2 Timothy 3 - De Beebaa Dabu

Dagodo o dangada i laangi hagaodi

¹ Aagai koe gi iloo de mee nei: denga masavaa hai ngadaa e tae mai naa donu i laangi hagaodi.

² Dangada e aaloha naa donu huu i gilaadeu, ma de nnoo ange gi sseene, ma de pasa hagamaolunga, ma de llodo maolunga, ma de hai samu o dangada, ma tee hagallongo ange gi olaadeu maadua, ma tee llodo e hagaahe ange de abodonu, ma tee dabu,

³ e deai olaadeu aaloha, e dee degi ange gi dangada, e hagabaubau dangada, e dee maua i de golomagi olaadeu lodo, ma de alasala, gai gilaadeu e dee llodo i mee danuaa;

⁴ gilaadeu e hagabaubau dangada, e moolau olaadeu lodo, e hagamaolunga, gai e kii ange de llodo e hai olaadeu mee e malangilangi ai, i delaadeu aaloha i de Maadua;

⁵ gilaadeu e hagaago donu huu de hai lodo o de Maadua, aagai gilaadeu e hagangadi mee donu ssauaa o de Maadua. Gai koe gi dee hagabuni ange gi gilaadeu e haia mee nei.

⁶ Aanei gilaadeu e hulo laa gi lodo hale o denga huaabodu ga kave ai lodo o denga haahine llodo ssenga e daemaha laa i olaadeu haisala, ga dagi ange ai gilaadeu gi denga hagadaagangaa lodo baubau alodahi;

⁷ denga haahine bee nei e agoago ina i masavaa alodahi, aagai e dee maua gi tonu ange gi de muna abodonu.

⁸ Denga daane nei e bei dagodo o Jannes ma Jambres, go luu daane ne hai baasi ange laa gi Moses. Gai gilaadeu e hai baasi ange donu gi de mee heohi, gai ni daane hakino gee alaadeu maanadu, de gau bee nei gu dee daohi de gai abodonu.

⁹ Aagai gilaadeu e dee hagadagadaga age naa donu, go hiidinga gilaadeu e bei dagodo o luu daane madagidagi laa, gai dangada alodahi e gidee danuaa naa donu dagodo o alaadeu hegau baubau.

Muna hagaodi a Paul ange gi Timothy

¹⁰ Gai koe gu iloo donu dagodo o agu agoago alodahi, ma dogu mouli, ma dagu hagatau, ma dogu gai, ma de golomagi ogu lodo, ma dogu aloha, ma dogu hagaduu ngae i de lodo mmahi,

¹¹ ma dogu vaivai haia ma dogu hagaduasala ina — go mee ne hai mai gi de au i Antioch, ma Iconium, aama Lystra, gai au ne lodo mmahi i dogu vaivai haia. Gai Tagi Maolunga ne hagaola mai au i mee nei alodahi.

¹² Gai dangada alodahi e llodo e haia lodo o de Maadua i daho Klisdo Iesu e vaivai haia naa donu,

¹³ aagai de gau baubau ma dangada e daahangadia dangada e hagadagadaga ange naa donu de baubau; gilaadeu e daahanga naa dangada, gai gilaadeu gu daahangadia donu hogi.

¹⁴ Aagai koe gi duudagi ina de daohi au mee gu lava i de ago ma de hagadonusia, go hiidinga koe e iloo dagodo o dangada ne agoagona adu goe i mee naa.

¹⁵ Gai koe e iloo bolo mai i doo gauligi, gai koe gu iloo muna o de Beebaa Dabu, e maua laa i de gaavadu gi de goe de heiangi e dagina ange laa goe gi de hagamouli i doo gai ange gi Klisdo Iesu.

¹⁶ Muna alodahi o de Beebaa Dabu ne daamada mai i lodo o de Maadua, gai e haigamaiana ange gi de agoago ai, ma de hagakana ange ai, ma de hagaheohi aama de agoago ai gi heohi tangada,

¹⁷ e hagadabena ange ai tangada o de Maadua gi denga hegau danuaa alodahi.