2 Corinthians 9 - De Beebaa Dabu

De bale ange gi denga daina i Jerusalem

¹ Gai e deai donu haigamaiana dagu sisi adu ange dagodo o de bale ange gi dangada o de Maadua,

² go hiidinga au e iloo bolo goodou gu paba ange donu e bale, gai au gu tuhi ange goodou gi de gau Macedonia, ma de tala ange, bolo denga daina i Achaia gu paba ange huu e daohi age de mee nei i de ngadau ne hano laa; gai doodou lodo mmahi gu hai gi soa dangada e llodo e bale.

³ Aagai au ne hai gi loadu hanu odaadeu daina gi oodou daha, gi dee ni ngadi muna ai amaadeu ne tuhi ai goodou, gai gi paba ange ai goodou, bei dagu hai gu tala ai laa.

⁴ Gai noo hanu dangada Macedonia e loadu madali au ga gidee bolo goodou tigi paba, gai gimaadeu e dookaa naa — gai goodou e kii ange naa donu doodou dookaa — i hiidinga de dahi amaadeu tali adu gi goodou.

⁵ Deenei ai, au ne maanadu bolo se mee danuaa de hai denga daina nei gi loadu i mua dogu hanadu, gi hagadabena ina ai de mee ngadi gaavange oodou gu lava laa i de hagatoo donu ai, gai gi baba ai doodou mee ngadi gaavange i doodou malangilangi, e dee se mee e hai gi de mahi.

⁶ Deenei tagodo: tangada e sogoisi ana mee e doo, e sogoisi naa hogi ana mee e hagihagi, gai tangada e lagolago ana mee e doo, e lagolago naa hogi ana mee e hagihagi.

⁷ Gai dahi ma dahi gi gaavange dana mee gu baba age laa e gaavange, ia gi dee lodo lagolago ange aagena, aabe gi haia i hiidinga ia gu haia gi de mahi, go hiidinga de Maadua e lodo mmao i tangada e malangilangi laa i de ngadi gaavange mee.

⁸ Gai de Maadua gi hagalaumalie ina dono abodonu adu gi goodou, gi deai ai oodou mee e duasala ai i masavaa alodahi, gai gi maua ai e goodou i de hai denga hegau danuaa alodahi.

⁹ Gu sisi e hai ange, “Ia gu ngadi gaavange mee gi gilaadeu e hagaau aloha; gai dono heohi e dagodo ga hano ai.”

¹⁰ De ia e gaavange golee a tangada hai veelenga ma pelaoaa e gai mee ai ia, e gaavadu naa hogi oodou mee, ma de hai gi laumalie tau gai o oodou heohi.

¹¹ Gai ia e hai naa goodou gi lava i mee alodahi, gi maua ai e goodou i de ngadi gaavange mee, gai dangada ga hagaahe ange ai de abodonu gi de Maadua, i oodou ngadi gaavange ne gaamai gimaadeu gi gaavange gi gilaadeu.

¹² Gai de hegau oodou gu hai nei e dee bale ange donu huu dangada o de Maadua e duasala, aagai gu hai dangada soa gi hagaahea ange de abodonu ma de tuhi de Maadua.

¹³ De hegau oodou gu hai nei gu hagaago danuaa ange gi gilaadeu dagodo o oodou kai, gai gilaadeu gu tuhi de Maadua i hiidinga doodou hagallongo i muna, ma doodou daohi muna o de longo danuaa o Klisdo, aama de laumalie doodou mee ne daohi age e bale ange ai gilaadeu madali de gau ange laa.

¹⁴ Gai gilaadeu gu aaloha hogi i goodou ma de dalodalo i goodou, i hiidinga de abodonu laumalie o de Maadua adu gi goodou.

¹⁵ Gai de abodonu ange gi de Maadua i dana ngadi gaavange e dee maua laa e gidaadeu i de tala ono dagodo!