2 Thessalonians 2 - De Beebaa Dabu

De ia e oohaa de hainga

¹ Gai dagodo o de ahe mai o taadeu Dagi Maolunga go Iesu Klisdo, ma taadeu hagabuni madali ia, denga daina, gimaadeu e dangidangi adu:

² goodou gi dee moolau de gaavee oodou lodo, be go de manavasaa oodou lodo, i hiidinga o dahi hagasaalunga be go hanu agoago, aabe se leda a hanu ne gaavadu, bolo se leda mai i omaadeu daha, gai e tala ai bolo de laangi o Tagi Maolunga gu dae mai donu.

³ Goodou gi dee dugua ange dahi dangada gi hagasengalia goodou. Go hiidinga de laangi laa e dee hai naa donu, ga dae ai gi de sula age de hai baasi, gai de ia e oohaa de hainga e hagasula mai naa, go de ia gu hagadabena ange laa e hagaduasala.

⁴ Gai ia e hai baasi ange ma de hagamaolunga i mee alodahi e hagaingoo ange bolo se maadua, aabe go mee e daumaha ange laa dangada aagena. Ia e noho naa hogi i de temple o de Maadua ma de hagadaba bolo ia go de Maadua.

⁵ Gai goodou manadua bolo au gu tala adu donu mee nei gi goodou, i dogu masavaa ne nnoho ai i oodou daha.

⁶ Gai goodou e iloo donu be se aha e daohia ia iainei, gai gi hagasula mai ai ia i de masavaa gu lava laa i de hagamodu.

⁷ Gai mee e dee iloo laa i dagodo o de ia e oohaa de hainga gu hai hegau donu iainei; aagai de ia e daohia laa ia, e daohi naa donu ia ga dae ai gi dono masavaa e kave gee ai.

⁸ De masavaa laa gai de ia e oohaa de hainga e hagasula mai naa donu, gai Tagi Maolunga go Iesu e daa naa ia ga magau i dana manava, ma de hagalilo ia i dono mahamaha i dono masavaa e ahe mai ai.

⁹ Gai de humai o de ia e oohaa de hainga e hai hegau naa i ssauaa o Satan. Ia e hai naa denga hagadaagangaa sauaa mmahi, ma de hai denga hagailonga, ma mee hagalele mouli e hagasenga ai dangada,

¹⁰ aama hegau baubau alodahi e hagasengalia laa gilaadeu gu hagadabena ange e maakau. Gilaadeu e maakau i hiidinga gilaadeu tee llodo e kave de muna abodonu gi hagamouli ai gilaadeu.

¹¹ Deenei ai, de Maadua e hai naa gi laumalie de hagasenga, gai gi hagadonusia ai e gilaadeu de muna hadu,

¹² gai e hagaduasala naa gilaadeu alodahi e dee hagadonusia de mee abodonu, aagai ne malangilangi i de baubau.

Goodou tuu gi makaga

¹³ Gimaadeu e hagaahe ange de abodonu gi de Maadua i masavaa alodahi i oodou hiidinga, denga daina o Tagi Maolunga e aloha ai laa, go hiidinga mai i taamada age gai de Maadua ne hili goodou gi hagamouli ga vvae gee goodou i ssauaa o de Hagasaalunga ⌊Dabu⌋, aama doodou hagadonu de mee abodonu.

¹⁴ Gai ia ne hagahi ange goodou gi de mee nei i doodou hagadonu de longo danuaa amaadeu gu agoago adu ai goodou, gai gi gaavee ai e goodou de mahamaha o taadeu Dagi Maolunga go Iesu Klisdo.

¹⁵ Deenei ai, denga daina, goodou tuu gi makaga ma de daohi muna amaadeu gu agoago adu ai goodou, e dee hilihili be go amaadeu muna e tala adu aabe go amaadeu leda e sisi adu.

¹⁶ Gai taadeu Dagi Maolunga go Iesu Klisdo aama de Maadua taadeu Damana e aloha laa i gidaadeu, ma de hagaaneane odaadeu lodo ga hano ai, aama de tali hagalodolodo i dono abodonu,

¹⁷ ga hagaaneane ai oodou lodo aama de hagammahi goodou i hegau danuaa alodahi aama de tala muna danuaa.