2 Corinthians 5 - De Beebaa Dabu

Taadeu mommee nnoho i de langi

¹ Gai gidaadeu e iloo bolo noo de hale malo, go odaadeu angaanga, odaadeu e mouli ai nei i henua i lalo gu maoha, gai e dahi odaadeu hale gu hagaduu i daho de Maadua, e dee se hale e hai i lima o dangada, gai se hale e dee ngado mai i de langi.

² Gidaadeu e duasala i taadeu nnoho i lo te hale nei, gai e kona mmao taadeu llodo e kahu i odaadeu mommee nnoho i de langi,

³ gai noo gidaadeu gu kahu ai, gai gidaadeu gu dee gilisau.

⁴ De masavaa odaadeu e mouli ai i lo te hale malo nei, gai gidaadeu e duasala ma de daemaha — e dee go hiidinga gidaadeu e llodo gi gaavee gee odaadeu angaanga nei, aagai gidaadeu e llodo e kahu i de hale ange laa, gai de angaanga magaugau nei e sui naa ga se angaanga e mouli.

⁵ Gai de ia e hagadabena ina ange gidaadeu gi de mee nei go de Maadua, ne gaamai laa gi gidaadeu de Hagasaalunga ⌊Dabu⌋ e hagadonu ai de mee nei.

⁶ Deelaa ai, gidaadeu e llodo mmahi i masavaa alodahi, i taadeu iloo, bolo de masavaa odaadeu e mouli ai i de angaanga nei, gai gidaadeu e dee nnoho i daho Tagi Maolunga.

⁷ Gai gidaadeu e mouli i de gai, e dee mouli i mee adaadeu e gidee.

⁸ Gimaadeu e llodo mmahi ma de malangilangi i de dugu de hale go odaadeu angaanga nei, gai ga hulo e nnoho madali Tagi Maolunga.

⁹ Deenei ai, e dee hilihili be gidaadeu e nnoho madali ia aabe e dee maaleva i ono daha, gai de mee amaadeu e hagaduu ngae e hai go de hagamalangilangi ia.

¹⁰ Go hiidinga gidaadeu alodahi e tuu naa i mada i mua de nohoanga hagamodu muna o Klisdo, gai dahi ma dahi e kave naa de hagaoanga o ana hegau ne hai i de angaanga nei, e dee hilihili be e danuaa aabe e baubau.

Taadeu hagadanuaa ma de Maadua i daho Klisdo

¹¹ Deenei ai, go hiidinga demaadeu iloo dagodo de madagu i Tagi Maolunga, gimaadeu e usuusu ange dangada. Aagai de Maadua e iloo omaadeu dagodo, gai au e tali bolo goodou e tonu ange donu hogi omaadeu dagodo i tagi oodou lodo.

¹² Gimaadeu e dee tuhi adu gimaadeu gi goodou, aagai gimaadeu e gaavadu gi goodou dahi hiidinga e maua ai e goodou i de tuhi gimaadeu, gi maua ai e goodou i de pasa ange gi dangada e duuhia laa donu huu gilaadeu i mee a dangada e gidee, e dee go mee i lodo o tangada.

¹³ Gai noo gimaadeu e ssenga ange, gai se mee ange gi de Maadua; gai noo gimaadeu e dee ssenga ange, gai se mee adu gi goodou.

¹⁴ Go hiidinga de aloha o Klisdo e usuusu mai gimaadeu, i hiidinga gimaadeu gu iloo de mee nei: e dahi ne magau i hiidinga o dangada alodahi, deelaa ai, dangada alodahi gu maakau madali ia.

¹⁵ Gai ia ne magau i hiidinga o dangada alodahi, deelaa ai, dangada alodahi e mouli gi dee hagamalangilangi ina donu huu gilaadeu, gai gi mouli e hagamalangilangi ai de ia ne magau ma de mouli age i olaadeu hiidinga.

¹⁶ Deenei ai, mai iainei gai gimaadeu gu dee tilo dangada bei de hai a dangada e tilo ai; e dee galemu donu gimaadeu nogo tilo Klisdo i mua bei de hai a dangada e tilo ai laa, gai iainei gimaadeu gu dee tilo bee nei.

¹⁷ Deenei ai, noo tangada gu noho i lodo o Klisdo, ia gu se dangada hoou. Mee duai gu llilo; tilo, mee hoou gu daamada.

¹⁸ Mee nei alodahi go de Maadua ne haia, gai ia ne hagadanuaa odaadeu magavaa ma ia i de magau o Klisdo, ma de gaamai gi gidaadeu tuuhanga hegau go de hagadanuaa magavaa o dangada ma de Maadua;

¹⁹ deenei tagodo, de Maadua ne hagadanuaa olaau magavaa ma henua i lalo i daho Klisdo, ia tee dau ange olaadeu haisala gi gilaadeu, gai gu dugu mai gi gidaadeu gi agoagona dagodo o de hagadanuaa magavaa.

²⁰ Deenei ai, gimaadeu go sui o Klisdo, e dagodo be go de Maadua e dangidangi adu gi goodou i omaadeu daha. Gai gimaadeu e sui Klisdo e dangidangi adu ai gi goodou: goodou gi hagadanuaa ina oodou magavaa ma de Maadua.

²¹ Gai de Maadua ne hai Klisdo e deai laa ono haisala go de haisala, gi maua ai e gidaadeu i de kave de heohi o de Maadua i ono daha.