2 Peter 3 - De Beebaa Dabu

De laangi o Tagi Maolunga

¹ Ogu soa hagamogomogo, deenei de lua leda aagu gu sisi adu gi goodou, gai au ga hai gi aahe ange goodou gi manadua mee gilimalali.

² Gai goodou gi manadua muna gu tala laa madagidagi i daho denga pelaabisi dabu ma muna a Tagi Maolunga de Ia Hagaola gu tala mai laa i daho oodou dangada tala.

³ Gai deenei tahi mee hugadoo oodou e hai gi iloo: de gau doo mee e loomai naa ga doo mee i denga laangi hagaodi. Gilaadeu e daudali naa donu huu i olaadeu lodo dee heohi.

⁴ Gai gilaadeu e ssili naa ga hagataba, “I hee iai de ia gu lava laa i de hagatoo donu bolo e humai? Mai i dua de maakau odaadeu dubuna madagidagi, gai mee alodahi go tagodo mau donu huu, mai i taamada age de hai o henua i lalo.”

⁵ Aagai gilaadeu gu ngalo donu bolo madagidagi gai de Maadua ne basa ga hai ai de langi, gai henua i lalo ne hai i lo te vai.

⁶ Gai go vai nei hogi ne oha ai henua i lalo i de masavaa laa.

⁷ Gai go muna mau nei hogi e hagadabena ange ai de langi ma henua i lalo nei, e dudu i de ahi, ma de dugu ange gi de laangi hagamodu muna ma de daa ai gi maakau de gau baubau.

⁸ Ogu soa hagamogomogo, goodou gi dee ngalo bolo dahi laangi sogosogo, e bei de mano ngadau i daho Tagi Maolunga, gai de mano ngadau e bei donu huu dahi laangi.

⁹ Gai Tagi Maolunga e dee hai mee mudumudu i de hagassula dana mee gu hagatoo donu ai, bei de hai a hanu e maanadu ai, gai e golomagi ono lodo i oodou hiidinga; ia e dee lodo dahi dangada daudahi gi magau, aagai dangada alodahi gi daahuli olaadeu lodo.

¹⁰ Aagai de laangi o Tagi Maolunga e dae mai naa bei de humai o tangada gaiaa. De langi e hagalongaa naa i de masavaa e hagalilo ai; gai ono mee alodahi e odi naa i de vaivai i de ahi, gai henua i lalo ma mee alodahi i ono elunga e odi naa hogi i de hagaago mai.

¹¹ Go hiidinga mee alodahi e odi naa donu i de oha, gai dee hee ai naa doodou hai e mouli ai iainei? Goodou gi ni dangada e dabu ma de hai lodo o de Maadua,

¹² i de masavaa oodou e tali ai, ma doodou llodo mmao gi moolau de dae mai de laangi o de Maadua, go hiidinga de langi e odi naa i de dudu i de ahi, gai mee i lo te langi e vaivai naa i de mahana o de ahi.

¹³ Aagai gidaadeu e tali de langi hoou ma henua i lalo hoou, gu lava laa i de hagatoo donu, go de mommee iai de heohi.

¹⁴ Deenei ai, ogu soa hagamogomogo, go hiidinga goodou e tali de hai mee nei, goodou hagaduu ngae haia gi deai duulangaa mee gelegele, aabe ni mee baubau i oodou daha, aama de nnoho paba.

¹⁵ Goodou manadua bolo de golomagi lodo o taadeu Dagi Maolunga e hagamouli dangada. Deenei hogi de mee a taadeu daina hagamogomogo go Paul gu sisi adu ai, i de heiangi a de Maadua gu gaavange laa gi de ia.

¹⁶ Ia ne sisi donu hogi mee nei i lodo ana leda alodahi, ma de basa i dagodo o mee nei. Gai e hanu mee i lodo leda nei e hai ngadaa i taadeu tonu ange aagena, go mee a de gau ssenga ma gilaadeu e llodo lagolago e hagadonu sala, ga hidi mai ai delaadeu daa ga maakau, gai e bei hogi delaadeu hai e hagadonu ai laa muna o de Beebaa Dabu ange laa.

¹⁷ Deenei ai, ogu soa hagamogomogo, goodou gu iloo donu mee nei, gai goodou dagidiiloo gi dee hagasengalia goodou i alaadeu agoago dee heohi, ga dee maua ai e goodou i de tuu gi makaga.

¹⁸ Aagai goodou gi hagadagadaga age i de abodonu ma doodou iloo taadeu Dagi Maolunga, go de Ia Hagaola go Iesu Klisdo. Gidaadeu gi hagamahamaha ina ia iainei ga hano ai e dee ngado mai! Amen.