2 Peter 2 - De Beebaa Dabu

Denga pelaabisi hadu muna

¹ Gai gu hanu donu pelaabisi hadu muna ne ssula age i magavaa o dangada, gai e hanu naa hogi dangada agoago hadu muna e loomai gi oodou magavaa. Gilaadeu e hagammuni naa delaadeu gaamai denga agoago hadu muna ma de hagamanavasaa, ga hagangadi mee ai de Ia Aamua ne hagao ina gilaadeu; gai gilaadeu e hai naa donu ga moolau delaadeu hagaduasala.

² Gai e soa naa dangada e daudali ange i alaadeu dahulinga baubau; go hiidinga o alaadeu hegau e hagabaubau ina ai de Haiava o de Heohi.

³ Gai gilaadeu e hadu age naa hanu muna hhadu, e hagasenga ai goodou i hiidinga delaadeu nnoo hagamau mee; de hagaduasala gu tala laa madagidagi goi hai hegau donu huu, gai delaadeu hagaduasala gu baba ange donu.

⁴ Gai noo de Maadua tee hagaola de gau de langi i de masavaa olaadeu ne haisala ai, aagai ne tili ange gilaadeu gi lo te ahi o Gehenna, ma de noonooa gilaadeu ga dugu i lo te geelonga gohu ga dae mai ai de masavaa hagamodu muna;

⁵ gai noo ia tee hagaola henua i lalo madagidagi, i de masavaa aana ne gaamai ai tolona gi honga o dangada tee haia lodo o de Maadua, aagai ne hagaola donu huu Noah, de ia ne agoagona dagodo o de heohi, madali e dogohidu ange dangada;

⁶ noo ia ne hagaduasala Sodom ma Gomorrah, ga dudu luu mommee laa ga hai gu ni lehu, ma de hai luu mommee laa gi se ada e hagaago mai ai mee e hai ange gi de gau baubau;

⁷ gai noo ia ne hagaola taane heohi go Lot, go de ia ne daemaha laa ono lodo i dana gide denga dahulinga hakino gee a de gau baubau,

⁸ (go hiidinga mee a taane heohi laa gu gidee ma de langona i dono noho i olaadeu magavaa, ne hai ga kona mmao de duasala ono lodo i laangi alodahi, i hiidinga o alaadeu hegau baubau) —

⁹ noo deenei tagodo, gai Tagi Maolunga e iloo de hai e hagaola ai gilaadeu e heohi mai i denga hagatale, ma de daohi gilaadeu e dee hai hegau i de mee heohi, i lalo de hagaduasala ga dae ai gi de laangi hagamodu muna.

¹⁰ Gai mee nei e hai ange naa donu gi gilaadeu e hai hegau i denga lodo hakino gee, aama de hagangadi mee gilaadeu iai ssauaa e dagi ai. De gau bee nei e hagamaolunga, ma de hai alaadeu hai, gilaadeu e dee maatagu donu i de pasa baubau i de gau de langi mahamaha laa;

¹¹ gai dagodo o denga dangada de langi, e dee galemu donu delaadeu mmahi ma de sauaa, aagai gilaadeu tee hagabaubau donu gilaadeu i mada luu mada o Tagi Maolunga.

¹² Aagai de gau bee nei e bei dagodo o denga manu alasala, e dee maua i de hagasaele dahi mee, gai ne haanau mai e daa gi maakau; gilaadeu e pasa hagangadi mee i mee olaadeu e dee tonu ange aagena, gai e daa naa donu gi maakau bei olaadeu dagodo.

¹³ Gilaadeu e kave naa de hagaoanga o alaadeu hegau baubau gu hai. Gilaadeu e maanadu bolo de malangilangi abodonu go de hai daonga ga hagalongaa ai i de laangi. Gilaadeu e bei dagodo o denga duulangaa mee gelegele ma mee baubau, i delaadeu hai denga daonga ga hai ai denga dahulinga hakino gee olaadeu e malangilangi ai laa, gai e loomai hogi ma e daonga madali goodou.

¹⁴ Olaadeu mada e haaina denga haahine hai be se manu, gai e dee lava donu olaadeu llodo i de haisala. Gilaadeu e hagasenga gilaadeu e baageaa olaadeu lodo. Gai olaadeu lodo gu hagaabo ange gi de nnoo hagamau mee. Gilaadeu gu hagamalaia donu!

¹⁵ Gilaadeu gu tili de haiava heohi, ma de daahuli gee ai. Gilaadeu gu daudali ange i de haiava o Balaam tama daane a Beor, go taane ne nnoo ange laa gi goloa e maua i hegau baubau.

¹⁶ Aagai ne hagaseegina i hiidinga ono haisala i e dahi donkey — se manu e dee maua i de basa i de laa tubua — gai ne basa ange gi de ia i de leo o tangada ga hai de pelaabisi laa gi dee hai hegau bei dagodo o tangada lodo senga.

¹⁷ De gau bee nei e bei dagodo o denga vai geli e deai laa vai iai, ma de mama o de vai a de madangi mmahi e ili saele laa; gai de gohu boo dangodango gu hagadabena ange donu gi gilaadeu.

¹⁸ Gilaadeu e pasa hagassoenga i mee e deai haigamaiana, gai e hai hegau i lodo hakino gee o de angaanga ma e hagasengalia laa dangada, se goodo ola mai laa i daho dangada e mouli dee heohi.

¹⁹ Gilaadeu e hagatoo donu ange gi dangada bolo gilaadeu e ilaage donu, aagai gilaadeu donu, ni dangada hai hegau niio denga lodo hakino gee; go hiidinga dangada ni dangada hai hegau donu niio de mee e dagina gilaadeu.

²⁰ Noo gilaadeu gu ola mai i denga dahulinga hakino gee o henua i lalo, i delaadeu iloo taadeu Dagi Maolunga ma de Ia Hagamouli go Iesu Klisdo, gai gu aahe ange hogi ma gu hai ma de hagadee kii ina i mee nei, gai olaadeu dagodo i de hagaodi gu kii ange de baubau i taamada.

²¹ Gai e danuaa ange noo gilaadeu tee iloo de haiava heohi, i delaadeu tonu ange gi de mee nei, aagai muli mai gilaadeu gu daahuli gee i muna dabu gu gaavange laa gi gilaadeu.

²² Gilaadeu gu bei dagodo o muna heiangi abodonu e hai ange laa: “De gaaduu e ahe ange ga gai ono hagalueia,” gai “De biigi gu lava laa i de gaugau e ahe ange ga dige saele i lo te bela.”