2 Timothy 2 - De Beebaa Dabu

Taane hebagi danuaa o Klisdo Iesu

¹ Deenei ai, dagu dama, koe gi lodo mmahi i de abodonu e dagodo laa i daho Klisdo Iesu;

² gai koe daohia au mee gu langona dagu tala i mada i mua o de gau tala hagadonu soa, gai koe ga agoagona ange ai gilaadeu e hai hegau i de mee abodonu, gai gilaadeu e maua hogi i de agoago ange ai de gau ange laa.

³ Gai koe gi gaavee hogi de hagaduasala bei dagodo o taane hebagi danuaa o Klisdo Iesu.

⁴ E deai donu se daane e hagadee saohia ange ia gi hegau i de laa tubua, i de masavaa o de hebagi, gai dana mee e hai go de hagamalangilangi donu huu dono dagi.

⁵ Tangada e haia hagadaahao e dee kave dahi hagaoanga noo ia tee hagadaahao gi bei denga hainga.

⁶ Gai go tangada hai hegau hagammahi i de veelenga, e heohi de kave dono duuhanga mai i denga huamanu i taamada.

⁷ Noho hagasaele age agu muna e tala adu nei gi de goe, gai Tagi Maolunga ga hai ai gi donu ange goe gi mee nei alodahi.

⁸ Manadua dagodo o Iesu Klisdo, ia ne mouli age mai i de magau, gai se hagadiilinga niio David, bei de hai gu tala ai i de longo danuaa oogu e agoago ai nei.

⁹ Deenei de longo danuaa oogu e hagaduasala ai nei ma de nnoa i daula bei dagodo o tangada e hai baasi ange gi de hainga. Aagai muna a de Maadua e dee maua donu i de nnoa.

¹⁰ Deenei ai, au e lodo mmahi i de hagauda mee nei alodahi, i hiidinga o dangada a de Maadua gu lava laa i de hili, gi maua ai e gilaadeu de hagamouli i delaadeu kai ange gi Klisdo Iesu, ma de mahamaha e deai laa se ngado mai.

¹¹ Muna nei ni muna abodonu: Noo gidaadeu e maakau madali ia, gai gidaadeu e mouli age hogi madali ia.

¹² Noo gidaadeu e duudagi de golomagi odaadeu lodo, gai gidaadeu e dagi naa hogi madali ia. Noo gidaadeu e hagadee iloo ia, gai ia e dee hagadee iloo naa hogi gidaadeu;

¹³ noo gidaadeu e dee hai hegau i de mee abodonu, gai ia e dee tuu donu dono hai hegau i de mee abodonu. Go hiidinga ia e dee maua i de hagahadu muna donu huu ia.

Tangada hai hegau o de Maadua e lodo ai

¹⁴ Gai koe hagamanadua ina ange gi gilaadeu mee nei, ma de tala ange gi gilaadeu i mada luu mada o de Maadua gilaadeu gi dee hagadaumee i denga hagadoonunga o hanu muna; mee nei e deai donu olaadeu haigamaiana, aagai e oha donu lodo o dangada e langona mee laa.

¹⁵ Gai koe hagaduu ngae haia gi se dangada goe e hagamalangilangi ina de Maadua, se dangada hai hegau e dee dogaa, gai e maua i de agoago muna a de Maadua gi heohi.

¹⁶ Aagai koe huli gee i denga ngadi muna, go hiidinga dangada e haia mee nei e hagadagadaga ange naa donu de baubau.

¹⁷ Gai alaadeu agoago e bei dagodo o de maanuga augaua e somo laa ga laumalie. Hymenaeus ma Philetus ni dangada hogi madali de gau bee nei,

¹⁸ go dangada ne daahuli gee i de muna abodonu. Gai gilaadeu e hagataba bolo de mouli age o de gau maakau gu lava donu i de hai. Gai gilaadeu gu hagabaageaa kai o hanu.

¹⁹ Aagai tagelo a de Maadua ne hagaduu e duu donu huu ma e makaga, gai e maaga i muna nei: “Tagi Maolunga e iloo e ia ono dangada donu,” gai “Dangada alodahi e hagaingoo i de ingoo o Tagi Maolunga gi hulo gee i de baubau.”

²⁰ Lo te hale o tangada lava iai denga goloa goolo ma goloa selevaa, aagai iai hogi goloa e hai i laagau ma bela pigi; hanu ni mee ange gi hegau hagamogomogo, gai hanu ange gi hegau i de laa tubua.

²¹ Deenei ai, noo tangada e hagagilimalali ia mai i mee e dee hagadubu, gai ia e hai ga se goloa e hai ai hegau hagamogomogo, gai gu vvae gee e hai gi dabu, ma de haigamaiana ange gi tangada aamua o de hale gai gu baba ange e hai denga hegau danuaa alodahi.

²² Gai koe savini hano gee i lodo dee heohi o denga dama daane mmodo, gai dolohia de heohi, ma de gai, ma de aloha, ma de nnoho paba, madali gilaadeu alodahi e dalodalo ange gi Tagi Maolunga i de lodo e gilimalali.

²³ Koe gi dee anga ange gi ngadi muna ma muna llodo ssenga e dee heloongoi ai dangada, go hiidinga koe e iloo bolo mee nei e hidi mai ai de hagadaumee o dangada.

²⁴ Gai tangada hai hegau o Tagi Maolunga gi dee se dangada e lodo e hagadaumee; aagai ia gi abodonu ange gi dangada alodahi, ia gi maua i de agoago ange dangada, gai gi dee golo age de baubau.

²⁵ Gai ia gi hagaheohi ange tangada e hai baasi ange gi de ia i de lodo e daudonu, ga tali ange de Maadua gi balea ange gilaadeu gi daahuli olaadeu lodo, ma de dagi ange gilaadeu gi de muna abodonu,

²⁶ gai gi ola mai ai gilaadeu i ssele a de ia hagabaubau, go de ia gu noonoodia gilaadeu, gai gilaadeu ga hai ai ono lodo.