu, aagai se mee ange gi gilaadeu alodahi e malangilangi i dono hagasula mai.

Muna a Paul ange donu gi Timothy

⁹ Gai koe hagamoolau humai gi dae mai goe gi ogu daha,

¹⁰ go hiidinga Demas gu kii mee o henua i lalo nei i dono lodo ai, ia gu tili au gai gu hano gi Thessalonica. Crescens gu hano gi Galatia, gai Titus gu hano gi Dalmatia.

¹¹ Go Luke donu huu i ogu daha. Gai koe gaamai hogi a Mark madali goe, go hiidinga ia e haigamaiana mai donu gi de au.

¹² Au gu hai Tychicus gi hano gi Ephesus.

¹³ Ga humai naa huu goe, gai koe gaamai madali goe dogu malo laa daha ne dugu naa i daho Carpus i Troas, ma denga beebaa mulo, aama denga beebaa e hai i gili manu.

¹⁴ Alexander, de labagau o denga bronze, gu hai mai dahi hegau baubau mmao gi de au; gai Tagi Maolunga gi hagao ina ange ana hegau baubau.

¹⁵ Gai koe dagidiiloo ia, i hiidinga ia e hai baasi ange donu gi muna odaadeu e agoago ai nei.

¹⁶ Tahi hanonga ne hagamodu ai ogu muna, gai teai donu se dangada ne balea mai au, gai dangada alodahi ne tili au. Gai de baubau nei gi dee dau ange donu gi gilaadeu!

¹⁷ Aagai Tagi Maolunga ne noho madali au ma de hagammahi mai ogu lodo, gai au ga tala ai gi langona e denga Gentile de longo danuaa alodahi. Deelaa ai, au ne ola mai i de ngudu o de laiono.

¹⁸ Gai Tagi Maolunga e hagaola naa donu au mai i denga hegau baubau alodahi, ma de hagaola au ga kave gi dono nohoanga hodooligi i de langi. Gai hagamahamaha ina ia ga hano ai e dee ngado mai. Amen.

Hagaboo hagaodi

¹⁹ Dagu hagaboo ange gi Priscilla ma Aquila, aama de huaabodu o Onesiphorus.

²⁰ Erastus goi noho huu i Corinth; gai au ne dugu Trophimus i Miletus, i hiidinga ia gu magi.

²¹ Hagammahi humai gi dae mai goe gi ogu daha i mua de masavaa hagamagalili. Eubulus, ma Pudens, ma Linus, ma Claudia, aama denga daina alodahi e gaavadu hogi delaadeu hagaboo gi de goe.

²² Tagi Maolunga gi noho i daho doo hagasaalunga. Dono abodonu gi dagodo i oodou daha.