2 Corinthians 8 - De Beebaa Dabu

Ssigidaumaha ange gi dangada o de Maadua

¹ Denga daina, gimaadeu e llodo goodou gi tonu ange gi de abodonu o de Maadua ange gi denga nohoanga dabu i Macedonia.

² De masavaa ne kona ai delaadeu hai ngadaa, gai gilaadeu ne malangilangi i de daohi age dahi sigidaumaha, e dee galemu donu delaadeu hagaau aloha.

³ Gai au e tala hagadonu adu bolo gilaadeu ne gaavange donu delaadeu mee ne mau, gai ne dubu ange donu hogi i mee alaadeu ne mau. Gai gilaadeu ne malangilangi donu i de hai de mee nei.

⁴ Gilaadeu ne dangidangi mai bolo gilaadeu e llodo hogi e daohi age dahi mee e bale ai dangada o de Maadua.

⁵ Gai de mee alaadeu ne daohi age e kii ange donu i mee amaadeu ne maanadu; aagai gilaadeu ne dugu ange gilaadeu i mua gi Tagi Maolunga aama gi gimaadeu bei dagodo lodo o de Maadua.

⁶ Gai deelaa hogi demaadeu hai ne hagammahi ange ai Titus, taane ne daamada ina de hegau nei, gai ia ga tilo ai ga hagalava de hegau danuaa nei i oodou daha.

⁷ Goodou gu lava i mee alodahi — i de gai, ma oodou muna e tala, ma de iloo mee, ma de llodo mmahi i de bale, ma doodou aaloha i gimaadeu — deenei ai, goodou diiloo gi kii ange doodou hagasula de hai hegau nei.

⁸ Au e dee tala hagasoe adu donu huu muna nei gi goodou, gai au e lodo e tilo be oodou aaloha ni mee abodonu, i dagu tala adu de lodo mmahi o de gau ange laa i de bale.

⁹ Gai goodou gu iloo dagodo de abodonu o Iesu Klisdo taadeu Dagi Maolunga, ia e lava mmao, gai ia ne hai gi se dangada hagaau aloha i oodou hiidinga, gi maua ai e goodou i de hai gi ni dangada e lava i dono hagaau aloha.

¹⁰ Gai au e lodo e tala adu dagu maanadu i dagodo o de mee nei: e danuaa doodou hagalava de hegau oodou ne daamada laa i de ngadau gu hano, gai ne malangilangi donu i de hai de mee nei.

¹¹ Deenei ai, goodou hagalava ina de hegau gu baba ange laa e hai, gi bei doodou hai ne llodo ai laa, i mee oodou e hanu.

¹² Go hiidinga noo tangada gu baba ange, gai ia gi gaavange gi bei mee e hanu i ono daha, e dee go mee e deai i ono daha.

¹³ Gai e dee se hai gi hai ngaohie ange ai gi dangada ange laa, gai goodou gu hai ngadaa, aagai e hagahedae ai dangada alodahi:

¹⁴ oodou lava gu bale ange gilaadeu i delaadeu duasala iainei, gai olaadeu lava e bale adu naa goodou i doodou masavaa e duasala ai, gi hedae ai dangada alodahi.

¹⁵ Gu sisi e hai ange, “Tangada e hagabudulia mee lanea e deai donu ana mee e doe, gai tangada e hagabudulia mee momo e deai donu ono mee e duasala ai.”

De hai o Titus gi hano gi Corinth

¹⁶ Gai de abodonu ange gi de Maadua, i dana gaavange gi lodo o Titus de lodo mmao e bale adu goodou bei ogu dagodo.

¹⁷ Gai ia tee hai donu huu de mee nei i hiidinga demaadeu dangidangi ange gi de ia, gai ia ne malangilangi donu i de hanadu gi oodou daha.

¹⁸ Gimaadeu e hai gi hanadu madali ia dahi odaadeu daina, ia se daane gu soa dangada i denga nohoanga dabu e iloo, i hiidinga dana agoago de longo danuaa.

¹⁹ Gai e dee deenaa donu huu, aagai denga nohoanga dabu gu hili ia gi hagadaga saele madali gimaadeu, i demaadeu hulo e kave de mee ngadi gaavange nei, e hagamahamaha ai Tagi Maolunga aama de hagaago mai ai demaadeu llodo mmao e bale.

²⁰ Gimaadeu e hai de mee nei gi deai ai dangada e hagabaubau ina gimaadeu i demaadeu hai e hai ai de ngadi gaavange laumalie nei,

²¹ go hiidinga gimaadeu e dee hai hegau ange donu huu e hai de mee danuaa i mada luu mada o Tagi Maolunga, aagai go madamada hogi o dangada.

²² Gai gimaadeu gu hai gi hanadu demaadeu daina madali gilaau, gai gu dee modu demaadeu hagatale ono dagodo ma gu gidee bolo ia e hai hegau hagammahi i mee lagolago, aagai gu kii ange donu dono hai hegau hagammahi i hiidinga de dahi ana tali adu gi goodou.

²³ Gai dagodo o Titus, ia se daane e hai hegau madali au e bale adu ai goodou. Gai luu daane ange laa ni dangada e suuia denga nohoanga dabu, aama de hagadubu Klisdo.

²⁴ Deenei ai, goodou hagaagona ange gi denga nohoanga dabu ange laa bolo oodou aaloha aama mee amaadeu gu tala tuhi ange ai goodou gi denga daane nei ni muna abodonu.