2 Samuel 22 - De Beebaa Dabu

Taahili tuhi a David

¹ Gai David ne daahili ange gi Tagi Maolunga i taahili nei, i de masavaa a Tagi Maolunga ne hagaola ai ia mai i ono hagadaumee alodahi, ma mai i a Saul.

² Ia ne hagadaba, “Tagi Maolunga go dogu baba makaga, ma dogu mommee buibui makaga ma dogu Ia Hagaola;

³ dogu Maadua go dogu baba makaga, go ono daha oogu e mmuni ai, go ia dagu mee hungihungi ma de hanga manu e hagaola ina mai au. Go ia dogu mommee buibui makaga ma dogu mommee mmuni, aama dogu Ia Hagaola, e hagaola ina mai au i de gau alasala.

⁴ Au e hagahi Tagi Maolunga, go de ia e heohi dagu tuhi, gai au gu ola mai i ogu hagadaumee.

⁵ Denga beau o de magau gu duuli au, de mee mmilo e oohaa laa mee gu haoli au.

⁶ Daula o de mommee o de gau maakau gu vini au, gai sele o de magau gu daohi au.

⁷ Au ne hagahi Tagi Maolunga i dogu duasala; au ne hagahi dogu Maadua. Gai ia ne langona mai dogu leo i dono temple, gai dagu dangi gu dae ange ai gi luoono dalinga.

⁸ Henua i lalo ne ngalungalue ma de bolebole; denga dagelo o de langi gu ngalungaalue, ma de bolebole i hiidinga ia gu lili.

⁹ De useahi gu buu mai i lodo luoono bongaa usu; de ahi ula gu sao mai i lo tono ngudu, gai denga maga ahi e kaa mai i ono daha.

¹⁰ Ia e hai gi baa iho de langi, gai ia ga iho ai; denga hagausinga maadolu i lalo luoono vae.

¹¹ Ia e gage i honga dahi cherubim ma e lele ai; ia e lele i honga bakau o de madangi.

¹² Ia e hai de gohu go dono hale malo — denga hagausinga maadolu, e hoohonu i denga vai.

¹³ De maalama i ono mada i mua e bei de maga ahi mmahi.

¹⁴ Tagi Maolunga e basa mai i de langi bei de babaa denga hatuli, de Ia Maolunga Mmao laa e hai gi langona dono leo.

¹⁵ Ia e tili dao o dana mee hholu gi mavaevae saele ai denga hagadaumee; de labalaba o denga uila e hai gi ssenga ange gilaadeu.

¹⁶ Lodo ava o tai gu ssula age, gai dagelo o henua i lalo gu gidee, i de hagasee a Tagi Maolunga, ga busi luoono bongaa usu.

¹⁷ Ia ne ino iho i de mommee maolunga ga poo au, ia ne dada age au mai i lo te moana gelo.

¹⁸ Ia ne hagaola mai au i dogu hagadaumee mmahi, ma mai i gilaadeu e kino i de au, go hiidinga gilaadeu e mmahi ange i de au.

¹⁹ Gilaadeu ne hebagi mai gi de au i de laangi oogu ne hai ngadaa ai; aagai Tagi Maolunga ne bale mai au.

²⁰ Ia ne hagasao mai au ga dugu i de mommee lahalaha; ia ne hagaola ngau, go hiidinga ia e malangilangi i de au.

²¹ Tagi Maolunga gu sui mai dogu heohi; ia ne hagao mai au gi bei de gilimalali o agu hegau.

²² Go hiidinga au ne daohi haiava o Tagi Maolunga; au tee hai de baubau ga hano gee ai i dogu Maadua.

²³ Au ne daohi ana hagamodu alodahi; au tee tili donu ana mee gu hagasauaa.

²⁴ Au tigi haisala donu i mada luoono mada, gai au ne daohi gi dee haisala au.

²⁵ Tagi Maolunga gu hagao mai au, gi bei dagodo o dogu heohi, ma de gilimalali o agu hegau i mada luoono mada.

²⁶ Koe e hai hegau i de mee abodonu ange gi tangada e hai hegau i de mee abodonu; koe e hai hegau i de heohi ange gi gilaadeu e heohi.

