2 Timothy 1 - De Beebaa Dabu

De hagaboo

¹ Mai i daho Paul, tangada tala o Klisdo Iesu bei dagodo de hagatau a de Maadua, ma de hagatoo donu o de mouli i daho Klisdo Iesu.

² Ange gi Timothy, dagu dama hagamogomogo. De abodonu, ma tegi, aama de baba mai i daho de Maadua Tamana aama Klisdo Iesu taadeu Dagi Maolunga gi dagodo i oo daha.

De hagakana ange gi lodo mmahi i de gai

³ Au e hagaahe ange de abodonu gi de Maadua, de ia oogu e daumaha ange aagena i tagi o ogu lodo i de muna abodonu, bei ogu dubuna madagidagi, i dagu masavaa e maanadu ai goe i agu dalodalo i de boo ma de laangi.

⁴ Au gu lodo mmao e tilo goe, i dagu noho ga manadua oo loimada, gai gi honu abodonu ai hogi dogu malangilangi.

⁵ Au e manadua hogi doo gai se muna abodonu laa, ne daamada mai laa i daho doo dubuna hahine go Lois aama doo dinana go Eunice. Gai au e hagadonu bolo e dagodo hogi i oo daha iainei.

⁶ Deenei ai, au e hagamaanadu adu, koe gi hagahai hegau ina tuuhanga a de Maadua gu gaavadu naa gi de goe, i de masavaa aagu ne dugu adu ai luoogu lima gi oo elunga;

⁷ go hiidinga de Maadua tee gaamai gi gidaadeu de hagasaalunga o de madagu, aagai go de hagasaalunga iai ssauaa ma de aloha, aama de maanetonu.

⁸ Gai koe gi dee dogaa i de tala hagadonu dagodo o taadeu Dagi Maolunga, aabe gi dogaa i de au, go tangada gu noho i lo te hale pono i ono hiidinga. Aagai koe gi hagaduasala madali au i hiidinga o de longo danuaa i ssauaa o de Maadua,

⁹ go de ia ne hagamouli ina gidaadeu ma de hagahi ange gidaadeu gi de mouli dabu — aagai e dee go hiidinga o adaadeu hegau gu hai, gai go hiidinga o dana hagatau aama dono abodonu mai gi gidaadeu i lodo o Klisdo Iesu mai i taamada age,

¹⁰ gai iainei gu hagaago mai i de humai o taadeu Ia Hagaola go Klisdo Iesu, go de ia ne haia gi deai se sauaa o de magau, gai ga gaamai de mouli aama de mouli e dee ngado mai i de longo danuaa.

¹¹ Gai au ne hili gi se dangada e hagadele ina aama de agoago i de longo danuaa nei,

¹² aanei ogu hiidinga gu hagaduasala ina ai nei. Aagai au e dee dogaa donu, go hiidinga au e iloo be goai aagu gu hagadonusia, gai au e iloo bolo ia e maua i de dagitilo mee alodahi gu gaamai gi de au ga dae gi de laangi laa.

¹³ Koe daohia ma de daudali i agoago heohi aau gu kave mai i ogu daha, i doo gai ma doo aloha i Klisdo Iesu.

¹⁴ Gai koe dagidiiloo daohia mee danuaa gu gaavadu naa gi de goe, i ssauaa o de Hagasaalunga Dabu e noho laa i odaadeu lodo.

¹⁵ Koe e iloo bolo dangada alodahi i Asia ne tili au, bei dagodo o Phygelus ma Hermogenes.

¹⁶ Gai Tagi Maolunga gi abodonu ange gi de huaabodu o Onesiphorus, i hiidinga ia e dee modu donu de hagaaneane ogu lodo, gai e dee dogaa donu i de au i dogu hhao gi lo te hale pono;

¹⁷ gai de masavaa oona ne dae mai ai gi Rome, gai ia ne hagammahi ga ssala gi gidee ia ngau.

¹⁸ (Tagi Maolunga gi haia gi maua e ia tegi mai i daho Tagi Maolunga i de laangi laa!) Gai koe gu iloo dagodo o ana hegau lagolago ne bale mai ai au i Ephesus.