2 Thessalonians 3 - De Beebaa Dabu

Dalodalo i gimaadeu

¹ Denga daina, aanei agu muna hagaodi: goodou dalodalo gi moolau de hagadele muna a Tagi Maolunga ma de hagadubu i daho dangada, bei doodou hai ne hagadubu ai naa hogi.

² Gai goodou dalodalo gi ola mai gimaadeu i dangada e haia de baubau ma de gau baubau, i hiidinga e dee go dangada alodahi e kai.

³ Aagai Tagi Maolunga e hai hegau i de mee abodonu, gai ia ga hagammahi adu ai goodou ma de buibui goodou i de ia baubau laa.

⁴ Gai e dahi donu amaadeu tali hagalodolodo i daho taadeu Dagi Maolunga adu gi goodou, bolo goodou e daudali donu ma de duudagi de hai mee amaadeu gu tala adu gi goodou.

⁵ Gai Tagi Maolunga gi dagina oodou lodo i de aloha o de Maadua aama de golomagi lodo o Klisdo.

De hagakana ange gi dee vaiduu

⁶ Denga daina, gimaadeu e hai adu i de ingoo o taadeu Dagi Maolunga go Iesu Klisdo, goodou gi dee hagabuni ange gi denga daina alodahi e ngadi nnoho laa donu huu, gai e dee daudali i dahulinga oodou gu kave mai i omaadeu daha.

⁷ Goodou gu iloo donu be dee hee doodou hai e ago mai ai i omaadeu mouli. Gimaadeu tee ngadi nnoho i de masavaa omaadeu ne nnoho ai i oodou daha,

⁸ aabe ne gaimee i daho dahi gai tee hagao. Gai gimaadeu ne hagaduu ngae ga hai hegau i de boo ma de laangi, gi dee hagahai ngadaa ina ai e gimaadeu goodou,

⁹ e dee go hiidinga gimaadeu e dee maua i de kave de bale mai i oodou daha, aagai gimaadeu ne llodo e hai dahi hagaago danuaa gai goodou ga ago mai ai i omaadeu mouli.

¹⁰ De masavaa omaadeu e nnoho ai i oodou daha, gai gimaadeu ne tala adu ga hai adu, “Tangada vaiduu e dee heohi donu dono gaimee.”

¹¹ Gai gimaadeu gu langona bolo hanu goodou e vaiduu ma tee llodo e hai hegau, gai e hulo ma e baatai ange gi mee e deai alaadeu hegau e hai ai.

¹² Gimaadeu e hai ange gi dangada e haia mee nei, ma de dangidangi ange gi gilaadeu i de ingoo o Tagi Maolunga go Iesu Klisdo, gilaadeu gi hai hegau e hagadanuaa ai donu gilaadeu.

¹³ Denga daina, goodou gi dee llodo baageaa i de hai tanuaa.

¹⁴ Gai noo dahi dangada e dee lodo e daudali i muna i lo te leda nei, gai goodou gi iloo ono dagodo, gai goodou gi dee hagabuni ange gi de ia, gi dogaa ai ia.

¹⁵ Aagai goodou gi dee haia ia gi se hagadaumee niiodou, aagai goodou hagakana ange ina ia bei dagodo o dahi daina.

Muna hagaodi

¹⁶ Gai Tagi Maolunga o de baba gi gaavadu gi goodou de baba i masavaa alodahi ma mee alodahi. Tagi Maolunga gi noho i oodou daha alodahi.

¹⁷ Go au donu go Paul ne siia de hagaboo nei i dogu lima donu. Deenei de hagailonga oodou e iloo ai agu leda alodahi; deenei donu dagu hai e sisi ai.

¹⁸ De abodonu o taadeu Dagi Maolunga go Iesu Klisdo gi dagodo i oodou daha alodahi.