2 Corinthians 4 - De Beebaa Dabu

Mee hagamogomogo i lodo ssaa hadu

¹ Deenei ai, gimaadeu e dee baageaa omaadeu lodo, i demaadeu hai tuuhanga hegau nei i de abodonu o de Maadua.

² Gimaadeu gu tili gee hegau hagadookaa e hai hagammuni laa. Gimaadeu gu dee hai hegau hagasenga ma tee hagahaisala muna a de Maadua, aagai gimaadeu e tala de muna abodonu i mada luu mada o de Maadua, aama tagi i de lodo o dahi ma dahi.

³ Gai noo de longo danuaa omaadeu e agoago ai nei e hagammuni, gai e hagammuni donu huu i gilaadeu e dee hagamouli.

⁴ Gai de maadua o henua i lalo nei gu lava i de hai gi dee kide lodo o dangada e dee hagadonusia, gi dee gidee ai e gilaadeu de maalama o de longo danuaa ma de mahamaha o Klisdo, go ia de hagadulagi o de Maadua.

⁵ Gai gimaadeu e dee agoago i omaadeu dagodo, aagai go dagodo o Iesu Klisdo Tagi Maolunga, gai gimaadeu go oodou dangada hai hegau i hiidinga o Iesu.

⁶ Gai de Maadua ne hagadaba, “De maalama gi hanage gi hagamaalama ina lo te gohu,” go de Maadua hogi e hagamaalama ina omaadeu lodo, ga gaamai ai de maalama gi iloo ai e gimaadeu dagodo de mahamaha o de Maadua e gidee laa i luu mada o Klisdo.

⁷ Aagai de mee hagamogomogo nei e hhao i lodo ssaa e hai i bela pigi, e hagaago mai ai bolo ssauaa e dubu ange laa i mee alodahi se mee mai i daho de Maadua, e dee se mee mai i odaadeu.

⁸ Gimaadeu ne tuu ange gi denga hai ngadaa alodahi, aagai tee damaa llodo baageaa donu. Gimaadeu tee tonu ange gi mee gu hai, aagai tee helui donu demaadeu tali;

⁹ gimaadeu ne vaivai haia, aagai tee dilia donu; gimaadeu ne hagaduasala ina, aagai tee maakau;

¹⁰ masavaa alodahi gai gimaadeu e hagauda saele de magau o Tagi Maolunga go Iesu, e hagaago danuaa mai ai hogi de mouli o Iesu i lodo omaadeu angaanga.

¹¹ Gai gimaadeu e mouli laa, e dee mmao gee donu i de magau i hiidinga de ingoo o Iesu, gi sula danuaa mai ai dagodo de mouli o Iesu i omaadeu angaanga magaugau nei.

¹² Deenei ai, de magau e hai hegau i omaadeu daha, aagai e hai gi maua e goodou de mouli.

¹³ Gidaadeu gu kave de hagasaalunga daudahi o de gai, bei de hai gu sisi ai laa, “Au e hagadonusia, deenei ai au e tala.” Gimaadeu e hagadonusia hogi, deenei ai, gimaadeu e tala,

¹⁴ go hiidinga gimaadeu e iloo bolo de Maadua ne hagamouli age laa Tagi Maolunga go Iesu, e hagamouli age naa hogi gimaadeu madali Iesu, ga hagaago ange gimaadeu madali goodou i mada luoono mada.

¹⁵ Mee nei alodahi ne hai i oodou hiidinga; gai gi kii ange ai de soa dangada e gaavee de abodonu o de Maadua, gai gu kii ange hogi de laumalie de hagaahe ange de abodonu aama de hagamahamaha ina o de Maadua.

¹⁶ Deenei ai, gidaadeu gi dee llodo baageaa. Gai ga hagadaga iho naa donu odaadeu angaanga nei, gai odaadeu lodo e hagahoou i laangi alodahi.

¹⁷ Go hiidinga odaadeu hai ngadaa e hai donu huu i dahi masavaa bodobodo, e hagadabena ange ai gidaadeu gi de mahamaha laumalie e dee ngado mai laa, e dee maua laa i de hagahedae ange gi dahi mee daudahi,

¹⁸ go hiidinga gimaadeu e dee kalo ange e tilo mee e gidee, gai e tilo mee e dee gidee laa. Mee e gidee laa e odi donu, aagai mee e dee gidee laa e daakodo donu ga hano ai.