²⁷ Koe e hai hegau i de gilimalali ange gi gilaadeu e gilimalali, aagai e hagaago ange gi de gau vaivai daakodo doo alasala.

²⁸ Koe e hagaola gilaadeu e llodo maolalo, aagai koe e hagamaolalo gilaadeu e llodo maolunga.

²⁹ Uaa, Tagi Maolunga, go koe dagu laama; dogu Maadua e sui de gohu i ogu daha gi se maalama.

³⁰ Go koe e haia gi kii au i dahi hagabuulinga hebagi, gai dogu Maadua e hai gi maua e au i de gage laa honga de buibui.

³¹ De Maadua, ono dagodo e honu abodonu; muna a Tagi Maolunga e heohi abodonu. Ia se buibui niiolaadeu alodahi e mmuni i ono daha.

³² Goai de Maadua, e dee go Iahweh donu huu? Gai goai de baba makaga, e dee go taadeu Maadua donu huu?

³³ Go de Maadua dogu buibui makaga, ma de hai gi heohi abodonu dogu haiava.

³⁴ Ia e hai luoogu vae gi bei luu vae o dahi dia, ma de hai gi maua e au i de duu i honga mommee maolunga.

³⁵ Ia e hai gi aabo luoogu lima i de hebagi, gi maua ai e au i de tili de mee hholu e hai i bronze.

³⁶ Koe e buibui au i dau hagaola, gai koe ne ino iho ga hai au gi se dangada maolunga.

³⁷ Koe ne hagaduu au i de mommee lahalaha, gai luoogu vae tee ssege donu.

³⁸ Au ne doolohi ogu hagadaumee ga daa gilaadeu, gai au tee ahe dua donu ga dae ai gi de odi gilaadeu i de maakau.

³⁹ Au ne daa gilaadeu alodahi ga maakau, gilaadeu gu dee maua i de hiihidi age ange; gilaadeu gu baakuu ma gu daakodo i lalo luoogu vae.

⁴⁰ Koe ne gaamai gi de au de mmahi e hebagi ai; koe ne hai ogu hagadaumee gi too gi ogu lalo.

⁴¹ Koe ne hai ogu hagadaumee gi saavini gi hulo gee, gai au gu daa gi maakau gilaadeu e kino i de au.

⁴² Gilaadeu ne ssala, aagai teai donu dangada ne hagaola ina gilaadeu; gilaadeu ne tangi ange gi Tagi Maolunga, aagai ia tee basa ange gi gilaadeu.

⁴³ Au ne hagailiili gilaadeu ga bei mama o de gelegele; au ne mmili ma de dagadagahi gilaadeu gi lalo bei gelegele i honga denga haiava.

⁴⁴ Koe gu hagaola mai au i ogu dangada e hai baasi mai gi de au. Koe gu hai au go tagi o denga huaahenua; dangada aagu e dee iloo gu hai hegau mai gi de au.

⁴⁵ De gau henua gee gu loomai ma de maatagu; de masavaa donu huu alaadeu e langona ai agu muna, gai gilaadeu e hagallongo mai gi de au.

⁴⁶ De gau henua gee gu deai selaadeu tali; gilaadeu gu sasao mai i lodo olaadeu mommee buibui makaga ma de bolebole.

⁴⁷ Tagi Maolunga e mouli laa! Hagadegi ina dogu baba makaga! Hagaamua ina dogu Maadua, de baba makaga, go dogu hagaola!

⁴⁸ Go ia de Maadua e suuia ange mee gu hai mai gi de au, ma de hai denga huaahenua gi nnoho i ogu lalo,

⁴⁹ go ia e hagaola ina mai au i ogu hagadaumee. Koe gu hagaamua ngau i ogu hagadaumee, koe gu hagaola mai au i de gau daa dangada.

⁵⁰ Deenei ai, Tagi Maolunga, au e tuhi goe i magavaa o denga huaahenua; au e daahili ma de tuhi doo ingoo.

⁵¹ Ia ne hai gi kii de hodooligi aana gu hili, ia e abodonu ange gi taane aana gu hagadabu i de lolo, ange gi David ma dono aamuli ga hano ai.”