2 Corinthians 7 - De Beebaa Dabu

¹ Denga daina hagamogomogo, go hiidinga denga hagatoo donu nei ni mee mai gi gidaadeu, deenei ai, gidaadeu ga hagagilimalali gidaadeu mai i denga mee alodahi e haia gi dee gilimalali de angaanga ma de hagasaalunga. Gai gidaadeu ga hai gi honu taadeu hai gi dabu gidaadeu i de madagu i de Maadua.

De malangilangi o Paul

² Goodou huugea mai oodou lodo gi gimaadeu; gimaadeu tigi haisala ange donu gi dahi dangada, gimaadeu tee hagasenga dahi goodou, aabe ne gaiaa oodou mee.

³ Au e dee tala adu mee nei e hagabaubau goodou, go hiidinga au gu lava i de tala adu i mua bolo goodou i omaadeu lodo, e dee hilihili be gimaadeu e maakau aabe e mouli madali goodou.

⁴ Au e basa hagasoe adu donu gi goodou; au e kona hogi dagu tuhi goodou. Au gu kona mmao de lo taane ogu lodo. E dee galemu demaadeu hai ngadaa, gai au gu kona donu dogu malangilangi.

⁵ De masavaa omaadeu ne tae ai gi Macedonia, gai gimaadeu tee maua donu i de hagammabu, aagai gimaadeu ne tuu ange gi denga hagadaagangaa hagaduasala; gimaadeu ne hagadaumee ange gi de gau ange laa aama de manavasaa omaadeu lodo.

⁶ Aagai de Maadua, go de ia e hagaaneane ina lodo o dangada e daemaha laa, ne hagaaneane omaadeu lodo i de dae mai o Titus gi omaadeu daha,

⁷ gai e dee go hiidinga donu huu dono dae adu, aagai go hiidinga hogi doodou hagamaamaane ono lodo. Ia gu tala mai dagodo o doodou llodo au gi dae adu gi oodou daha, ma de daemaha oodou lodo, aama doodou llodo gaiaa i ogu hiidinga, deenei ai, au gu kii ange donu dogu malangilangi.

⁸ Gai noo au ne hagadaemaha oodou lodo i dagu leda, gai au e dee hagaahe donu agu muna — gai au ne maanadu donu de hagaahe agu muna, go hiidinga au ne gidee bolo dagu leda gu hagadaemaha oodou lodo i dahi masavaa bodobodo.

⁹ Gai iainei au gu malangilangi, gai e dee go hiidinga goodou gu daemaha, aagai go hiidinga doodou daemaha ne hai ga daahuli oodou lodo. Goodou ne daemaha oodou lodo bei dagodo de hagatau a de Maadua, gai gi dee hagadaemaha ina ai e gimaadeu goodou i dahi mee.

¹⁰ Gai taemaha i de hagatau a de Maadua e hai ga dahuli de lodo e dagina ange laa tangada gi de hagamouli, gai e deai se lua lodo iai; aagai taemaha o henua i lalo e hano ga duu ange gi de magau.

¹¹ Goodou kalo ange diiloo mee a taemaha bei dagodo de hagatau a de Maadua gu hai i oodou lodo: go llodo mmahi, ma doodou llodo e hagaheohi goodou, ma de llili, ma de maatagu, ma de llodo mmao e tilo au, ma doodou hai hegau hagammahi, aama de hai gi sula de hagamodu heohi. Gai goodou gu hagaago mai bolo goodou e dee haisala donu i de mee nei.

¹² Gai au ne sisi adu gi goodou, aagai e dee go hiidinga o tangada ne haia laa de hegau dee heohi, aabe go hiidinga o tangada ne hai ange de mee dee heohi laa aagena, aagai se hai e hagaago adu ai gi goodou i mada luu mada o de Maadua doodou aaloha i gimaadeu.

¹³ Deenei ai, gimaadeu gu hagaaneane ai hogi omaadeu lodo. Gai gimaadeu gu hagaaneane ina omaadeu lodo, ma de kii ange demaadeu malangilangi i hiidinga de malangilangi o Titus, i doodou hai ga baba ono lodo.

¹⁴ Gai au tee dogaa donu i mee alodahi aagu ne tuhi ange ai goodou gi de ia. Gai mee alodahi amaadeu gu tala adu gi goodou ni muna abodonu, gai e bei ai hogi, amaadeu muna ne tuhi ange ai goodou gi Titus gu hagaago mai bolo ni muna abodonu.

¹⁵ Gai ia gu kii ange donu dono aloha i goodou, i de masavaa aana e maanadu ai dagodo o doodou daudali i mee alodahi, ma doodou abodonu ange gi de ia i de maatagu ma de bolebole.

¹⁶ Deenei ai, au e malangilangi, i hiidinga au gu lava donu dagu iloo abodonu oodou dagodo.