2 Corinthians 6 - De Beebaa Dabu

¹ Gimaadeu ni dangada e hai hegau hagabuni madali de Maadua, deenei ai, gimaadeu e dangidangi adu goodou gi dee hagangadi mee ina, de abodonu o de Maadua oodou gu kave naa.

² Gai ia e hagadaba, “Au ne hagallongo dau dangidangi i de masavaa heohi, gai au ne bale adu goe i de laangi o de hagamouli.” Tilo, de masavaa heohi go iainei; tilo, go iainei donu de laangi hagamouli.

³ Gimaadeu tee hagahai ngadaa goodou i dahi mee, gi dee hagabaubau ina ai demaadeu duuhanga hegau,

⁴ gai gimaadeu gu hagaago danuaa adu i mee alodahi, bolo gimaadeu ni dangada hai hegau niio de Maadua: i demaadeu lodo mmahi i de golomagi lodo, i de masavaa o denga hagaduasala, ma mee hai ngadaa, aama mee hagamanavasaa,

⁵ ma demaadeu hagailiilihia, ma de haoa gi lodo hale pono, ma denga hellumi, ma denga hegau kona, ma tee maua de sseni i denga boo, ma de hiikai;

⁶ i de gilimalali, ma de iloo mee, ma de golomagi lodo, ma de abodonu, ma de Hagasaalunga Dabu, ma de aloha abodonu,

⁷ ma de tala de muna abodonu, ma ssauaa o de Maadua, ma denga goloa hebagi o de heohi i de lima madau ma de lima masui;

⁸ i de hagadubu ma tee hagadubu, i de hagabaubau ina ma demaadeu duuhia. Gimaadeu gu hagabinga bolo ni dangada e daahangadia dangada, aagai gimaadeu e hai hegau donu i de mee abodonu,

⁹ ni dangada e dee dau, gai e soa dangada e iloo gimaadeu; ni dangada e dee modu de tuu ange gi de maakau, aagai goi mouli huu; ni dangada e hagaduasala ina, aagai tigi daia gi maakau;

¹⁰ ni dangada e hagadaemaha ina, aagai e malangilangi i masavaa alodahi; ni dangada hagaau aloha, aagai e hai lava dangada soa; ni dangada e deai omaadeu mee, aagai gu bolo ange aagena mee alodahi.

¹¹ De gau Corinth, gimaadeu gu tala adu de muna abodonu gi goodou; gai omaadeu lodo e maahuge adu gi goodou i de aloha.

¹² Gimaadeu e dee daohi omaadeu aaloha i goodou, aagai go goodou e daohia oodou aaloha i gimaadeu.

¹³ Dogu hai e basa adu ai — au e basa adu gi goodou bei dogu basa ange gi agu gauligi — goodou huugea mai hogi oodou lodo.

De temple o de Maadua e mouli laa

¹⁴ Goodou aude hagabuni ange gi gilaadeu e dee hagadonusia. Gai e maua i de hai gi buni de heohi ma de baubau, be go de maalama ma de gohu?

¹⁵ E aha, e maua i de hai gi nnoho hagabuni Klisdo ma Belial? Gai e aha a tangada gu hagadonusia e buni ange ai gi tangada e dee hagadonusia?

¹⁶ Gai e maua gi heloongoi de temple o de Maadua ma denga diinonga? Gidaadeu go de temple o de Maadua e mouli laa; gai de Maadua gu hagadaba, “Au e noho i olaadeu lodo ma de seesee i olaadeu magavaa. Au e hai naa go delaadeu Maadua gai gilaadeu go ogu dangada.

¹⁷ Deenei ai, goodou hulo gee mai i olaadeu magavaa, gai vaaea gee goodou mai i gilaadeu, go Tagi Maolunga e hagadaba, gai goodou aude poo ange gi de mee hakino gee; gai au ga abodonu adu gi goodou,

¹⁸ gai au e hai naa go doodou damana, gai goodou go agu dama, go Tagi Maolunga Mmahi Mmao laa e hagadaba.”